Nicii, Yewe, muɔ ŋáà wī mi suɔfɔli wè
18
1 Ŋúnuŋuminɔ yiɛginiwɛ wuʔu gī. Yewe wi baakuɔwɔ Dawuda wuʔu gī. Wi 'ki ŋúnugo siɛnrɛ juu dè nɛ̀ kɛn Yewe mɛ́ lɛ̀lɛ líì nī Yewe 'wi cò nɛ̀ suɔ wi leguulo pe mìɛni kiyɛ nī yèa, nɛ́ míɛni wi suɔ kùlofɔli Sawuli kiyɛ nī yèb.
2 ʔé, muɔ 'mi dɛ́ni díɛʔ Yewe, muɔ ŋáà wī mi ŋɔri dè !
3 Yewe yē mi kàdɛnigbaala, nɛ́ ní mi làridiʔɛ lìrige gáà gī naamɛ gè,
nɛ́ wire ŋáà wi 'mi píle nɛ̀ suɔ wè.
Mi Kulocɛliɛ wi yē mi kàdɛnigbaala lè nàa nɛ̄ mi 'líʔire jó dè.
Wiī mi timɔzigege, wi yē mi suɔfɔli ŋàa wī ŋɔri ní dè,
nɛ́ ní mi líʔirejodiʔɛ.
4 Mi 'kòkuulo wáa lè Yewe mɛ́c, wire ŋáà wi 'yɛli nɛ́ kpuʔɔrɔ ní dè,
a wi 'mi suɔ mi leguulo mɛ́ bèle.
5 Kùu fétire ti yé mi màʔa nɛ̀ suʔu;
lakolinyiye nyáà yi cúʔɔmɔ kpínʔini bè, yi 'fíɛgbuɔrɔ wáa mi nɛ̄.
6 ʔaan, kusiʔi ki yé mi puɔ nɛ́ ki fétire ní dè,
kùu gárigɛ ki yé koli nɛ̀ mi cò.
7 A mi 'Yewe yeri wè lɛ̀lɛ líì nī mi funbiɛnrɛ ti 'mi cɔ̀ri dè.
A mi 'kòkuulo wáa Kulocɛliɛ mɛ́ wè, wi‑ mi suɔ.
A mi kòkuulo ni 'jíin wi ngbúʔulo nī gèle.
Baa wi nàkpaanjɛngɛ nī gè, a wi 'mi yékpoli lúʔu lè.
8 Dàala ni 'fiɛ nɛ̀ yɛ̀ nɛ fún nɛ yàʔará,
a nyaguruyo kàkpuɔnnɔ pe 'yúgɔrɔ,
a yi mìɛni 'yɛ̀ nɛ cúungu wi fundanʔanigɛ kire kɛnmɛ nɛ̄.
9 A wírige 'yɛ̀ nɛ yigi wi fínaʔana nī gèle,
a yɛrɛsorigo kàsun 'yiri wi nyuɔ nī gè,
nɛ̀ pínɛ kàsunnɛgaanyiʔɛnɛ 'fuu nɛ̀ yiri ki nī.
10 Wi cé nyìʔɛnɛ múgu lè nɛ́ tìgi,
á kàsadibagɛ wuʔɔ dɛ́ndɛn ní wi tɔliyɔ láara yè.
11 Wi yé tánʔa nɛ̀ tɛ́ni seribɛnd wáà nɛ̄,
á wiī nɛ fini nɛ waa nɛ́ wi ní káfaligɛ nī gè.
12 Wi nyɛ́nì wìi mígele yebilige nī gè nɛ̀ wìi làrigɛ,
a wi 'wi kpátaʔa kpíʔile gè nɛ̀ ki tíʔɛ nɛ̀ wìi tɔ́n
nɛ́ kàsadibagɛ ní gè gàa nī kàsaʔa ki yē gè,
kàsadibarɛ dáà ti 'niʔɛ nɛ́ wúɔ dɛ́ndɛn dè.
13 Kpìɛnmɛ báà pi nyíʔɛnɛ bè,
pire 'puu nɛ yigi wi yiʔɛ mɛ́ gè
nɛ sùurí kàsadibarɛ nī dè,
nɛ́ míɛni kàsasindari nɛ́ kàsunnɛganʔana 'puu nɛ tíri.
14 Yewe 'puu nɛ kpɛ̀ní baa nyìʔɛnɛ nī lè;
Kulocɛliɛ ŋáà wī Duniya wi Mìɛni Nyùgo nɛ̄ gè,
wi yékpoli tùnmɔ pi 'puu nɛ lúru,
nɛ́ kàsasindari nɛ́ kàsunnɛganʔana ní.
15 Wi 'wi ŋaaya ŋɔ yè, a yi sɛ́nì wi leguulo cɛrigɛ bèle,
nɛ́ kàsakpɛnigɛ nìʔɛgɛ ní a ki sɛ́nì pe nyaʔami.
