Vahebulaniya 2

Uwukulukho uwukhome wa Nguluvi

1 Ino, tigayinatilaje mandu gala gina tagapulikhaga, baheene tisilaave tigaleshe na kiyansa kigayinatila aganji. 2 Kiiva, indaji sina avambuyeesu vasiposheelaga kishilila kwa vamalayikha va Nguluvi, sikhandi sisakulwa kiyinatilwa. Avaanu woona vina vakhandi vasikisiyinatila, uNguluvi wávahigaga kilingana nu wunansi waanave. 3 Nda gasenjekhaga ndeeno kuveene, ose tikwiliile wuli kikulukha kihigwa, nda tisikiwutuna uwukulukho uwukhome shina ndeeni? UMutwa uYeesu yumwene yuna akhayansiise kikhoma imola ya wukulukho uwo. Avaanu vina vakhandi vikimupulikha, vaajinia kunyeesu kiija wukhandi wa shiyooli. 4 UNguluvi woope akhandi ikiwujinia uwukulukho uwo, kwa nsila ya kiwonensa ifimanyilo, amiitu na mabikha gina gali paayo paayo. Khanji akhandi ikivagavila avahuvililaaji ifipeelwa kihuma kwa Numbula uMunofu, ngaja shina ageene umwene.

UYeesu wáyiyisaaga kiiva muunu

5 Tilogola ulwa nyi imya yina yikhayinsa. Timeenye kiija inyi iyo yisikhatemwa na vamalayikha, 6 leelo yiyandiikhwe mu Mayandikhwa aManofu kiija,

“Wee Nguluvi, wuli, umuunu yu naani hata owe umuhiviilile?

Wuli, ulusawo lwa muunu yu naani hata owe umutune?

7 Wamuviikhaga kiiva pansi kishila avamalayikha, kwa luhaavi lufupi.

Leelo lino umupeelile uyo uwutupikho ni lishima likhome

8 na kifiviikha ifiinu fyona mu wutawulilwa waakwe.”

Ino uNguluvi wámuviikha uYeesu kiiva munya wutawulilwa uwa fiinu fyona. Uluganulo lwakwe, kusiina shina shisilongosewa nu mwene. Leelo uluhaavi ulu, tisikimwaga uYeesu kitema ifiinu fyona. 9 Leelo tiimanya kiija, wágahaagwa nu Nguluvi kiiva pansi kishila avamalayikha kwa luhaavi lufupi. Uyo yumwene yuna uNguluvi amupeelile uwutupikho ni lishima likhome, kwa kiiva ya kitesekha na kiifwa kwa mwene. UNguluvi wágahaga ndeeno, baheene kwa nsila ya lusungu lwakwe, uYeesu afwe kwa kiiva ya kivakulusa avaanu woona.

10 UNguluvi yuna wáwumbile ifiinu fyona, na kifiviikha ngaja shina fishwali, yamushendefyaga kimukwisa uYeesu kwa nsila ya kitesekha. Wágahaga ndeeno, baheene uYeesu ave shiyanso sha wukulukho kwa nsila ya kivayinjisa avahuvililaaji vinshi mu wutupikho waakwe.

11 UYeesu lumo na vaanu vina ikivagaha kiiva vabaagule vaakwe, uWihaanave ali yumo. Lulwene uYeesu angaya nsoni kivashemeela awo kiija valukholo lwakwe. 12 UYeesu wálogolaga kwa Nguluvi wáaja,

“Nisiwulogole uwukhome waakho kwa valukholo lwangu,

nisiyeyeme injeyemo isa kikusufya owe paakhati naakhati ya shipuga sha vaanu vaakho.”

13 Khanji iijova,

“Nikhava nikimuhuviilila uNguluvi.”

Khanji iijova,

“One nili panu lumo na vaana vina uNguluvi anipeelile.”

14 Avaana awo vana mavili ni danda, ndeeno uYeesu woope wáyinsile ana muvili ni danda ngaja aveene. Wágahaga ndeeno, baheene kwa nsila ya mfwa yaakwe, asimene ingufu sa Shetaani yuna ana wutawulilwa wa kipinsa avaanu vave viifwa. 15 Khanji uYeesu wáfwisaga, baheene vayiyeeshele avaanu vina vakhandi vavanda kwa kiiva ya kitiila imfwa mu wiikhasi waanave. 16 Ndeeno yiwonensa bahawuvalafu kiija, uYeesu asayinsile kivatanga avamalayikha, leelo wáyinsile kivatanga avaanu va shisafi sha Abulahamu. 17 Lulwene, isakulwagwa ave ngaja shina vashwali avalukholo lwakwe mu goona, baheene ave Mutambule Mukhome umunya lusungu, muyinatifu kwa kimusenjela uNguluvi. Umwene wáyihumyaga ave sadaakha, baheene uNguluvi avasaajile avaanu uwunansi waanave. 18 UYeesu wálavaga na kijelwa, mu ilyo akwiliile kivatanga hata vala vina viijelwa.