Káfinɛrɛfɔli wi bé cúʔɔ bè yige baa
52
1 Ŋúnuŋuminɔ yiɛginiwɛ wuʔu gī. Dawuda sícilimɛ ŋúnugo gīa,2 gàa wi 'kún gè lɛ̀lɛ líì nī Dowegi, Edɔmiyé wuu wè, wi 'ki juu kùlofɔli Sawuli mɛ́ wè nɛ́ jo Dawuda 'jíin Akimɛlɛki saʔa nī gèb.
3 Muɔ ŋáà wī nàgalirige gè, gáa nɛ̄ muɔ nɛ mìɛ kpóri nɛ́ muɔ funbinʔɛ ní gè ?
‑Ki wéli: Kulocɛliɛ wi bànguɔ dɛ́nigɛ kiī nɛ mɔgi súuri.
4 Muɔ nɛ tɛ̀ní nɛ sɔ̀ngí cúʔɔmɔ báà muɔ bé kpíʔile bè,
muɔ ŋáà ma siɛnnɛ fáanni bèle,
muɔ nyinɛ niī nɛ kɔnigi bɛ̀ gbàrifiɛ tíɛlɛ ŋàa pe 'juɔ wè.
5 Kapiile ni 'muɔ dɛ́ni nɛ̀ tóri kacɛ̀ngɛ nɛ̄ gè,
nɛ́ káfinɛrɛ ti 'muɔ dɛ́ni nɛ̀ tóri kányiʔɛ nɛ̄ gè. Ye‑ ŋɔ́ cɛ̀.
6 Káfinɛrɛ nyinɛ muɔ wè,
siɛnrɛ ti 'muɔ dɛ́ni dàa ti siɛn córi dè.
7 Kire nɛ̄ Kulocɛliɛ wire tíimɛ wi bé muɔ cúʔɔ péwu bè yige baa,
wi bé muɔ cò bè muɔ píle gɔ́ligi muɔ kòridiʔɛ nī gè,
wi bé muɔ nìre kɔ́ligi dè bè yige sìifɔlilɔ kùlo nī lè. Ye‑ ŋɔ́ cɛ̀.
8 Siɛnsinminɛ pe bé ki nyaa;
pe béri fìʔɛ́ bèri nyu de cúuru béri káfinɛrɛfɔli tíʔɛ wè.
9 Pe béri ki nyu bé jo: «Ki n'gɛ, nàgalirige gè,
wire ŋáà wiì cé wìi yaʔa Kulocɛliɛ kiyɛ nī yèʔ wi‑ kò wire làridiʔɛ bɛ̀ gunliriye tíɛlɛ yèʔ.
Nɛ̀ ki yaʔa wi yé wi sɔ̀ngirɔ taʔa dè wi lɔriniʔɛrɛ nɛ̄ dè,
wi yé tɛ́ngɛ ki nɛ̄ dí wire sícilibiʔi ki bé nyuɔ.»
10 Mi wè, mi yē bɛ̀ wolivi tiige tíɛlɛ
gàa ki yúʔɔri gè Kulocɛliɛ kpáa nī gè.
Mi 'mi sɔ̀ngirɔ taʔa dè Kulocɛliɛ bànguɔ dɛ́nigɛ nɛ̄ gè
súuri lɛ̀lɛ ó lɛ̀lɛ nī.
11 Kulocɛliɛ yoc, mi béri muɔ síɛri lɛ̀lɛ ó lɛ̀lɛ nī gàa muɔ 'kpíʔile gè.
M'bé mìɛ yaʔa muɔ kiyɛ nī yè,
nɛ́ ki cɛ́n, siɛnnɛ bálì pe 'pìye puɔ muɔ nɛ̄ bèle,
muɔ nyɛ́nì nyuɔ pe kɔli mɛ́ gè.