Kulocɛliɛ yo ma mi cò ma suɔ !
70
1 Ŋúnuŋuminɔ yiɛginiwɛ wuʔu gī. Dawuda wuʔu gī. Bè sɔ̀ngi daa.
2 Kulocɛliɛ yo, ma mi cò ma mi suɔ!
Yewe yo, te báan fáari ma pa mi sáʔa !
3 ‑Ki yaʔa pe‑ faʔama taa, dí fìɛrɛ tɔ́n pe nɛ̄,
siɛnnɛ bálì pe caa bè mi sìi kúɔ wè !
Pe‑ koli pe kàduʔu wáa, faʔara‑ sí pe taa,
siɛnnɛ bálì pe caa yawuʔɔ mi taa wè !
4 Pe 'yɛli pe‑ koli, dí fìɛrɛ sí tɔ́n pe nɛ̄ !
bàli pe nyu mi wuʔu nɛ̄ gè nɛ́ jo: «Cúɔʔ ! Cúɔʔ !»
5 ‑Ki yaʔa bìli pe muɔ caa bèle, pe mìɛni pe‑ puu fundaanra nɛ̄
bèri muguri muɔ kɛnmɛ nɛ̄ bè.
Bàli ki 'dɛ́ni á muɔ ní pe suɔfɔli wè, peri ki nyu súuri pe jo:
«Kpuʔɔrɔ 'yɛli ti de tari Kulocɛliɛ nɛ̄ wè !»
6 Bɛ̀ mi yē fuunmɔfɔli nɛ́ ní fùrɔgɔfɔli wè, Kulocɛliɛ,
te báan fáari mi mɛ́ !
Muɔ yē mi sáʔafɔli nɛ́ ní ŋàa wi mi píle nɛ suu wè,
kire nɛ̄, Yewe, fǎga mɔgɔ díɛʔ !