Kakpiʔiligele 8

ZEZI TUNDUNMINƆ PE BAARA DE ZUDE NƐ SAMARII TƐNIMƐ NI BE

(8.1–9.43)

Sɔli wi 'Zerizalɛmi tɛ́ngɛfɔlilɔ wuʔɔ bèle

1  wi cé wúɔ nɛ́ pe ní Eciɛnni kpúʔu nɛ̄ gè. Kire cɛngɛ gáà gè a pe 'wuʔɔlɔ taʔa kpuʔɔ wuulo nɛ̄ bèle kàʔa nī gè. A pe mìɛni 'cɛrigɛ nɛ̀ kɛ́ tɛ́nimɛ nī nɛ́ tɛ́nimɛ ní, á ki 'kò Zezi tundunminɔ peli yákuɔlɔ. 2 A siɛnnɛ pálì 'taa, bìli pe 'puu nɛ Kulocɛliɛ koligo gbùʔɔrɔ́ gè; a pe pɛ́nì Eciɛnni líɛ wè nɛ̀ sɛ́nì wi tɔ́n. Pe cé nyɛni nìʔɛgɛ Eciɛnni kùugo nɛ̄ gè. 3 Sɔli wire 'puu nɛ ŋàʔana bè tɛ́ngɛfɔlilɔ gboli cúʔɔ lè wī. Wi 'puu nɛ jiin saaya nī yè nɛ tɛ́ngɛfɔlilɔ cògí bèle fànʔa, nɛ waa nɛ kanʔa pe pe tɔ́ngi kasuu nī, cɛlilɛ bèle nɛ́ nàguɔlɔ ní bèle.

Filipi sɛ́nì Kataanna Siɛnrɛ jáari dè Samarii kàkpuʔɔ mɛ́

4 Tɛ́ngɛfɔlilɔ bílì pe cé fɛ̀ nɛ̀ cɛrigɛ bèle, peli 'puu nɛ jáari dè siɛnnɛ mɛ́ bèle baa pe tóridiɛyɛ nī yè. 5 A ki 'nyaa Filipi wire cé kɛ́ kàkpuʔɔ mɛ́ nɛ̀ sɛ́ni wori nyu dè ki tiʔɛ wuulo mɛ́ bèle, Kirisi wè. 6 Siɛnniʔɛmɛ 'puu nɛ líiye cáanri nɛ Filipi siɛnrɛ lúru dè; ki 'nyaa pe 'puu nɛ wi nyaʔa bèle bàli wi 'puu nɛ kpínʔini bèle. 7 Gbòdolilo pe 'tɔ̀ni nɛ̀ puu nɛ yigi siɛnnɛ nī bèle níɛ kòkuʔulo wáari kpuʔɔ. Yaamɔnigilɔ nɛ́ siɛnkpɔlilɔ nìʔɛbɛlɛ pe 'puu nɛ pori. 8 A fundaanra 'jíin kpuʔɔ ki kàʔa gáà nī gè.

9 Nàguɔ wáà cé sí puu baa kòriwo ki kàʔa nī gè pe wi ye Siimɔ, nìnyuʔɔnigɔfɔli wáà wi 'puu. Wi nìnyuʔɔnigɔ kakpiʔiligele ke 'puu nɛ kàʔa siɛnnɛ pe fungo wúu. Ki nàguɔ wi 'tɔ̀ni nɛ̀ puu nɛ wìi sɔ̀ngí siɛnkpuɔwɔ. 10 Pe mìɛni bèle, nɛ̀ ki líɛ pìile nɛ̄ nɛ̀ sɛ́nì láʔa liɛlɛ nɛ̄ bèle, pe mìɛni 'puu nɛ líiye cáanri nɛ lúru wi mɛ́, níɛ̀ jo: «Ŋàa wire tɔ̀ni wī Kulocɛliɛ fànʔa gè, gàa pe ye fànʔa kpuʔɔ gè !» 11 Siɛnnɛ pe 'tɔ̀ni nɛ̀ puu nɛ wi siɛnrɛ lúru dè kpuʔɔ, ki 'nyaa wi kakpiʔiligele ke cé tɔ̀ni nɛ̀ pe fungo wúɔ, nɛ̀ taʔa gíi nɛ̄, ki cé lɛ̀lɛ kúɔ bà wi 'puu nɛ nìnyuʔɔnigɔ kele kúu gèle.

12 Bà sí Filipi wi cé ki Kataanna Siɛnrɛ jáari dè pe mɛ́ nɛ́ Zezi Kirisi wori ní dè, a pe 'jíin tɛ́ngɛlɛ nī lè. A nàguɔlɔ pe kpíʔile wè nɛ́ cɛlilɛ ní bèle. 13 Siimɔ wire tíimɛ wè wi cé tɛ́ngɛ, a wi 'batɛmi kpíʔile wè; wiì cé puu nɛ laʔa Filipi kúrugu wèʔ. Fìɛlɛ nɛ́ kakpoliyo nyáà Filipi wi 'puu nɛ kpínʔini yè, a ki 'Siimɔ wi fungo wúɔ.

