Kulocɛliɛ, muɔ láa yē mi nɛ̄ bɛ̀ luʔɔwuʔɔ tíɛlɛ
63
1 Dawuda ŋúnudanʔa gī gàa pe ŋú nɛ́ yakpuɔnrɔ ní dè. Lɛ̀lɛ líì nī wi 'puu Zuda waama kùlo nī lèa.
2 Cí ! Kulocɛliɛ yo, muɔ yē mi Kulocɛliɛ !
Muɔ wī mi nɛ caa, muɔ láa kiī mi nɛ̄ bɛ̀ luʔɔwuʔɔ tíɛlɛ.
Mi céri tiī nɛ ŋàʔana muɔ kúrugu waama kùlo nī lè
nàa ni 'fùrɔ lè, luʔɔ fùn wè.
3 ʔaan, bɛ̀ ki yē mi nyɛ́nì muɔ nyaa saawalidɛngɛgɛ nī gè,
kire tiʔɛ nī gè mi nyɛ́nì muɔ ŋɔri nɛ́ muɔ kpuɔmɔ nyaa bè.
4 Mi nyuɔ ki béri muɔ gbùʔɔrɔ́
nɛ́ ki cɛ́n muɔ bànguɔ dɛ́nigɛ ki 'pɔ́ri sìi nɛ̄ wè.
5 Kire nɛ̄ m'béri kpuʔɔrɔ tari dè muɔ nɛ̄ mi sìi cɛnyɛ yi mìɛni nī,
béri mi kiyɛ yɛ̀gí yè naamɛ a mi nɛ náari muɔ míʔɛ nɛ̄ gè.
6 Mi fungo ki nyɛ́nì tín majo bɛ̀ mi cî sùnmɔ kaacɛ̀nrɛ káa dè.
Mi béri fundaanra yékpuʔulo wáari gèle;
mi nyuɔ ki sí de ŋúnuyɔ ŋú yè muɔ mɛ́.
7 Bè mi yaʔa sínɛwɛ mi yasinɛgɛ nɛ̄ gè,
mi nìɛ sɔ̀ngí nɛ taʔa muɔ wuʔu nɛ̄ gè,
pìlige ki mìɛni nī gè, mi nìɛ sɔ̀ngí súuri nɛ́ muɔ ní.
8 Bɛ̀ muɔ yē mi sáʔafɔli wè,
mi béri fundaanra yékpuʔulo wáari muɔ fíkɛnyɛ nyúmɔ nī bèb.
9 Mi fungo ki nyɛ́nì kìi sɔ́migɔ nɛ̀ puɔ muɔ nɛ̄c;
muɔ kàliige kɔli kiī nɛ mi cògí nɛ yérigi.
10 Nɛ̀ ki yaʔa bàli pe 'caa bè mi sìi cúʔɔ wè,
peli bé cùungu bè jíin dàala laamɛ nī bè píri !
11 Kapiɛngbuɔn ŋɔsii wi bé peli kpúu; nyàʔapɔnminɔ bé pe káa.
12 Nɛ̀ ki yaʔa kùlofɔli wire béri fundaanra kpínʔini Kulocɛliɛ nī wè.
A siɛn ó siɛn 'kàli Kulocɛliɛ míʔɛ nɛ̄ gè, kire siɛn wi béri muguri,
nɛ́ ki cɛ́n káfinɛvinɛnɛ pe nyuɔyɔ yi bága tɔ́n.