16 Yewe, a muɔ 'yékpogbuɔlɔ wáa,
a muɔ fundanʔanigɛ káfaligboliyo yi 'yiri
nɛ̀ dàala ni kàkpuɔnnɔ pe mìɛni yige bèle kpànʔanɛ,
a lakpoliyo yi táanmɛ pi mìɛni 'yiri a pe 'pi nyaa.
17 A Yewe 'wi kɔli sáʔa gè naamɛ gè nɛ̀ mi cò;
a wi 'mi píle nɛ̀ yige lakoligo sícuugo nī gè.
18 A wi 'mi cò nɛ̀ mi suɔ mi leguu mɛ́ wè, ŋàa wī ŋɔri ní dè,
nɛ́ bàli mi 'biɛn bèle, nɛ́ ki cɛ́n pe ŋɔri ti yé tóri mi ŋɔri nɛ̄ dè.
19 Pe 'tuu mi nɛ̄ yiɛgbɛnrɛ cɛngɛ nī, a Yewe 'mi kpɔni.
20 A wi 'mi líɛ nɛ̀ yige nɛ̀ kɛ́ nɛ́ mi ní larigbuʔɔ káà nī,
a wi pɛ́nì mi sáʔa, nɛ́ ki cɛ́n mi woli ni 'kpúʔɔ wi mɛ́.
21 Yewe nyɛ́nì mi kɛn nɛ̀ yɛli nɛ́ mi sínmɛ ní bè,
wi 'tɔ̀ni kɛn m'mɛ́ nɛ̀ yɛli nɛ́ mi kɔli ki cìilimɛ ní bè.
22 Nɛ́ ki cɛ́n mi nyɛ́nì sín nɛ̀ yɛli nɛ́ Yewe koligo ní gè,
mi sì láʔa mi Kulocɛliɛ nɛ̄ wè nɛ̀ kapiʔi kpíʔileʔ.
23 Wi kàyuʔujuuro ti mìɛni 'puu mi yiʔɛ mɛ́ gè,
mi sì kɛ́nì cíi wi fànʔa kaala láà nɛ̄ʔ.
24 Mi 'puu nɛ́ funviige ní wi yiʔɛ mɛ́ gè,
a mi 'nìɛ cò, mi sì kolimɔ kpíʔileʔ.
25 A Yewe 'tɔ̀ni kɛn m'mɛ́ nɛ̀ yɛli nɛ́ mi sínmɛ ní bè,
nɛ́ míɛni bɛ̀ mi kiyɛ yiī cìiliye wi yiʔɛ mɛ́ gè.
26 Yewe muɔ 'mìɛ tìɛ funjɛ̀ngɛfɔli ŋàa nɛ̄ wi yē funjɛ̀ngɛfɔli wè,
a muɔ 'mìɛ tìɛ funviigefɔli ŋàa nɛ̄ wi yē nɛ́ funviige ní gè.
27 Muɔ 'mìɛ tìɛ cìiliwe ŋàa nɛ̄ wi yē cìiliwe wè,
á muɔ sí mìɛ tìɛ síciliwe ŋàa nɛ̄ wi yē koliwo wè.
28 Siɛnnɛ bálì ní pe wè tɔ́ri bèleʔ, muɔ tíimɛ nɛ báan bè pa pe suɔ,
muɔ nɛ fungboliyofɔlilɔ pe yiɛyɛ cùungú yè.
29 ʔaan, kányiʔɛ nɛ̄, muɔ nɛ mi fètinnɛ cáanri lè,
Yewe mi Kulocɛliɛ wire wi 'kpìɛnmɛ cáanri bè
yebilige nī gè gàa ki 'mi màʔa nɛ̀ suʔu gè.
30 Muɔ kɛnmɛ nɛ̄, Yewe, m'bé gbɛ̀ cáan
nɛ́ kapiɛngbuɔnnɔ gboli ní lè, nàa nī yakpuɔnrɔ ní dè.
Mi Kulocɛliɛ wire fànʔa ní
m'bé gbɛ̀ jáa bè yo bè gunbiige kɛ́ninɛ gè.
31 Kulocɛliɛ wè, wire koligo ki nyɛ́nì sɔ́migɔ nɛ̀ nyuɔ.
Yewe wire siɛnrɛ ti 'sɔ́migɔ nɛ̀ siʔɛ nɛ̀ wéli.
Bàli pe mìɛni pe líʔire jún wi mɛ́ wè, wiī pe timɔzigege.
32 Ŋáa wī Kulocɛliɛ, ka laa Yewe bɛ̀ʔ ?
Ŋáa wī kàdɛnigbaala lè, ka laa weli Kulocɛliɛ wire bɛ̀ʔ ?
