Weri Yewe gbùʔɔrɔ́ wè weri lúru wi mɛ́ !
95
1 We‑ yɛ̀ weri fundaanra yékpuʔulo wáari Yewe mɛ́ wè !Weri kòkuʔulo wáari wi mɛ́,
wire ŋáà wī kàdɛnigbaala nɛ weli suu wè !
2 We‑ sìʔɛrɛ we kpɔni wi nɛ̄, weri wi síɛri,
we fundaanra yékpuʔulo wáa wi mɛ́, we wi gbùʔɔrɔ nɛ́ ŋúnugo ní !
3 Nɛ̀ ki cɛ́n Yewe Kulocɛliɛ wi nyɛ́nì kpúʔɔ !
Wire wī Kùlofɔgbuɔwɔ kulocɛlɛlɛ pe mìɛni nyùgo nɛ̄ !
4 Dàala sícuumɔ, piī wi kiyɛ nī yè,
nɛ́ míɛni nyagurukpaʔaliyɛ yi mijuʔulo kiyē wi wuʔulo.
5 Kuʔɔjii wiī wi wuu, wire wi 'wi faan.
Dàala niī wi woli, wi kiyɛ yi 'ni fánʔari.
6 Weri báan wi yiʔɛ mɛ́, we pa gbɔbi, we tuu we cúbulo,
we káguro cáan Yewe weli faanfɔli yiʔɛ mɛ́ gè !
7 Nɛ́ ki cɛ́n, wire wī weli Kulocɛliɛ wè;
weli bèle, weli yē wi sìnbatogo gáà wi nári gè,
gàa wi kiyɛ yi kɔ́ri nɛ waa gèa.
Pàngɛ gè, a yeli 'wi nyasiɛnrɛ lúʔu dèb,
8 ye fǎga yeli funyɔ gbɛ̀n yèʔ
majo bɛ̀ yeli tobilo pe 'ki kpíʔile Mɛriba tiʔɛ mɛ́ gè,
bɛ̀ yeli 'ki kpíʔile kire cɛngɛ gè
baa Masa tiʔɛ mɛ́ gè waama kùlo nī lèc.
9 Kire tiʔɛ nī yeli tobilo pe 'mi puu nɛ̀ wéli, nɛ́ mi siʔɛ nɛ̀ wéli,
nɛ̀ ki yaʔa pe yé mi kakpiʔiligele nyaa gèle nɛ̀ kúɔ.
10 Fúɔ nɛ̀ taa yiʔɛlɛ togosiind
a kire kɛ̀nnɛ náà siɛnnɛ pe 'kò m'mɛ́ laabiri yɛgɛ,
a mi sí ki juu nɛ́ jo:
«Siɛnnɛ pálì bīɛlɛ, pe funyɔ yi nyɛ́nì pùunni;
pe sì mi koligo cɛ́n gèʔ.»
11 Kire nɛ̄, mi fundanʔanigɛ nī gè, a mi 'kàli nɛ́ jo:
«Siɛnnɛ bálì piyě jíin púloʔ ŋɔ́daala tiʔɛ nī gè
gàa mi 'gbòbori nɛ̀ tɛ́ngɛ pe wuʔu gèʔe !»