Kulocɛliɛ wī mi sáʔafɔli wè
54
1 Ŋúnuŋuminɔ yiɛginiwɛ wuʔu gī. Dawuda sícilimɛ ŋúnugoa gī, gàa pe ŋú nɛ́ gɔrilɔ ní bèle.2 Lɛ̀lɛ líì nī Zifii kàʔa wuulob pe pɛ́nì ki juu Sawuli mɛ́ nɛ́ jo: «Dawuda wiī baa làriwɛ weli sunʔɔmɔ nī bè.»
3 Kulocɛliɛ yo, ‑mi suɔ muɔ míʔɛ kire kɛnmɛ nɛ̄ !
Muɔ fànʔa ní gè, ‑tànʔa kɛn m'mɛ́ !
4 Kulocɛliɛ yo, ‑mi náarigɛ lúʔu gè,
ma líiye cáan mi nyasiɛnrɛ mɛ́ dè.
5 Nɛ́ ki cɛ́n nabɔnminɔ pe 'yɛ̀ mi kúrugu,
fungbɛnyɛfɔlilɔc bálì pe 'caa bè mi kpúu wèd.
Pe wè nɛ tɔ́ri nɛ́ muɔ Kulocɛliɛ níʔ. Ye‑ ŋɔ́ cɛ̀.
6 Nɛ̀ ki yaʔa, Kulocɛliɛ wī mi sáʔafɔli wè;
mi Kàfɔli wire wi ŋɔri nyɔ́gi dè mi nīe.
7 Ki 'yɛli wuʔɔgɔ‑ ki tuu bàli nɛ̄ pe 'mi palilɛ wè !
‑Muɔ kányiʔɛ kaala tìɛ lè mi nɛ̄; ma sí pe cúʔɔ péwu !
8 Mi béri kinɛdɛnigɛ yakɔnrɔ kanʔa dè muɔ mɛ́f.
Mi béri muɔ míʔɛ kpóri gè, Yewe, nɛ́ ki cɛ́n muɔ nyɛ́nì nyuɔ.
9 Muɔ 'mi suɔ funbiɛnrɛ ti mìɛni mɛ́.
Kire nɛ̄ a mi 'mi leguulo tuugɛnmɛ nyaa bè, nyapile nɛ̄.