Piɛri nɛ́ Zan pe 'kɛ́ nɛ̀ sɛ́nì Filipi sáʔa wè

14 Zezi tundunminɔ bílì pe cé puu baa kàʔa mɛ́ gè nɛ́ ki lúʔu dí wuulo pe 'fɔ̀li Kulocɛliɛ siɛnrɛ nɛ̄ dè, a pe nɛ́ yɛ̀gɛ nɛ̀ tórigo baa. 15 Bà pe sɛ́nì yiri bèle, a pe 'náari Samarii wuulo mɛ́ bèle, gìi ki bé tí ni- pɛn pe mɛ́ bèle. 16 Ki 'nyaa pe wàa nigbe sì cé fìɛ Kulocɛliɛ Pìle taa lèʔ. wire yákuɔ pe cé kpíʔile Kàfɔli Zezi míʔɛ nɛ̄ gè. 17 A Piɛri nɛ́ Zan ní wè a pe 'kúɔ nɛ́ kiyɛ taʔala yè pe nɛ̄, a ni 'pɛn pe mɛ́.

18 Bà Siimɔ 'ki nyaa Zezi tundunminɔ pe kadaʔara tire nɛ̄ Kulocɛliɛ Pìle ni 'pɛn lè, a wi 'pɛn nɛ́ wali ní pe kúrugu nɛ̀ pɛ́nì pe yɛ: 19 «Ye- ki fànʔa gáà kɛn gè m'mɛ́, gìi ki bé tí a mi 'mi kiyɛ taʔala yè siɛn ó siɛn nɛ̄ wè, Kulocɛliɛ Pìle ni- pɛn ki siɛn mɛ́ wè.»

20 A Piɛri wi sí wi yɛ: «Muɔ nɛ́ muɔ wali ní wè, ye- pínɛ ye cúʔɔ, bɛ̀ ki 'nyaa muɔ 'ki sɔ̀ngi nɛ̀ jo dùʔɔ Kulocɛliɛ yakɛngɛ kiī nɛ suu nɛ́ wali ní wī wè. 21 Muɔ liɛlɛ yafiɛn wè náʔa gèʔ kaala náà nī lèʔ; muɔ fungo ki wè sìnʔɛ Kulocɛliɛ yiʔɛ mɛ́ gèʔ. 22 Muɔ fungo yiʔɛ gè má láʔa muɔ kapiile nɛ̄ lè Kàfɔli wi yiʔɛ mɛ́ gè má sí náari wè, dùʔɔ sɔ̀ngibiire dáà dī baa muɔ fungo nī gè wi bé ki yaʔa muɔ nɛ̄. 23 Mi 'ki nyaa funbinʔɛ nɛ́ kolimɔ ti 'muɔ fungo nyì gè nɛ̀ muɔ taa nɛ̀ cò kapiile nī lè.»

24 A Siimɔ wi sí jo: «Ye- Kàfɔli náari wè mi kɛn yeli tíimɛ bèle, gìi ki bé tí gàa yeli 'juu gè yafiɛn fǎga mi taaʔ.»

25 Piɛri nɛ́ Zan ní wè, siɛnrɛ díì ti 'puu pe mɛ́ bè juu Kàfɔli wi wori nī dè, bà pe kɛ́nì ti juu nɛ̀ kúɔ nɛ́ Kàfɔli wi ní dè wè, a pe 'koli nɛ̀ kɛ́ Zerizalɛmi kàʔa mɛ́ gè. Pe cé Kataanna Siɛnrɛ jáari dè nɛ̀ tóri kàpiire nìʔɛrɛ nī.

Ecopii nàguɔ wori dè nɛ́ Filipi ní wè

26 A Kàfɔli wi wáà sɛ́nì juu nɛ́ Filipi ní wè nɛ́ wi yɛ: «Yɛ̀ mari waa cɛngɛnyɛnifolimɛ kàliige mɛ́ gè, ma sa koligo kpàli gè ma cò, gàa ki tíri Gaza kàʔa mɛ́ gè; ki koligo kiī nɛ waa waʔa siɛn wè tòrí ki nīʔ.»