33 Wire wī Kulocɛliɛ ŋáà wi ŋɔri kanʔa mi mɛ́ wè,
wiī nɛ mi koligo gbòborí gè ki‑ nyuʔɔ.
34 Wi 'mi kàsɛniyɛ lìri yè bɛ̀ sùɔ tíɛlɛ;
mi de sɔ́migi de tári nyaguruyo nɛ̄ yè naamɛ gè.
35 Wire wi 'mi tɛnmɛ kapiɛnnɛ kpúɔngɛnmɛ nɛ̄ bè,
nɛ́ mi sáʔa mi nɛ kányiɛrɛ sandali ŋɔgi gè.
36 Yewe yo, muɔ nɛ muɔ timɔzigege kanʔa gè m'mɛ́,
timɔzigege gáà ki báan nɛ́ suɔlɔ ní lè;
muɔ kàliige ki 'mi kpɔni.
Bɛ̀ muɔ 'mi sáʔa wè, a mi 'ŋɔri taa.
37 Muɔ 'koligo píɛlɛ gè m'mɛ́; mi tɔliyɔ yi wè nɛ kúrugiʔ.
38 A mi 'taʔa mi leguulo nɛ̄ bèle nɛ̀ pe cìra nɛ̀ cò;
a mi 'pe kpúu sɛ́ni mi 'koli bè pɛn wè.
39 Mi 'pe kpúɔn nɛ̀ muʔɔrɔ, piyě cî ní gbɛ̀ yɛ̀ʔ.
A pe 'tuu mi tɔliyɔ láara yè.
40 Muɔ 'ŋɔri kɛn m'mɛ́ a mi 'kapiɛnnɛ kpúɔn lè,
muɔ 'mi túnvɔlilɔ nyùyɔ cùungu yè.
41 Muɔ 'mi leguulo cìra bèle mi yiʔɛ mɛ́ gè,
a mi 'pe pulɔgɔ, bàli mi 'biɛn bèle.
42 Pe 'kòkuʔulo wáa gèle, siɛn sì pɛ́nì pe suɔʔ.
A pe 'Yewe yeri wè, kire nɛ́ ki mìɛni ní wiì lúʔu pe mɛ́ʔ.
43 Mi 'pe súu a pe 'kò cúbugo, gàa gī káfaligɛ nī gè,
a mi 'pe tánʔana bɛ̀ koligo fàrigɛ tíɛlɛ.
44 Muɔ 'mi píle nɛ̀ suɔ siɛnnɛ pe kàsii mɛ́ wè,
nɛ̀ mi tɛ́ngɛ kùlogolo ke nyùgo nɛ̄ gè.
Kùlo siɛnfelige káà, gàa miì yé kíni nɛ̀ cɛ́n gèʔ,
a ki 'kìi cɛ́rigɛ mi yiʔɛ mɛ́ gè.
45 Bà pe 'puu nɛ mi wori lúru dè, a pe 'lúʔu m'mɛ́;
nabɔnminɔ piyē nɛ fún mi yiʔɛ mɛ́.
46 Nabɔnminɔ pe céri ti 'kùu pe nɛ̄,
piyē nɛ fún fíɛrɛ nɛ̄ dè níɛ yigi pe tiɛliriye nī yè.
47 Yewe yē wiiwe ! Ki 'yɛli mi de wi gbùʔɔrɔ́,
wire ŋáà wī mi kàdɛnigbaala lè.
Ki 'yɛli mi de mi Kulocɛliɛ míʔɛ kpóri gè,
wire ŋáà wī mi suɔfɔli wè.
48 Kulocɛliɛ ŋáà wire wi 'mi fuʔɔ tɔ́n gè;
wire wi nyɛ́ni siɛnnɛ cɛ́rigi bèle m'mɛ́.
49 Yewe yo, muɔ cé mi píle nɛ̀ suɔ mi leguulo mɛ́ bèle,
ʔaan, muɔ 'mi yɛ̀gɛ naamɛ nɛ̀ tóri mi túnvɔlilɔ nɛ̄ bèle,
muɔ pɛ́nì mi cò nɛ̀ mi suɔ nɛ̀mɛfɔlilɔ mɛ́ bèle.
50 Kire kɛnmɛ nɛ̄ m'béri muɔ míʔɛ gbùʔɔrɔ́ gè
kùlogolo kálì siɛnnɛ sunʔɔmɔ nī bè, Yewe !
M'béri muɔ míʔɛ tòbiló gè mi ŋúnuyɔ nī yèe.
51 Wire wiī nɛ kakpoliyo kpínʔini bè kùlofɔli suɔ wè;
wiī nɛ kacɛ̀ngɛ kpínʔini wi mɛ́, ŋàa wi 'nyíɛnɛ nɛ̀ kɔ̀n wè,
Dawuda mɛ́ wè, nɛ́ wi siimɛ ní bè, lɛ̀lɛ ó lɛ̀lɛ nī.