Yuuda 1

Ibalula ya

Yuuda

UYuuda ikivahunjila avahuvililaaji

1 Ibalula iyi yihumile kunyangu one Yuuda, yuna nili muvanda wa Yeesu Kilisito, na nili lukholo lwakwe nu Yaakobo. Nikivayandishila omwe muna mushemeliilwe nu Nguluvi uWiheesu na muna muganiilwe nu mwene, na kiyangalilwa wunofu nu Yeesu Kilisito. 2 UNguluvi avayonjelese ulusungu, uwulindamafu nu lugano kwa winshi.

Avamanyisaaji va wudehi

3 Vagani vangu, nikhayihumiise mandu kiija, nivayandishile ulwa wukulukho wuna wukitulungania lumo woona. Leelo naawona kiija, nisakulwa nivayandishile ibalula iyi, nikivalomba mandu kiija, mulwilanilaje ilihuuvi lina uNguluvi wávapeelaga gwalimo kwa vabaagule vaakwe. 4 Nikivayandishila ibalula iyi, kwa kiiva kuna vaanu vamonga vina vasikimuyinatila uNguluvi, vayiyinjiise kwa wufiho na kiyihansa noomwe. Avaanu awo viijova kiija, hata nda tigahe uwunansi, ulusungu lwa Nguluvi luli lumo noose. Kwa kigaha ndeeno, vikimukhaana uYeesu Kilisito uMulongosaaji uMukhome, uMutwa weesu. Leelo kihuma pawukuulu yiyandiikhwe kiija, avaanu ava vakhahigwa.

5 Hata nda mumeenye wunofu goona aga, nisakula kivakumbusa kiija, uMutwa uNguluvi wáganile kivakulusa aVaisilaheli kihuma mu nyi ya Misili muna vakhandi viilava, paanyuma wávabuda vala vina vakhaanaga kimuhuviilila. 6 Mukumbukhaje, woope avamalayikha vala vina vasikhanojeelwe ni nsengo saanave, vawulekha uwiikhalo waanave, uNguluvi avadindiile ku nshiisi na manyololo ga shiluta. Vahepeleese ilisiku likhome lila ilya wuhiji. 7 Khanji mukumbukhaje kiija, avaanu va majumbi ga ku Sodoma na ga ku Gomola, na vala va majumbi gina gahejeleene, vahwaneene na vamalayikha vala. Avaanu awo vakhandi viigaha uwushemi na kifwata uwupafu uwuvi uwa muvili, wuna wusihwanana na shina vawumbwagwa. UNguluvi wávapeela ululawo lwa kinyaanywa nu mooto gwa shiluta, baheene gave mapavilo kwa vaanu woona.

8 Shiisho ndeeno avamanyisaaji ava vina vasikimuyinatila uNguluvi, vahwaneene nawo. Avamanyisaaji ava viigaha uwunansi, vikiyitanga kiija vawonensewa nu Nguluvi mu malooto kiija vagahaje uwunansi, khanji vinanga amavili gaanave. Vikiwukhaana uwukhome wa Nguluvi na kifiliga ifiwumbwa fya wutupikho fina fikwali kushaanya. 9 Hata woope uMikayeli umalayikha umukhome, pina iposania na kikhaanania nu Shetaani ulwa muvili gwa Musa, asikhajelile kimuhiga uShetaani kwa maligo. Leelo wájovile kiija, “UMutwa uNguluvi yumwene akukhajile!” 10 Leelo avaanu ava vilogola fivi ulwa mola sina vasisimeenye. Viigaha shoshoona ngaja nkhanu sina sisihiiva, kiiva ya wupafu waanave uwuvi wuna wukivalongosa, ago gageene gina gikivabuda.

11 Aka, kwa kiiva viyinatila injendo sa Kayini isa kigaha uwunansi. Vagwiliile mu wunansi wuna uBalaamu wágahaga, kwa kiiva ya wupafu uwa kikwava uwusi. Viibudwa kwa kiiva vikhaana uwutawulilwa ngaja shina uKoola wábudwagwa, kwa kiiva wákhaanaga uwutawulilwa wa Musa. 12 Avaanu awo viwonekha ngaja vanofu, leelo vinanga kihanga kwenyu mu shakiilya isha lugano. Vikiyiyangalila veene, vangaya nsoni. Aveene vali ngaja mafunde gina givevelusiwa ni lipepo, gangaya noonya. Khanji vali ngaja mapishi gina gangaya makhomo uluhaavi lwa nkungulo, gakuliilwe goona, gayuumile. 13 Vigombola kiyisivila ngaja amavingu amakhome ga mu bahali, insengo saanave sihonga insoni. Ngaja nondwe sina siyeleela sina sisikwiliile kilongosa, uNguluvi avavishiile uluvala lwa nshiisi nkhome iya shiluta.

14 UHenoki, shisafi sha fungati kihuma uAdamu wákuwaagwa amalago pa vaanu ava wájovile, “Loleela, uMutwa uNguluvi iyinsa lumo na vamalayikha vaakwe avanofu vinshi mandu, 15 akhavahiga woona na kivatova vina vasikimuhuviilila uNguluvi. Ikivatova kwa ngʼoma saanave sina vagahile kusiina kimugota uNguluvi, lumo na maswi amavi goona gina avanansi ava, vilogola.” 16 Avaanu ava vingʼuula na kilalamikha, viyinatila uwupafu waanave uwuvi. Vikiyisufya mandu na kivasufya mandu avaanu, kiija vayipatile ulutono.

Amapavilo na masimilo

17 Leelo omwe vagani vangu, mukumbukhaje gala gina vajovaga avanandeje va Mutwa weesu uYeesu Kilisito. 18 Vajovaga, “Insiku isa wudugo vakhava vakwali avaanu avanya masalo, vina vakhayinatila uwupafu waanave uwuvi.” 19 Avaanu ava vina vikivahomegania, vihiiva ga mu nyi, vangaya Numbula wa Nguluvi.

20 Leelo omwe vagani vangu, mukhangalaje mu lihuuvi lyenyu lina linofu mandu, khanji lombaji kwa ngufu sa Numbula uMunofu. 21 Muveesaje mukiyisunga mu lugano lwa Nguluvi, uluhaavi luna mumuheepile uMutwa weesu uYeesu Kilisito, kiija avasungupile, baheene avayinjise mu wuumi wa shiluta. 22 Muvasungupilaje avanji vina vana muninu, 23 avanji vakulusaaji kwa nsila ya kivakwepula mu mooto, avanji muvasungupilaje. Leelo muyivavalaje, mukhalalilaje hata amenda gaanave, amanya madeeha ga wupafu waanave uwuvi.

Amafuunyo ga kisufya

24 UNguluvi yumwene munya ngufu ya kivadiima kiija musikhayagaga, na kivaleeta omwe pa wutupikho waakwe uwukhome musiina wuvi, kwa wushendeefu wukhome. 25 Umwene yu Nguluvi mwene duguli, Mukulusaaji weesu kwa nsila ya Yeesu Kilisito, uMutwa weesu. Uwutupikho, uwukhome, ingufu nu wutawulilwa fili nu mwene kihuma pawukuulu, lino na shiluta. Amina.