Weli sìi wi wè nɛ mɔgiʔ
39
1 Ŋúnuŋuminɔ yiɛginiwɛ Yedutuna wuʔu gī. Dawuda ŋúnudanʔa gī gàa pe ŋú nɛ́ yakpuɔnrɔ ní dè.
2 Mi 'ki nyíɛnɛ nɛ̀ kɔ̀n bè mìɛ cò mi tánʔagɛnmɛ nī bè,
kire ga buu mi fǎga kapiʔi kpíʔile nɛ́ mi nyinɛ ní lèʔ.
M'bé kò de mi nyuɔ puu gè de tɔ́ngi nɛ́ jùɔ ní
lɛ̀lɛ líì nī siɛnpiiwe wiī mi táanni wè.
3 Mi sí kò bobogo, miì yakaa juuʔ.
Mi 'kò pìiriwe píaab, a mi laamɛ pi 'piɛn nɛ̀ tóri,
4 a mi fungo ki 'tanʔana mi sìndinge nī gè.
Bà mi 'puu nɛ sɔ̀ngí wè, kàsun ki 'nyì, a kire 'ki yaʔa a mi kɛ́nì juu:
5 Yewe yo, ‑ki yaʔa mi‑ mi sìi wi kúɔgɛnmɛ cɛ́n bè,
nɛ́ cɛnyɛ jori yi 'kò mi sìi nī wè,
kire ga buu mi‑ ki cɛ́n kɛnmɛ bíì nɛ̄ mi wè yafiɛnʔ.
6 Ki n'gɛ muɔ 'mi cɛnyɛ kɛn yè cɛ̀ri bɛ̀ kadaala tíɛlɛ,
mi mɔgɔgɛnmɛ pi wè yafiɛn muɔ yiʔɛ mɛ́ gèʔ.
ʔaan, siɛn ó siɛn wi 'yɛ̀ nɛ̀ yéri wè, wiī bɛ̀ ŋɔ́gari tíɛlɛ ! Ye‑ ŋɔ́ cɛ̀.
7 Wiī nɛ waa níɛ báan bɛ̀ nyúmɔ tíɛlɛ,
wi fíigi nɛ mári bɛ̀ ŋɔ́nɔ tíɛlɛ.
Wiī nɛ lɔri caa nɛ ti gbunʔuni;
wiì sí ki cɛ́n ŋàa wi bága ti koli dèʔ.
8 Kire nɛ̄, mi Kàfɔli, gáa m'bé ní de siri ?
Mi sɔ̀ngirɔ ti mìɛni yē muɔ nɛ̄ !
9 ‑Mi cò ma yige mi tuudiʔɛlɛ ke mìɛni nī gèle;
fǎga mi yaʔa kàalafɔli wi‑ mi tíʔɛʔ !
10 Bɛ̀ ki 'nyaa muɔ ma 'ki kpíʔile gè,
mi bé kò bobogo, mi sì ní yakaa juuʔ.
11 ‑Muɔ kagbɛngɛ láʔa gè mi nɛ̄ !
Muɔ kɔli kaguruyo yire kɛnmɛ nɛ̄, mi 'cúʔɔ nɛ̀ kúɔ !
12 Muɔ nɛ siɛn kpúɔn wè wi kolimɔ kɛnmɛ nɛ̄ bè;
bɛ̀ màrigbuu tíɛlɛ wè muɔ nɛ ki mugu yɛgɛ gáà ki 'siɛn dɛ́ni wè kpuʔɔ gè.
ʔaan, siɛn ó siɛn yē bɛ̀ ŋɔ́nɔ tíɛlɛ. Ye‑ ŋɔ́ cɛ̀.
13 Yewe yo, ‑mi náarigɛ lúʔu gè, má líiye cáan mi kòkuulo mɛ́ lè má sí mi suɔ !
Fǎga ki kpíʔile majo muɔ sì mi yéturo nyaa dèʔ !
Nɛ́ ki cɛ́n mi yē nabɔnwɔ wī níɛ tòrí muɔ tiʔɛ nī gè bɛ̀ mi tuuliɛyɛ yi mìɛni tíɛlɛ yè.
14 Fǎga ní de mi wéli bè mi wuʔɔʔ; ‑muɔ yiʔɛ láʔa gè mi nɛ̄,
kire ga buu mi ní gbɛ̀ tíʔɛ cígini sɛ́ni mi kári wè, mi sǐ ní ga buu bileʔ.