Yeri ŋú yeri Kàyuʔujuufɔli Yewe gbùʔɔrɔ́ wè
98
1 Ŋúnudanʔa gáà pe ŋú nɛ́ yakpuɔnrɔ ní dè.
Yeri ŋúnuvɔngɔ ŋú Yewe mɛ́ wèa, nɛ́ ki cɛ́n wi nyɛ́nì kakpoliyo kpíʔile !
Wi kàliige kɔli nɛ́ wi ŋɔri ní dè, kire 'ki kpíʔile a wi 'fànʔa taa.
2 Yewe nyɛ́nì ki tìɛ wire wī Suɔfɔli wè,
wi nyɛ́nì wi sínnɛ tìɛ lè kùlogolo siɛnfeliye nyaamɛ nɛ̄ bè.
3 Wiì yé fìʔɛʔ bè wi bànguɔ dɛ́nigɛ tìɛ gè nɛ́ wi kányiʔɛ kaala ní lè Isirayɛli siɛnnɛ kɔli mɛ́ gèʔ.
Duniya siɛnnɛ pe mìɛni bèle, dàala tiɛyɛ yi mìɛni nī yè, a pe 'ki cɛ́n wi nyɛ́nì weli suɔ.
4 Dàala siɛnnɛ ye mìɛni, yeri fundaanra yékpuʔulo wáari Yewe mɛ́ wè !
Yeri ŋú yeri yakpuɔnrɔ kpúɔn dè !
5 Yeri gɔripile kpúɔn lè Yewe mɛ́,
yeri gɔripile kpúɔn lè ni de tùngú yé ŋúnugo le gèb !
6 Ye kàkpaanya líɛ yè nɛ́ sìnbanyɛyɛ ní yè, yeri yi wíic !
Yeri fundaanra yékpuʔulo wáari Kùlofɔli Yewe yiʔɛ mɛ́ gè !
7 Kuʔɔjii lakuruyo yi de tùngú
nɛ́ ki laamɛ yɛrɛ ti mìɛni ní dèd,
nɛ́ míɛni duniya wè nɛ́ wi siɛnnɛ ní bèle !
8 Lakoliyo yi de kadaʔala kóri !
Nyaguruyo míɛni, yi de fundaanra yékpuʔulo wáari
9 Yewe yiʔɛ mɛ́ gè, nɛ́ ki cɛ́n wiī nɛ báan
bè pa kàyuʔu juu dàala siɛnnɛ nɛ̄ bèle !
Wire wi bé duniya siɛnnɛ kàyuʔu juu gè nɛ́ sínmɛ ní,
bé kùlogolo siɛnfeliye kàyuʔu juu gè nɛ́ sínmɛ níe.