Ibalula ya wuvili iya Pawulo kwa
Vatesalonike
UPawulo ikivahunjila aVatesalonike
1
1 Ibalula iyi yihumile kunyangu one Pawulo lumo nu Silwanoa nu Timoteo.
Tikivayandishila omwe shipuga sha vahuvililaaji ava ku lijumbi lya ku Tesalonike.
Omwe mukimuhuviilila uNguluvi uWiheesu nu Mutwa uYeesu Kilisito.b
2 Imota nu wulindamafu kihuma kwa Nguluvi uWiheesu nu Mutwa uYeesu Kilisito,
five lumo noomwe.
Uwuhigo wa Nguluvi ilisiku ilya wudugo
3 Vahuvililaaji vayeesu,
tisakulwa kimuhonjesa uNguluvi wiila kwa kiiva yeenyu.
Yifwaya kigaha ndeeno,
kwa kiiva ilihuuvi lyenyu na kiganana kwenyu kwiyonjelela mandu.
4 Lulwene ose tikiyisufya kwa kiiva yeenyu,
pina tili mu fipuga ifinji ifya vahuvililaaji va Nguluvi.
Tikiyisufisisa ulugugumilo ni lihuuvi lyenyu lina munalyo mu malava goona gina gikivayinsila.
5 Amalava ago kwa kiiva ya Wutwa wa Nguluvi,
c giwonensa kiija uwuhigo waakwe,
wa shiyooli.
Mu malava ago,
mukhayiitikhwa kiyinjila mu Wutwa uwo.
6 UNguluvi akhahiga kwa shiyooli,
akhavalafya avaanu vina vikivalafya omwe,
7 khanji omwe vina mwilava lino,
mukhayiyeeshela lumo noose.
Ago gakhasenjekha pina akhayiwonensa uMutwa uYeesu kihuma kwa Nguluvi,
lumo na vamalayikhad vaakwe avanya ngufu
8 kwa lungʼali lwa mooto.
UYeesu akhavalafya woona vina vikimukhaana uNguluvi na vina vasiyinatila iMola iNofu ya Mutwa weesu uYeesu.
9 Awo vakhalafisiwa shiluta na kitaagwa kutali nu Mutwa uYeesu,
e nu wutupikho waakwe uwukhome.
10 Aga gakhasenjekha ilisiku lila lina uMutwa uYeesu akhayinsa kitupikhwa na kitiilwa na vaanu vaakwe woona,
avahuvililaaji vaakwe.
Na yuumwe shiisho mukhava lumo nawo,
kwa kiiva mwawuyiitikha uwubedelo wuna tavabedelaga ulwa mwene uYeesu.
UPawulo ikivafuunyila aVatesalonike
11 Lino,
tikivafuunyila wiila kwa Nguluvi weesu kiija,
avakwise kisingamala mu wiikhasi weenyu,
ngaja shina wávashemeelaga.
Tilomba kiija uNguluvi kwa nsila ya ngufu saakwe,
ayiteneshe kivatanga mbakha pina mwakwisa kisenga shila nsengo yina musakula kiyisenga,
kwa kiiva mwamuhuviilila.
12 Tilomba ndeeno,
baheene ilitaawa lya Mutwa weesu uYeesu litupikhwe kwa gala gina agasenjile kunyeenyu,
shiisho na yuumwe mutupikhwe kwa kiiva ya mwene.
Aga gasiive gisenjekha kilingana ni mota ya Nguluvi weesu ni ya Mutwa uYeesu Kilisito.