Kpuʔɔrɔ Kùlofɔli wiī nɛ jiin
24
1 Dawuda ŋúnudanʔa gī gàa pe ŋú nɛ́ yakpuɔnrɔ ní dè.
Yewe mɛ́ duniya wi mìɛni yē, nɛ́ wi laamɛ yɛrɛ ní dè,
dàala lè nɛ́ ni tɛ́nivɔlilɔ ní bèlea.
2 Nɛ́ ki cɛ́n wire wi 'dàala kàkpuɔnnɔ cɔ́ri bèle lakpoliyo naamɛ gè,
lakpoliyo nyáà yī baa dàala láara lè;
wi 'dàala sɔ́migɔ lè nɛ̀ yérige lakoliyo nɛ̄ yè.
3 Ŋáa wi bé jáa bè tánʔa Yewe nyagurugo nɛ̄ gè ?
Ŋáa wi bé jáa bè yéri wi saawalidɛngɛgɛ nī gè ?
4 Ŋàa kiyɛ yiì núʔɔ yèʔ, á wi ní funviige ní gè,
ŋàa wi wè tári káfinɛrɛ nɛ̄ dèʔ,
nɛ́ míɛni wi wè nɛ kàlí bè siɛn fáanniʔ.
5 Yewe bé diba taʔa wè kire siɛn nɛ̄ wè;
wi suɔfɔli Kulocɛliɛ wi bé tànʔa kɛn wi mɛ́.
6 Kire kɛ̀nnɛ gboli ni yē,
bàli pe 'pìye puɔ muɔ nɛ̄ bèle níɛ muɔ yiʔɛ caa gè,
peli bīɛlɛ Yakuba narigɛ gè kányiʔɛ nɛ̄b ! Ye‑ ŋɔ́ cɛ̀.
7 Nàkpaanwiʔilec, ye‑ gbòbori, ye‑ nyùyɔ yɛ̀gɛ yè !
Bànguɔ kɔ̀riyɔ, ye‑ múgu !
Ye‑ tí Kpuʔɔrɔ Kùlofɔli wi‑ jíin !
8 Ŋáa sí wī kire Kpuʔɔrɔ Kùlofɔli wè ?
Yewe wī, ŋɔrifɔli wè nɛ́ ní nàgalirige gè,
Yewe wè, nàgalirige gè kapiɛnnɛ nī lè !
9 Nàkpaanwiʔile, ye‑ gbòbori, ye‑ nyùyɔ yɛ̀gɛ yè !
Bànguɔ kɔ̀riyɔ, ye‑ múgu !
Ye‑ tí Kpuɔmɔ Kùlofɔli wi‑ jíin !
10 Ŋáa sí wī kire Kpuɔmɔ Kùlofɔli wè ?
Yewe ŋáà wī Nyìʔɛnɛ Kapiɛngbuɔnnɔ Kàfɔli wè,
wire wī Kpuɔmɔ Kùlofɔli wè.
Ye‑ ŋɔ́ cɛ̀.