Kulocɛliɛ wi 'leguulo jáa bèle, a siɛnsinminɛ peli ní fundaanra nɛ̄
68
1 Ŋúnuŋuminɔ yiɛginiwɛ ŋúnugo gī. Dawuda ŋúnudanʔa gī gàa pe ŋú nɛ́ yakpuɔnrɔ ní dè.
2 Kulocɛliɛ wi 'yɛ̀, a wi leguulo pe 'fɛ̀ nɛ̀ cɛrigɛa;
bàli wi 'biɛn bèle, a pe 'fɛ̀ wi yiʔɛ mɛ́ gèb.
3 Muɔ 'pe cɛrigɛ majo bɛ̀ wírige ki cî cɛrigɛ gè;
siɛnpiile pe 'nyɛgɛ Kulocɛliɛ yiʔɛ mɛ́ gè,
majo bɛ̀ sákuro cî nyɛgɛ kàsun nī gè.
4 Nɛ̀ ki yaʔa siɛnsinminɛ peli yē fundaanra nɛ̄;
piyē nɛ muguri Kulocɛliɛ yiʔɛ mɛ́ gè, piyē fundaangbuɔrɔ nɛ̄.
5 Yeri ŋú Yewe mɛ́ ! Yeri yakpuɔnrɔ kpúɔn dè yeri wi míʔɛ kpóri gè !
Yeri kpuʔɔrɔ tari wi nɛ̄,
wire ŋáà wi 'tɛ́ni kàsadibarɛ nɛ̄ dè á tiī fé nɛ́ wi ní wèc.
Wi míʔɛ kire gī Yewed ! Yeri fundaanra kpínʔini wi yiʔɛ mɛ́ gè !
6 Círile tuu wè, nɛ́ lakicɛlilɛ wélifɔli wèe,
wire wī Kulocɛliɛ wè, ŋàa wī baa wi kòridiʔɛ wàlidɛngɛgɛ nī gè.
7 Wire wi narigɛ kanʔa siɛnnɛfunvɔli mɛ́ wè,
wire wi kasuulebile yigi bèle níɛ ki kpínʔini pe kele ke nɛ̂ nyuɔ.
Nɛ̀ ki yaʔa cíimɛ siɛnnɛ peli níɛ kòrí waama kùlo nī lè.
8 Cí ! Kulocɛliɛ, bà muɔ 'yiri muɔ siɛnnɛ pe yiʔɛ mɛ́ gèf,
bà muɔ 'puu nɛ tári waama kùlo nī lè, Ye‑ ŋɔ́ cɛ̀.
9 a dàala ni 'cúungog, a nyìʔɛnɛ ni 'luʔɔ wo gè
dàala nɛ̄ lè Kulocɛliɛ yiʔɛ mɛ́ gè,
ŋàa wī Sinayii nyagurugo Kulocɛliɛ wèh,
Kulocɛliɛ yiʔɛ mɛ́ gè, ŋàa wī Isirayɛliyé Kulocɛliɛ wè.
10 Muɔ 'kɔli sáʔa gè nɛ̀ kàsakpuʔɔ cáan gè muɔ kɔrigɔ nɛ̄ gè,
a muɔ 'luʔɔwuʔɔ láʔa gè muɔ siɛnfurɔlɔ nɛ̄ bèlei.
11 Cí ! Kulocɛliɛ, muɔ siɛnnɛ pe 'tɛ́ni tiʔɛ nī gè
gàa muɔ 'gbòbori pe mɛ́ gè muɔ funjɛ̀ngɛ nī gè,
bè fuunmɔfɔlilɔ tɛ́ngɛ bèle ki nī.
12 Kàfɔli wi 'wi siɛnrɛ juu dè,
a cɛlilɛ gbokpuɔlɔ ni 'fɛ̀ nɛ̀ kɛ́ nɛ̀ sɛ́nì kataanna siɛnrɛ jáari dèj.
13 Kùlofɔlilɔ bálì pe leguulo kapiɛngbuɔnnɔ yiʔɛ kínigi gè,
a peli 'fɛ̀. Cí ! Pe 'fɛ̀ !
Cecɛ̀nminɛ bálì pe kòrí saʔa nī gè,
peli 'kapiɛnnɛ tɔ̀ni yɛrɛ liɛlɛ dè.
