Kulocɛliɛ yo, muɔ 'cíi weli nɛ̄ wī lé ?
44
1 Ŋúnuŋuminɔ yiɛginiwɛ wuʔu gī. Kore jaalaa sícilimɛ ŋúnugo gīb.
2 Kulocɛliɛ yo, weli nyɛ́nì ti lúʔu weli tíimɛ ngbúʔulo nī gèle
dàa weli tobilo pe yé juu nɛ̀ tìɛ weli nɛ̄ dè, pe lɛ̀lɛ wori dè, faʔa faʔa gè.
3 Muɔ tíimɛ yé muɔ kɔli sáʔa gè nɛ̀ kùlogolo siɛnnɛ cìra bèle nɛ̀ yige nɛ́ weli tobilo tɛ́ngɛ bèle baac,
muɔ 'kùlogolo siɛnfeliye kpúɔn yè nɛ̀ núgo baa nɛ̀ tiʔɛ kɛn gè muɔ siɛnnɛ mɛ́ bèle.
4 Pe kapiɛngbuɔn ŋɔsiile ní bɛ̀ʔ pe 'kùlo taa lèʔ,
pe kiyɛ yire ní bɛ̀ʔ pe 'fànʔa taa nɛ̀ pe jáaʔ.
Muɔ tíimɛ kàliige kɔli gī nɛ́ muɔ ŋɔri kɔli ní,
nɛ́ muɔ funjɛ̀ngɛ ní gè muɔ ki 'kpíʔile
nɛ́ ki cɛ́n pe yé muɔ dɛ́ni wīd.
5 Kulocɛliɛ yo, muɔ yē mi Kàfɔli wī.
Ma Yakuba siimɛ suɔlɔ wuʔu juu gè ma gbɛ̀ngɛ !
6 Muɔ ŋɔri ní dè, weli bé weli parifɔlilɔ círi bèle nɛ́ nyɛgɛlɛ ní gèle;
muɔ míʔɛ ní gè, weli bé pe tánʔana bàli pe yɛ̀gí weli kúrugu bèlee.
7 Mi wè nɛ mi sɔ̀ngirɔ tari dè mi sandali nɛ̄ wèʔ;
mi kapiɛngbuɔn ŋɔnɔ lire bɛ̀ʔ ni bé mi suɔʔ.
8 Nɛ́ ki cɛ́n muɔ ma weli suu weli parifɔlilɔ mɛ́ bèle,
níɛ fìɛrɛ wáari pe nɛ̄ bàli weli 'biɛn bèle.
9 Weli nɛ wìye nyíɛnɛ cɛngɛ ó cɛngɛ nɛ́ Kulocɛliɛ ní wè,
weli béri muɔ míʔɛ kpóri gè lɛ̀lɛ ó lɛ̀lɛ ní. Ye‑ ŋɔ́ cɛ̀.
10 Nɛ̀ ki yaʔa muɔ yé weli wáa nɛ̀ fìɛrɛ tɔ́n weli nɛ̄,
muɔ sì yé puu nɛ waa nɛ́ weli kapiɛngbuɔnnɔ ní bèle
kapiɛnnɛ mɛ́ lèʔ.
11 Muɔ 'ki yaʔa a weli 'koli nɛ̀ fɛ̀ weli parifɔlilɔ yiʔɛ mɛ́ gè,
a muɔ 'ki yaʔa bàli weli 'biɛn bèle a pe 'weli lɔri líɛ dè.
12 Muɔ 'weli yaʔa pe kiyɛ nī majo sìnbaara dī dàa pe káa dè,
á muɔ 'weli cɛrigɛ kùlogolo sunʔɔmɔ nī bèf.
13 Muɔ 'muɔ siɛnnɛ pári bèle waʔanɛ,
muɔ sì tɔ̀ni taa pe nīʔg.
14 A muɔ 'ki yaʔa weli‑ kò kátaanra weli tɛ́ninyɛninɛ mɛ́ bèle;
bàli pe 'weli màʔa nɛ̀ suʔu bèle, a pe 'weli gbèli níɛ weli tíʔɛ.
15 Muɔ 'ki yaʔa kùlogolo siɛnnɛ pe kàsiʔile wáari weli wuʔu nɛ̄ gè,
níɛ nyùyɔ fíigi yè weli wori nɛ̄ dèh.
16 Cɛngɛ ó cɛngɛ, mi faʔama piī mi yiʔɛ mɛ́ gè,
fìɛrɛ nɛ tɔ́ngi mi yiʔɛ nɛ̄ gè nɛ̀ pínɛ,
17 a mi gbɛ̀ni mi leguuwo siɛnrɛ lúʔu dè, dàa ti fuʔɔtɔn wuʔu nyu gè;
wi nìɛ mi sɔ́ninɔ níɛ̀ nɛ mi teri.
18 Dàa ti mìɛni nɛ nɔ̀gí weli nɛ̄, nɛ̀ ki yaʔa weli sì fìʔɛ nɛ́ muɔ níʔ,
nɛ́ míɛni weli sì muɔ nyakungɛngɛ cúʔɔ gèʔ.
19 Weli sɔ̀ngirɔ tiì kɛ́nì láʔa muɔ nɛ̄ʔ,
weli tɔliyɔ yiì pɔ̀li nɛ̀ líili muɔ koligo nɛ̄ gèʔ.
20 Kire nɛ́ ki mìɛni a muɔ 'weli muʔɔrɔ nɛ́ weli kùlo yaʔa lè a ni 'kò nyàʔapɔnminɔ woli,
a muɔ 'weli tɔ́n nɛ́ yebiliwuɔlɔ ní lè.
21 A ki yē weli yé fìʔɛ nɛ́ weli Kulocɛliɛ ní wè,
a weli yé kiyɛ sáʔala yè kùlo láà kulocɛliɛ mɛ́ wè,
22 Kulocɛliɛ wiǐ cî ki nyaa lé bè ki cɛ́nʔ,
wire ŋáà wi 'siɛn fungo kalarigɛlɛ cɛ́n gèle ?
23 Nɛ̀ ki yaʔa muɔ kɛnmɛ nɛ̄ piyē nɛ weli kpúu cɛngɛ ó cɛngɛ,
piyē nɛ weli nyaʔa majo sìnbaara dī
dàa pe kɔ́ri nɛ waa kaakpuudiʔɛ nī gèi.
24 Ma yɛ̀, mi Kàfɔli ! Gáa nɛ̄ muɔ nɛ ŋɔ́ni ?
Ma yɛ̀ ! Fǎga weli wáa súuriʔ !
25 Gáa nɛ̄ muɔ 'yiʔɛ làrigɛ gè ?
Gáa nɛ̄ muɔ 'fìʔɛ nɛ́ weli yawuɔrɔ ní dè nɛ́ weli fùrɔgɔ ní gè ?
26 Pe nyɛ́nì weli cáan cúbugo nī gè,
a weli liyɛ yi 'dàala seri lè.
27 Ma yɛ̀ fáari ! Ma weli sáʔa !
‑Weli fùgu ma suɔ muɔ bànguɔ dɛ́nigɛ kire kɛnmɛ nɛ̄ bè !