27 A Filipi wi 'yɛ̀ nɛ̀ kɛ́. A wi sɛ́nì Ecopii kùlo siɛnkpuɔwɔ wáà nyaa, pe cé ki nàguɔ ŋáà kɔ̀n wè; wire wi 'puu nɛ kùlofɔli wi lɔri ti mìɛni wéli dè. Cɛliwɛ sí wi 'puu ki tiʔɛ kùlofɔli wè, pe wi ye Kandasi. Ki 'nyaa Ecopii nàguɔ wi cé kɛ́ Zerizalɛmi kàʔa mɛ́ nɛ̀ sɛ́nì Kulocɛliɛ gbùʔɔrɔ wè, nɛ́ koli nɛ waa. 28 Wi cé tɛ́ni wi sunʔɔ wotori nī wè, níɛ sɛbɛ wéli wè nɛ waa.

29 A ni 'juu nɛ́ Filipi ní wè nɛ́ wi yɛ: «Sìʔɛrɛ ma kpɔni sunʔɔ wotori ŋáà nɛ̄ wè.»

30 A Filipi wi 'líɛ nɛ fé nɛ waa sunʔɔ wotori mɛ́ wè, nɛ̀ sɛ́nì Ecopii nàguɔ nyaa wè wi siɛnjuuliɛwɛ Ezayi sɛbɛ wéli wè nɛ ti nyu yékpogbuɔlɔ nī. A wi 'wi yúgo: «Siɛnrɛ dáà muɔ nɛ wéli dàa dè, muɔ díɛ ti kɔri cɛ́n wè lé ?»

31 A nàguɔ wi 'jo: «Mɛni m'bé ti cɛ́n síɛ, a wàa sì ti kɔri juu wè nɛ̀ mi tìɛ wèʔ ?»

A wi 'fali nɛ̀ Filipi yeri wè a wi 'tánʔa nɛ̀ tɛ́ni wi táanni. 32 Tiʔɛ gíì wi 'puu nɛ wéli nī dè, ki siɛnrɛ tire dī dàa dè, ti 'jo:

Wiī bɛ̀ sìnbuɔ tíɛlɛ,

á piyē nɛ waa nɛ́ wi ní

kpúudiʔɛ nī,

wiī pìiriwe bɛ̀ sìnbapile tíɛlɛ,

ni síire kùnufɔli kiyɛ nī yè;

bɛ̀ wi puu, wiì kɛ́nì

nyuɔ múgu gèʔ.

33 Pe 'wi máama, siɛn sì taa

nɛ̀ wi tànʔa juuʔ.

Ŋáasiɛn sí wi je taa

bè wi pìsiire wori juu dè,

bɛ̀ pe 'wi sìi kúɔ wè

bile duniya nī wè ?

34 A Ecopii siɛnkpuɔwɔ wi kɛ́nì Filipi yɛ wè: «Mi nɛ muɔ fiɛn wī, -ki juu m'mɛ́ wêli, ŋáasiɛn wori Kulocɛliɛ siɛnjuuwo wi 'juu mmɛ gè ? Wire tíimɛ wori wi 'juu lé, dí wàa wiiyɛ wi pun ?»

35 A Filipi wi 'siɛnrɛ líɛ dè, nɛ̀ ki séli sɛbɛ wi siɛnrɛ dáà nɛ̄ dè nɛ̀ juu dè wi mɛ́ nɛ̀ kɛ́, gìi ki 'Zezi wori kúɔ dè. 36 Bà pe waa koligo nɛ̄ gè, a pe sɛ́nì nɔ̀ luʔɔ káà nɛ̄, a siɛnkpuɔwɔ wi 'jo: «Luʔɔ káà n'gɛ ! Gáa ki ń'nɛ̀ 'kò dí mi sí wè ?»

37 [A Filipi wi 'wi yɛ: «A tɛ́ngɛlɛ yē muɔ mɛ́ nɛ́ muɔ fungo ki mìɛni ní gè, muɔ bé gbɛ̀ batɛmi kpíʔile wè.»

A nàguɔ wi 'wi yɛ: «Mi 'tɛ́ngɛ ki nɛ̄ Zezi wiī Kulocɛliɛ Jaa.»]

38 A wi sí wotori yérige wè, á pe siɛnnɛ siin pe 'tìgi nɛ̀ jíin luʔɔ nī gè. A Filipi 'wi nàguɔ ŋáà batiize wè. 39 Bà pe kɛ́nì kúɔ nɛ́ yiri luʔɔ nī gè, a Kàfɔli wi ni 'Filipi líɛ wè nɛ̀ núgo; nàguɔ wiì ń'nɛ̀ wi nyaaʔ. A wi 'fali wi koligo nī gè níɛ fundaanra kpínʔini nɛ waa.

Kulocɛliɛ Pìle ni 'Filipi kɔ́ri wè nɛ̀ kɛ́ tiʔɛ káà nī

40 Filipi wire wè, a wire kɛ́nì wìi nyaa Azɔti kàʔa nī. A wi 'séli nɛ jáari dè nɛ tòrí kàaya nī yè fúɔ nɛ̀ sɛ́nì nɔ̀ Sezare kàʔa nɛ̄ gè.