UPawulo ikivalomba avaanu vamufunyilaje
3
1 Lino,
omwe vahuvililaaji vayeesu,
mutufunyilaje kwa Nguluvi kiija iMola iNofu ya Mutwa uYeesu yiyalaalile nyangu na kiposheelwa kwa shitiilo ngaja shina yishwali kunyeenyu.
2 Khanji mutufunyilaje,
kiija atukuluse kihuma kwa vaanu avanansi na vavi,
kwa kiiva avaanu vinshi vasikimuhuviilila uYeesu Kilisito.
3 Leelo uMutwa uYeesu muyinatifu,
asivakhangase omwe na kivadiima kwa Munansi yula uShetaani.
4 Na yuuse tina luhuviililo mwa Mutwa uYeesu,
kiiva mwisenga gina tikivajovela khanji musiyiteneshe kisenga.
5 UMutwa uYeesu alongose inumbula seenyu,
sive nu lugano ngaja uNguluvi shina iigana na kiiva nu lugugumilo lwa Kilisito.
UPawulo ikivapavila awoolo
6 Vahuvililaaji vayeesu,
tikivalajisa kwa wutawulilwa wa Mutwa uYeesu Kilisito kiija,
muveesaje kutali na vahuvililaaji woona awoolo,
vina vasiyinatila amamanyiso gina tavapeelaga.
7 Omwe mumeenye shina yisakulwa kiyinatila shina tikhakheele kunyeenyu kwa luganulo,
ose pina tili kunyeenyu tisikhali woolo.
8 Khanji tisikhali tiilya ishakiilya sha muunu tisihomba.
Leelo tikhandi tisenga insengo kwa kijimba ishilo ni shiminsi,
kiija tisikhaveesaga musigo kwa muunu yoyoona uwa kunyeenyu.
9 Pina tagahaga ndeeno,
yisili kiija tisikhandi tikwiliile kiposheela umutango ngaja ugo,
leelo tikhandi tiigaha ndeeno baheene tive shihwano kunyeenyu kiija mutufwataje.
10 Pina tikhandi lumo noomwe,
tikhandi tikivajovela kiija,
“Umuunu yoyoona yuna ikhaana kisenga insengo,
asikhaliisaga ishakiilya.”
11 Talogolaga amaswi ago kwa kiiva tapulikhaga kiija,
vakwali avanji kunyeenyu vina woolo,
vasisenga shoshoona,
leelo vikiyiyinjisa mu njowo sa vayaanave.
12 Tikivalajisa na kivapavila avahuvililaaji awo kwa wutawulilwa wa Mutwa uYeesu Kilisito vasingamale,
vasenje insengo saanave,
baheene vave ni shakiilya.
13 Lino omwe vahuvililaaji vayeesu,
musikhakhatalaga kisenga amanofu.
14 Muveesaje meeho nu muunu yoyoona yuna asiyinatila amaswi gina tavayandishilaga mu balula iyi.
Khanji musikhahangaji nawo,
baheene awone nsoni.
15 Musikhamuwonaji ngaja mulugu,
leelo mupavilaji ngaja lukholo lwenyu.
Amaswi aga kihwesania
16 Lino,
uMutwa uYeesu umunya wulindamafu,
avapeelaje uwulindamafu nsiku soona kwa nsila soona.
UMutwa uYeesu ave lumo noomwe woona.
17 One Pawulo niyandikha ibalula iya nyunjila iyi kwa liwokho lyangu yuune,
ndeeno shilushwali shina niyandikha mu balula sangu soona.
18 Imota ya Mutwa weesu uYeesu Kilisito,
yive lumo noomwe woona.