Indaji ku fipuga fina fikwali mu wuhanjilo
5
1 Usikhamudalishilaga umugosiivaha,
leelo umupavilaje ngaja wiiho.
Woope avadiimi,
uvapavilaje ngaja vayaago.
2 Avadalaavaha uvapavilaje ngaja vamaayi vaakho,
na vahinja uvapavilaje ngaja vawulumbu vaakho mu wugolofu.
3 Uvajovele avahuvililaaji va Yeesu kiija,
vavatanjilisaaje avashimaayi avafwile vina vangaya mutango.
4 Baheene umufwile yoyoona umunya vaana na vasukulu,
awo vayimanyise tangusiina kisenga gina gisakulwa mu nanda saanave.
Vavasungaje avasafi vaanave,
ukho kukwene kivagomosesa amanofu gina vavasenjelaga.
Kigaha ndeeno kukwene uNguluvi idobokha.
5 Uwashimaayi umufwile yuna angaya muunu uwa kimutanga,
uyo ikimuhuviilila uNguluvi,
ifuunya na kilomba umutango kwa Nguluvi ishilo ni shiminsi.
6 Leelo uwashimaayi umufwile yuna idobokha uwupafu wa mu nyi,
uyo afwile,
hata ave iwonekha muumi.
7 Ago goope uvajovelaje avahuvililaaji va Yeesu,
baheene vasikhapikhwagwa.
8 Leelo umuunu yoyoona yuna asikivayangalila avalukholo lwakwe,
mandu ava mu nanda yaakwe,
uyo iiva wálilekha ilihuuvi,
khanji iiva muvi kishila umuunu yuna asili muhuvililaaji wa Yeesu.
9 Umufwile isakulwa kiiva mu lugoto lwa shipuga sha vafwile,
nda afisiise maakha kiyansa mashumi mutanda,
khanji asikhandi mushemi.a
10 Aveesaje ni njendo inofu,
isunga avanaakwe wunofu,
musajisaaji wa vahensa na vahuvililaaji va Yeesu,
b avatanjile vina vilafisiwa,
khanji asenjile insengo soona inofu.
11 Leelo avafwile avahinja,
usikhavayanushilaga mu shipuga sha vafwile,
kwa kiiva uwupafu wa muvili wukivapoota,
vasisakule kitoolwa kulikho kiyihumya kwa Kilisito.
12 Mu ilyo viiva vihuluta kihigwa,
kwa kiiva vasiive valeshile ulufingo lwanave kwa Kilisito ulwa kisigala bila kitoolwa khanji.
13 Lumo na ilyo,
vikiyimanyisa uwoolo pina vijenda jenda mu nanda sa vaanu.
Leelo wusili woolo hela,
khanji viiva vahomegania,
vikiyiyinjisa mu njowo sa vaanu avanji,
kuno vilogola injowo sina vasisakulwa kisilogola.
14 Lino,
one nisakula avahinja avafwile,
vave vitoolwa khanji,
vasave avaana na kiyangalila inanda saanave,
baheene avalugu vasikhatujovaga wuvi.
15 Avafwile avanji vayajile,
vikimuyinatila uShetaani.
16 Uwashimaayi umunya lihuuvi,
nda ana vafwile mu nanda yaakwe,
avatangaje,
baheene ishipuga sha vahuvililaaji shisikhamenwagwa.
Ndeeno vasiive ni mwenshe iya kivatanga avafwile avanji vina vangaya mutango.
17 Avayimililaaji va shipuga sha vahuvililaaji va Yeesu,
vina visenga insengo wunofu,
vatilwajwe na kihombwa wunofu,
mandu vina vikiyihumya kikhoma na kimanyisa.
18 Nilogola ndeeno kwa kiiva yiyandiikhwe mu Mayandikhwa aManofu kiija,
“Ingʼombe pina yijenda yiikhanya ingano yisoyowola,
usikhayipinyaga umulomo yigombole kiilya.”
c Khanji yiyandiikhwe kiija,
“Umusenga nsengo isakulwa kihombwa amahombo gaakwe.”d
19 Usikhayihuvililaga injowo sina iijowa umuyimililaaji wa shipuga sha Nguluvi,
vina viijova vamwaga iigaha uwunansi,
nda kungaya valunjikhaaji vavili awu vatatu.
20 Leelo avayimililaaji vina vikiyitenekha kigaha uwunansi,
uvakhajilaje baaho pa vaanu vinshi,
baheene avaanu avanji vatiile.
21 Nikikulajisa pa Nguluvi,
na pa Kilisito Yeesu na vamalayikha avabaagule kiija,
uyinatilaje ago.
Usikhahigaga nyangu pina usinaamanye wunofu awu kibaniilila lubali lumo.
22 Usikhamuyitikhaga nyangu kimuviikha umuunu mu nsengo ya Mutwa,
kwa kiiva nda umuviishe umuunu munansi mu nsengo,
na yuuwe usiive wahanga uwunansi waakwe.
Owe uyiyangalilaje,
baheene usigale kiiva mugolofu.
23 Kiyansa lino,
usikhangʼwesaga amalenga hela,
leelo uveesaje wiingʼwa ni divaayie ndoodo kwa kiiva ya wutamu waakho uwa wutumbu na matamu aganji gina gikikulafya.