Yewe diba wiī Dawuda saʔa nɛ̄ gè súuri
132
1 Fundaanra tánʔagbuɔlɔ ŋúnugo gī.
Yewe yo, sɔ̀ngi ma taa nɛ́ Dawuda ní wè
nɛ́ wi fùrɔgɔ ki mìɛni ní.
2 Dawuda wire wi 'kàli Yewe nɛ̄a,
wi 'nyuɔ kún nɛ̀ kɛn Yakuba Kulocɛliɛ Ŋɔrifɔli mɛ́ wèb,
3 a wi 'jo: «Miǐ je ga jíin mi fɛ̀ni saʔa nī gè baa mi nɛ kòrí wèʔ,
mi sǐ je sínɛ mi yasinɛgɛ nɛ̄ gèʔ,
4 miǐ ga tíi mi nyapigele tɔ́n gèleʔ
nɛ́ míɛni miǐ ŋɔ́ni bè nyaa púloʔ
5 fúɔ bè taa mi pa tiʔɛ taa Yewe mɛ́
gàa ki bé puu kòridiʔɛ Yakuba Kulocɛliɛ Ŋɔrifɔli mɛ́ wèc.»
6 Bà weli yé puu Efiratad kàʔa nī gè, wéli nyɛ́nì nyakungɛngɛ finʔɛgɛ wuʔu lúʔu gè,
a weli sɛ́nì ki nyaa baa Yaarie kàʔa siiye nī yè.
7 Yeri báan we‑ kɛ́ Yewe kòridiʔɛ mɛ́ gè,
we sa tuu we cúbulo wi tɔliyɔ taʔadiʔɛf yiʔɛ mɛ́ gè !
8 Yewe yo, yɛ̀ mari báan muɔ ŋɔ́daala tiʔɛ mɛ́ gè,
muɔ wè, nɛ́ muɔ finʔɛgɛg ní gè, gàa ki 'muɔ ŋɔri tìí dèh.
9 ‑Ki yaʔa sínnɛ ni‑ puu muɔ kacuɔnrilɔ nɛ̄ bèle bɛ̀ buruyo tíɛlɛ,
dí siɛnnɛ bálì pe 'pìye puɔ muɔ nɛ̄ wè,
peri fundaanra yékpuʔulo wáari gèle !
10 Muɔ baakuɔwɔ Dawuda kɛnmɛ nɛ̄ bè,
muɔ fǎga cíi kùlofɔli nɛ̄ wè, muɔ siɛnnyiɛnɛgɔnwɔ wèʔ !
11 Yewe nyɛ́nì kàli nɛ̀ kɛn Dawuda mɛ́, kányiʔɛ nɛ̄,
wiǐ ní ga tíi koli ti nɛ̄ʔ, nɛ́ jo:
«M'bé ki kpíʔile muɔ tíimɛ siimɛ wuu wáà
bé tɛ́ni muɔ kùlofɔlilɔ kácunʔɔ nɛ̄ gèi.
12 A muɔ jaala pe fɔ̀li nɛ mi nyakungɛngɛ siɛnrɛ cògí dè,
nɛ́ mi kajuʔulo ní gèle gàli nɛ̄ mi 'pe tɛnmɛ gèle,
pe jaala míɛni pe béri tɛ̀ní muɔ kùlofɔlilɔ kácunʔɔ nɛ̄ gè
súuri lɛ̀lɛ ó lɛ̀lɛ nīj.»
13 Nɛ́ ki cɛ́n Yewe nyɛ́nì Siyɔn kàʔa nyíɛnɛ gè nɛ̀ kɔ̀n;
ki kaala ni 'wi dɛ́ni ki‑ kò wi tɛ́nidiʔɛk.
14 A wi 'ki juu nɛ́ jo: «Mi ŋɔ́daala tiʔɛ gī súuri lɛ̀lɛ ó lɛ̀lɛ nī.
M'bé tɛ́ni baa, nɛ́ ki cɛ́n ki kaala ni 'mi dɛ́nil.
15 M'bé diba taʔa wè ki síkaanya yaliire nɛ̄ dè ti‑ niʔɛ,
mi bé ki fɔ̀ngɔfɔlilɔ tín bèle suro nɛ̄ dè.
16 M'bé ki kpíʔile Siyɔn kàʔa kacuɔnrilɔ pe‑ suɔlɔ taa lèm,
nɛ́ ki siɛnnɛ bálì pe 'pìye puɔ mi nɛ̄ wè,
pe béri fundaanra yékpogbuʔɔlɔ wáari gèlen !
17 Baa kire tiʔɛ nī gè, m'bé Dawuda ŋɔri yige dè bɛ̀ nyɛnɛ tíɛlɛo,
m'bé ki kpíʔile mi siɛnnyiɛnɛgɔnwɔ
wi béri càanná bɛ̀ fètinnɛ kpìɛnmɛ tíɛlɛp.
18 M'bé fìɛrɛ buruyo le yè wi leguulo nɛ̄ bèle;
gàa ki 'wire kúɔ wè, wi kùlofɔli ndɔ̀ngɔ ki béri nyíʔɛnɛ wi nɛ̄.»