Yewe yékpoli niī nɛ́ ŋɔri ní
29
1 Dawuda ŋúnudanʔa gī gàa pe ŋú nɛ́ yakpuɔnrɔ ní dè.
Yeri Yewe tòbiló wè kɛnmɛ bíì nɛ̄ wi yē wè,
yeli bálì bīɛlɛ nyìʔɛnɛ fànʔafɔlilɔ bèlea !
Ye‑ Yewe kpuɔmɔ nɛ́ wi ŋɔri tòbilo dè !
2 Ye‑ wi míʔɛ kpúʔɔgɛnmɛ tòbilo bè !
Ye‑ tuu ye cúbulo yé Yewe gbùʔɔrɔ wè,
wire ŋáà wī Tiɛlɛfun Kulocɛliɛ níɛ nyíʔɛnɛ wèb.
3 Yewe wire yékpoli ni lúru nɛ tòrí luɔyɔ tùnmɔ nɛ̄ bè.
Kpuɔmɔ Kulocɛliɛ wi yékpoli ni 'kpɛ̀ni,
Yewe ŋáà wī kuʔɔjii luɔyɔ naamɛ gè.
4 Yewe yékpoli niī nɛ tùngú nɛ́ ŋɔri ní,
Yewe kpuɔmɔ yékpoli niī nɛ tùngú.
5 Yewe yékpoli niī nɛ sɛdiri tiikpaʔaliyɛc kabari yè;
Yewe wiī nɛ Liban kùlo sɛdiri tiikpaʔaliyɛ kabari yè.
6 Wiī nɛ ki kpínʔini Liban nyaguruyo yi nìɛ yogi bɛ̀ nɛ̀naaya tíɛlɛ;
wiī nɛ ki kpínʔini Siriyɔn nyagurugodki nìɛ yogi
bɛ̀ nyàʔanuɔ nɛ̀naʔa tíɛlɛ.
7 Yewe yékpoli niī nɛ kàsun dìsaanna tìrigí.
8 Yewe yékpoli niī nɛ waama kùlo cúungu lè.
Yewe wiī nɛ Kadɛsi waama kùlo cúungu lè.
9 Yewe yékpoli niī nɛ ki kpínʔini sɔ̀bilɔ pe nɛ̂ siie.
Niī nɛ ki kpínʔini kákpuɔ wɛrɛ ti mìɛni nɛ celile nɛ tíri.
Bàli bīɛlɛ baa wi nàkpanʔa nī gè,
pe mìɛni 'yékpuʔulo wáa nɛ́ jo: «We‑ wi kpúʔɔ!
10 Wiī baa tɛ́niwɛ wi kùlofɔlilɔ kácunʔɔ nɛ̄ gè kàsakpiile nyùgo nɛ̄ gè;
Yewe wiī tɛ́niwɛ kùlofɔligɔ nɛ̄ gè lɛ̀lɛ ó lɛ̀lɛ.»
11 Yewe béri ŋɔri kanʔa dè wi siɛnnɛ mɛ́ bèle.
Yewe béri diba tari wè wi siɛnnɛ nɛ̄ bèle bè yanyige kɛn.