14 Gòtolo náà pe faan lè, pe 'ni fíkɛnyɛ fèri yè nɛ́ wali ní wè;
ni síiye yiī namiige céri tiɛ cɛ̀nwɛ ní wèk.
Yeli nàguɔlɔ bèle, yeli bé sí kò sínɛnɛ lé
sìnbaduuyo sunʔɔmɔ nī bè wī lél ?
15 Lɛ̀lɛ líì nī Ŋɔri Ti Mìɛni Kulocɛliɛ wi 'kùlofɔlilɔ cɛrigɛ bèle,
ki cé puu majo nɛ̀wirilem ni tíri nɛ tun
Salimɔ nyagurugo nɛ̄ gèn.
16 Basan nyagurugo ki yē nyagurucɛ̀njɛngɛ;
Basan nyagurugo gè, ki kpàʔaladiɛyɛ yi 'niʔɛ.
17 ʔé ! Nyagurugo muɔ, muɔ ŋáà nɛ̄ kpàʔaladiɛyɛ yi yē nìʔɛyɛ yè,
gáa nɛ̄ yejaʔa yē muɔ nī nyagurugo gíì nɛ̄ gè
gàa Kulocɛliɛ 'nyíɛnɛ nɛ̀ kɔ̀n nɛ̀ tɛ́ni ki nɛ̄ gèo ?
ʔaan, Yewe bé ki kpíʔile wire kòridiʔɛ súuri !
18 Kulocɛliɛ wi suɔnyɔ wotorilo piyē nìʔɛnɛ
fúɔ nɛ̀ ki yaʔa siɛn sǐ gbɛ̀ jaa bè pe tɔ́riʔ;
wotorilo piyē siramuʔɔyɔ siramuʔɔyɔp.
Kàfɔli wi nyɛ́nì kɔ́n nɛ́ pe ní Sinayii nyagurugo nɛ̄
nɛ̀ sɛ́nì jíin wi saawalidɛngɛgɛ nī gèq.
19 Bà muɔ 'tánʔa tiɛkpaʔaligɛ nɛ̄ gè, a muɔ 'siɛnnɛ cò bèle nɛ̀ kɛ́.
A muɔ 'kpuʔɔrɔ yɛrɛ taa siɛnnɛ mɛ́ bèler,
nɛ́ míɛni siɛnciile tíimɛ mɛ́ bèle.
Yewe yo, Kulocɛliɛ yo,
píra ŋáà nī wè muɔ 'ki kpíʔile muɔ kòridiʔɛ.
20 Kpuʔɔrɔ 'yɛli de tari weli Kàfɔli nɛ̄ wè cɛngɛ ó cɛngɛ,
wire ŋáà wiī nɛ weli fùrɔgɔ turu gès.
Kulocɛliɛ wire wī weli suɔfɔli wè. Ye‑ ŋɔ́ cɛ̀.
21 Kire Kulocɛliɛ wiī nɛ weli suu wī;
Kàfɔli Yewe, weli Kulocɛliɛ,
wire wiī nɛ weli píle nɛ suu kùu mɛ́ wè.
22 ʔaan, Kulocɛliɛ wiī nɛ wi leguulo nyùyɔ muʔɔrɔ yè,
bàli pe nyùyɔ yiī tuɔyɔ yè, á peli nɛ waa yiʔɛmɛ pe kolimɔ nī bè.
23 Kàfɔli wi 'juu nɛ́ jo:
«M'bé mi leguulo kɔ́ri bèle bè yige Basan kùlo mɛ́ lèt,
bè pe kɔli bè yige kuʔɔjii wi táanmɛ gè,
24 kire ga buu yeli bálì bīɛlɛ mi siɛnnɛ bèle,
yeli gbɛ̀ tɔliyɔ le yè pe sìsiɛn nī gè,
dí yeli pɔ̀nminɔ pe sí pe liɛlɛ taa lè leguulo nī bèle.»
25 Kulocɛliɛ yo, muɔ pɛngɛnmɛ pi nyɛ́nì nyaa,
mi Kulocɛliɛ pɛngɛnmɛ bè, mi Kùlofɔli wè,
wi saawalidɛngɛgɛ nī gè.
