Yaakobo 2

Musikhavabanililaji avanya wusi

1 Vahuvililaaji vayangu, kwa kiiva mumuhuviliile uMutwa weesu uYeesu Kilisito, uMutwa wa Wutupikho, musikhavabanililaji avaanu vamonga. 2 Tijove umuunu iyinjila mu nanda yeenyu iya kifuunyila, afwalile amenda ga lutono, ni pete ya sahaabu mu ludole, khanji iyinjila umupiina yuna afwele amenda gina gademwishe. 3 Lino omwe, nda mukimuposheela kwa wutupikho yuna afwele amenda amanofu, na kimujova kiija, “Khala apanofu apa,” khanji umupiina yula mukimujova, “Owe, ulute uyiime pala,” awu “Khala pansi apa.” 4 Wuli, kwa kisenga ndeeno, musiiva mukivabaniilila avanji? Musiiva mwalamula kibaagula avatiilwa na vina vasili vatiilwa kwa kiiva ya mahiiva geenyu amavi?

5 Vahuvililaaji vayangu vagani, munipulisaaje wunofu! UNguluvi shi wávahaagula avapiina ava mu nyi, vave vaanu vanya wusi mu lihuuvi mwa Mutwa weesu uYeesu. Ukho kimuhuviilila uYeesu wuweene wusi wa shiyooli. Avaanu awo vaveene uNguluvi avahagwile kiija, vaposheele uWutwa wuna wávatahisisaaga woona vina vamugeene. 6 Leelo, omwe mukivasala avapiina! Wuli, avanya wusi awo vasili vina vikivapinsisa omwe amalava na kivatwala pa vahigaaji? 7 Khanji vikililiga ilitaawa ilinofu ilya Yeesu yuna omwe muli vaanu vaakwe?

8 Indaji ya Mutwa weesu yili ngaja shina siyandiikhwe mu Mayandikhwa aManofu kiija, “Umuganaje umuyaago ngaja shina uyiganile yuuwe.” Nda shiyooli mwisenga ndeeno, musiive mwagaha wunofu. 9 Leelo, nda mupikivabaniilila avaanu vamonga, mushaanali mwikhala mu wunansi. Lulwene indaji sa Nguluvi sipikivahiga omwe kiiva vanansi. 10 Umuunu nda ave ikisiyinatila indaji soona, leelo aleshe kiyinatila yimo, baheene asivasiwe kiija, wágombola kisiyinatila indaji soona. 11 UNguluvi wáviishile indaji yina yiijova, “Usikhawafukhaga,” yumwene yuna wáviishile na yina yiijova, “Usikhabudaga.” Hata nda usikhawafwishe, leelo ubudile, usivasiwe kiija, uli munansi wa ndaji soona.

12 Lino, logolaji na kisenga ngaja vaanu vina vakhahigwa kwa ndaji yina yileeta uwuyeeshelo. 13 Ilisiku lya wuhigo, avaanu vina vasisungupilana, woope vasikhasungupilwa nu Nguluvi. Umuunu nda ikivasungupila avaanu avanji, baheene uNguluvi akhamusungupila woope mu lisiku ilya kihigwa inyi.

Ilihuuvi lumo ni nsengo inofu

14 Vahuvililaaji vayangu, umuunu nda ikiyilogolela kiija ana lihuuvi, kuno asisenga amanofu, lino ilyo liiva lina lutono lushi? Ilihuuvi ngaja ilyo lisikimukulusa. 15 Tije umuhuvililaaji muyeesu, umugoosi awu washimaayi, ave mugaya menda awu shakiilya. 16 Lino umuyeenyu yumonga ikimujovela iija, “Ulute kwa wulindamafu, upate ilifushe na kiyikuta,” leelo aleshe kimutanga kwa gala gina asiina, wuli, ago giiva gana lutono? 17 Shiisho ndeeno, ilihuuvi lyenyu lyene duguli pina lingaya nsengo inofu, liiva lifwile.

18 Leelo umuunu iijova, “Owe una lihuuvi? One nina nsengo inofu. Nisonela shina ungava una lihuuvi ungaya nsengo inofu, na yuune, kwa nsila ya nsengo inofu nisikuwonense ilihuuvi lyangu.” 19 Wuli, owe wihuviilila kiija, uNguluvi ali yumo mwene duguli? Wiigaha lunofu! Goope amalungu gihuviilila na gitetema kwa shitiilo.

20 Owe uli muyasu! Ushaanali upisakula nikuwonense kiija ilihuuvi lina lingaya nsengo nofu, liiva lingaya lutono? 21 UNguluvi wámuvasaaga uwiheesu uAbulahamu kiiva mugolofu, kwa nsengo inofu yina wágahaga. UAbulahamu wámuhumyaga umwanaakwe uIsaaka ave shadanda sha kibudwa pa luvala ulwa kihumisa ishadanda! 22 Ukilyaga ilihuuvi lya Abulahamu kwa Nguluvi ni nsengo saakwe shina salutanaga, ilihuuvi lyakwe lyava likhamiliishe kwa nsila ya nsengo. 23 Ago gasenjekhaga ngaja shina gayandiikhwe mu Mayandikhwa aManofu kiija, “UAbulahamu wámuhuviilila uNguluvi, ndeeno uNguluvi wámuvasa kiiva mugolofu.” UAbulahamu woope wáava itambulwa, mumanyi wa Nguluvi. 24 Lino mwamanya kiija, umuunu ivasiwa kiiva mugolofu pa Nguluvi kwa nsila ya nsengo inofu, yisili kwa lihuuvi lyene duguli.

25 Shiisho ndeeno nayu Lahabu umushemi, woope akhavasiiwe kiiva mugolofu pa Nguluvi, kwa nsengo inofu yina wágahaga. Wávaposheelaga avatandilaaji vala na wávatanjilisaaga wávatusa wávashisaaga nsila yinji, baheene vasikhakhatwagwa.

26 Lino, ngaja shina umuvili pina gugaya numbula gwiva gufwile, shiisho ndeeno na ilihuuvi pina lingaya nsengo inofu, liiva lifwile.