6
1 Avavanda woona avahuvililaaji va Yeesu,
vavatiilaje avakhome vaanave kwa shila lujowo,
baheene ilitaawa lya Nguluvi na mamanyiso geesu,
gasikhaligwagwa na kisalwa.
2 Nda kuna vavanda vina avakhome vaanave vahuvililaaji vayaanave,
vasikhavasalaga.
Leelo visakulwa kivasenjela finofu na kishila,
apo vasiive vikivatanga avayaanave mu lihuuvi,
khanji awo vagani vaanave.
Ago goona gina nakulajisa,
uvamanyise na kivapavila avaanu va shipuga sha Nguluvi.
Amamanyiso ga wudehi nu wusi wa shiyooli
3 Vakwali avaanu vina vimanyisa amamanyiso ga wudehi.
Vimanyisa gina gasilingaana na maswi ga wuumi wa Mutwa weesu uYeesu Kilisito,
khanji gasilingaana ni njendo sina inojelwa uNguluvi.
4 Awo vamemile amatuupa,
khanji vasimeenye lyolyona.
Avaanu awo,
vingʼangʼaanila ulukhaananio luna lungaya lutono mu tujowo tunangʼana.
Amakhaananio ago gihonsa ijiila,
ilibaatu,
amaligo,
amahiiva amavi,
5 khanji insiku soona ginangania amapulinkhano.
Avaanu awo vananjiishe uluhala,
vangaya shiyooli.
Vihiiva kiija kisenga insengo ya Nguluvi,
yiyeene nsila ya kikwava uwusi.
6 Kiiva nu wusi lutono,
leelo umuunu asiive nu lutono mandu,
pina ikimuhuviilila uNguluvi na kikwilana ni fiinu fina anafyo.
7 Mu nyi iyi tisikhayinsile na shoshoona,
khanji tisikhawuukha na shoshoona.
8 Leelo nda tive ni shakiilya na menda,
tikwilanaje na ifyo.
9 Leelo avanya wupafu va wusi vigwila mu majelo,
na kipiitwa mu matego na mu wupafu wa shiyasu wuna wukivananga.
Ilyo likivahonsa kilava mandu.
10 Kiiva kidobokha mandu ihela kukwene shiyanso sha wunansi woona.
Avanji vawudobweshe uwusi na wuvahonsiise kijanjilisiwa,
vaalekha kiyinatila ishiyooli sha lihuuvi lyesu.
Lino avaanu awo,
vana wuvafi wukhome ngaja muunu yuna ikiyihoma ni shimaaji.
Amapavilo kwa Timoteo
11 Leelo owe Timoteo muunu wa Nguluvi,
hegukha mu wunansi uwo.
Uyinatilaje uwugolofu,
ishigoto kwa Nguluvi,
ilihuuvi,
ulugano,
ulugugumilo nu wuhuugu.
12 Jimbaga kimuyinatila uNguluvi hata nda yive lukhamu wuli,
baheene ukhawukwava uwuumi wa shiluta,
wuna washemelelwagwa pina ukhayitiishe kimuhuviilila uYeesu Kilisito,
pa valunjikhaaji vinshi.
13 Nikikulajisa pa Nguluvi yuna ikifipeela uwuumi ifiinu fyona,
na pa Kilisito Yeesu,
yuna wáhumyaga uwulunjikhaaji wa shiyooli pa Pontiyo Pilaato,a
14 niijova,
uyinatilaje indaji iso usikhapikhwagwa,
mbakha pina akhayinsa uMutwa weesu uYeesu Kilisito.
15 Kiyinsa kwa mwene kukhava uluhaavi luna apanjile uNguluvi yuna isufisiwa.
Yumwene duguli iitema,
Mukhome wa vakhome na Mutwa wa vatwa.
16 Uyo,
imfwa yisikhamupata,
akheele mu lumuli luna umuunu asikwiliile kiluvejeela.
Khanji kusiina umuunu yuna amwajile,
hata yuna akwiliile kimwaga.
Ishitiilo ni ngufu,
anafyo shiluta.
Amina!
17 Uvajovaje avanya wusi kiija vasikhayisufyaga na kivasala avayaanave,
hata kihuviilila uwusi waanave wa mu nyi iyi,
wuna wa luhaavi lufupi hela.
Leelo vamuhuvililaje uNguluvi yuna ikitupeela ifiinu fyona kwa lusungu,
baheene tifisenjele kwa wushendeefu.
18 Khanji vajovaga vagahaje amanofu,
baheene vave vanya wusi mu nsengo inofu ngaja shina avanji avanya wusi mu fiinu.
Vave vahumyaji na kihanga na vanji uwusi waanave.
19 Kisenga insengo inofu iso,
kuli ngaja kiviikha mu shihenje ifiinu fya kivatanga uluhaavi luna luyinsa.
Ukho kukwene kiyiviishila uluutu uluumu kwa nsiku sina siyinsa.
Apo baheene vakhaposheela uwuumi wa shiyooli.
20 Timoteo,
yinatilaga wunofu kivamanyisa ishiyooli shina upeliilwe.
Usikhayiyinjisaaga mu njowo sina singaya lutono.
Khanji hegukhaga mu makhaananio aga shiyasu,
gina avanji viijova aga gageene mamanyiso ga wumanyi.
21 Avaanu avanji vina vakheete ago,
valeshile kiyinatila ilihuuvi lyesu lya shiyooli.
Imota ya Mutwa uYeesu yive lumo noomwe.