26 Ŋúnuŋuminɔ piyē yiʔɛ mɛ́,
siɛnnɛ bálì piyē nɛ yakpuɔnrɔ kpúɔn dè peli sí yē kàduʔu mɛ́,
nɛ́ sinborilo ní bèle bàli pe pìnbigele kpúɔn gèleu.
27 A pe sí nɛ ŋú nɛ́ jov:
«Yeri kpuʔɔrɔ tari dè Kulocɛliɛ nɛ̄ yeli gbuʔulo nī gèle,
yeri kpuʔɔrɔ tari dè Yewe nɛ̄, yeli bálì bīɛlɛ Isirayɛli siimɛ bè.»
28 Bɛnzamɛ n'ŋɛ, ŋàa wī Isirayɛli pìsɛnwɛ wè,
wire wi 'pe yiʔɛ kíni gèw;
Zuda kàfɔlilɔ m'bɛlɛ nɛ́ pe gbokpuɔlɔ ní lè,
nɛ́ Zabulɔn kàfɔlilɔ ní bèle, nɛ́ Nafitali kàfɔlilɔ ní bèlex.
29 Isirayɛli yo,
muɔ Kulocɛliɛ wi 'ki juu nɛ̀ gbɛ̀ngɛ nɛ́ jo muɔ bé ŋɔri taa.
Kulocɛliɛ yo, muɔ ŋáà ma weli sáʔa wè,
‑muɔ ŋɔri tìɛ dè !
30 Bè muɔ yaʔa baa muɔ Gbùʔɔrɔsaʔa nī gè, gàa gī Zerizalɛmi kàʔa naamɛ gè,
tiʔɛ gíì nī kùlofɔlilɔ pe báan nɛ pe kpuʔɔrɔ yɛrɛ kanʔa dè,
31 ‑muɔ kapiɛngbuɔn kòkuulo wáa lè nyàʔayɛgɛ kúrugu gè
gàa gī nyàʔanivɛgɛ tiire nī dèy,
nɛ́ kùlogolo nɛ̄ gèle gàli ke 'gbuʔulo gèle,
majo nɛ̀piʔɛlɛ gboli nī, nàa nɛ̀piɛlirigele nɛ ke yiʔɛ kíni gè,
fúɔ bè taa kùlogolo siɛnnɛ pe pa pìye cɛ́rigɛ
bé sí de muɔ sàrí, Kulocɛliɛ, nɛ́ pe walifiiwe walikpeye ní yè.
‑Kùlogolo cɛrigɛ gèle, gàli gīɛlɛ kapiɛnnɛ ni 'ke dɛ́ni gèle !
32 Tundunminɔz pe 'kɔ́n Ezipiti kùlo mɛ́ lè.
Kusi kùloa ni 'kiyɛ sáʔa yè, níɛ fé nɛ báan Kulocɛliɛ mɛ́ wè.
33 Dàala kùlofɔliyɔ, yeri ŋú Kulocɛliɛ mɛ́ wè !
Yeri yakpuɔnrɔ kpúɔn dè Kàfɔli mɛ́ wè ! Ye‑ ŋɔ́ cɛ̀.
34 Yeri ŋú wi mɛ́ ŋàa wi tɛ̀ní nyìʔɛnɛ nɛ̄ lè majo sunʔɔ gī,
nyìʔɛnɛ náà ni 'tíi nɛ̀ faan faʔa faʔa gè.
N'ŋɛ, wi yékpogbuɔlɔ niī nɛ kpɛ̀ní nɛ́ fànʔa ní !
35 Yeri ki jáari ye jo Kulocɛliɛ wiī nɛ́ ŋɔri ní !
Wi kpuɔmɔ pi yē Isirayɛli siɛnnɛ nɛ̄ bèle,
wi fànʔa kiī nɛ nyaʔa nyìʔɛnɛ nī lè.
36 Muɔ wè, Kulocɛliɛ, muɔ yē fíɛrɛ wuu
a muɔ 'yiri muɔ saawalidɛngɛgɛ nī gè.
Isirayɛliyé Kulocɛliɛ wire wi fànʔa nɛ́ ŋɔri kanʔa siɛnnɛ mɛ́ bèle.
Kulocɛliɛ wi 'yɛli nɛ́ kpuʔɔrɔ ní !