Ibalula ya wuvili iya
Yohana
UYohana ikivahunjila avahuvililaaji
1
1 Ibalula iyi yihumile kunyangu one Yohana,
yuna nili muyimililaaji wa shipuga sha vahuvililaaji va Yeesu.
Nikikuyandishila owe washimaayi yuna uli mubaagule,
lumo na vanaakho vina nivageene kwa shiyooli.
Nisili yuune duguli yuna nivageene,
leelo na vanji woona vina vashimeenye ishiyooli,
woope vavageene kwa shiyooli.
2 Tivageene kwa kiiva ose noomwe tishimeenye ishiyooli,
khanji tikiyitenekha kimanya ishiyooli shiluta.
3 UNguluvi uWiheesu nu Lusawo lwakwe uYeesu Kilisito,
a vasitupeele imota,
ulusungu nu wulindamafu,
ose vina tiyinatila ishiyooli nu lugano.
Ishiyooli nu lugano
4 Nashendeevaga mandu pina napulikhaga kiija,
avanaakho vamonga viikhala mu shiyooli,
ngaja shina uWiheesu uNguluvi wátulajisaaga.
5 Lino,
owe washimaayi mugani,
mu mayandikhwa aga,
nikikulomba kiija,
uyiyinatilaje indaji yila yina yiijova tigananaje.
Indaji iyo yisili mya,
leelo yiyila yina tikhandi nayo kihuma pina tahuvililaga.b
6 Kiganana kukwene kisiyinatila indaji sa Nguluvi.
Indaji yina mwapulikhaga kihuma pashiyanso,
yiijova mugananaje.
Amapavilo aga vamanyisaaji ava wudehi
7 Nilogola ndeeno kwa kiiva vakwali avajanjilisaaji vinshi mu nyi vina vasiyiitikha kiija,
uYeesu Kilisito wáyinsile wáava nu muvili ngaja muunu.
Umuunu yuna ilogola ndeeno mujanjilisaaji,
khanji mulugu wa Kilisito.
8 Muyivavalaje na vaanu awo,
kiija insengo yeenyu yisilaave yiyaje hela.
Nda vavajanje,
uNguluvi asikhavapeela ilihombo.
9 Umuunu yoyoona yuna iseetusa amamanyiso ga Kilisito,
khanji asikiyitenekha kiyinatila ago gina wámanyisiwa,
uyo asihanjile nu Nguluvi.
Leelo,
yoyoona yuna apiyiteneeshe kiyinatila amamanyiso ga Kilisito,
ahanjile nu Wiheesu uNguluvi nu Lusawo lwakwe.
10 Umuunu nda iyinsa kunyeenyu yuna asimanyisa amamanyiso ga Kilisito,
musikhamusajisaaji mu nanda seenyu,
khanji musikhamuhunjilaji ngaja muhuvililaaji muyeenyu.
11 Yoyoona yuna ikimusaajisa,
iiva lumo nawo mu njendo saakwe imbi sina iigaha.
Inyunjila iya wudugo
12 Nina maswi minshi gina nikhandi nisakula kivayandishila,
leelo nisisakula kigayandikha ago mu likhalatasi nu wiino.
Leelo,
nihuviilila kiyinsa kunyeenyu kivajendela,
kiija tikhatangaane na kilogola lumo,
baheene tikhashendeeva mandu.
13 Avaana va wulumbu waakho umubaagule,
vikikuhunjila.