Shiyanso 47

UYusufu ikimutwala uYaakobo kwa Falawo

1 Baheene uYusufu wáaluta kwa Falawo wámujovela, “Uwiheesu na valukholo lwangu, vayinsa kihuma ku nyi ya Kanaani. Vayinsa ni ngʼombe, inkholo, imene, lumo ni fiinu fyanave fyona, lino vali ku Gosheni.” 2 UYusufu wávahaagula avamaame vasaanu, wávatwala kivakhoona kwa Falawo.

3 UFalawo wávaposa avamaame vala wáajova, “Mwisenga nsengo nshi?” Baheene vamugomosesa vaajova, “Mutwa weesu, insengo yeesu ose, tidiima ifidiimwa ngaja avambuyeesu shina vakhandi viigaha.” 4 Khanji vamujovela uFalawo, “Tiyinsile kikhala padoodo kuno ku wuhensa, kwa kiiva ku nyi ya Kanaani kuna njala mandu, kusiina ukwa kidiimila ifidiimwa fyesu. Lino mutwa weesu, tikikulomba utuyiitishe tikhale mu nyi ya Gosheni.”

5 UFalawo wámujovela uYusufu, “Uwiiho na vamaamo vayinsa kunyaakho. 6 Inyi yoona iya Misili nyi yaakho, vapeela uluvala ulunofu mandu kishila imbali soona isa pa Misili panu. Valekhaga vakhale ku Gosheni. Nda uvameenye avalukholo lwakho vamonga vina vidiima wunofu, vabagulaga vave vayimililaaji va fidiimwa fyangu.”

7 Apo baheene uYusufu wámutwala uwihaanave kimukhoona, kwa Falawo. Woope uYaakobo wámuyimiilila uFalawo. 8 UFalawo wámuposa uYaakobo, “Una maakha galinga?” 9 UYaakobo wámugomosesa wáaja, “Nifisiise maakha ligana limo na mashumi gatatu (130), leelo uwiikhasi wangu wa kihaama haama. Amaakha gangu masheefu, gamemile amalava kishila amaakha ga vambuyeesu.” 10 Baheene uYaakobo wámuyimiilila uFalawo, wámuhwesa, wáwuukha.

11 Ino uYusufu wávapeela uwiihe na vamaame uluvala ulunofu mandu ulwa Gosheni mu nyi ya Misili, luna luli nkholeela ni lijumbi lya Lamesesi. Apo pave pa kikhala aveene, ngaja uFalawo shina akhandi amujoveele uYusufu. 12 UYusufu wáava ikivapeela ishakiilya uwiihe, avamaame na vaanu woona ava pakhaaya ya wiihe, ngaja shina vakhandi vashwali.

Uwulongosi uwa Yusufu uluhaavi ulwa njala inkhome

13 Ifyakiilya fyagayaga mu nyi yoona ya Misili na ku Kanaani, injala yayitenekhaga kivalafya avaanu. Yapinsa avaanu va ku Misili na ku Kanaani vaganda mandu. 14 UYusufu wákungaania ihela soona isa nyi ya Misili ni ya Kanaani sina sikhandi sileetwa kigulila ishakiilya, wásitwala ku mbalino kwa Falawo. 15 Saganaga kisila ihela sa vaanu ava ku Misili na ku Kanaani, aVamisili woona vaaluta kwa Yusufu na kimujovela kiija, “Ihela seesu saasila, tupeela ifyakiilya! Kwashi tifwe, kuno ukituloleela?”

16 UYusufu wávajovela, “Ihela seenyu nda saasila, leeti ifidiimwa fyenyu, one nisivapeele ishakiilya.” 17 Baheene vatwala ifidiimwa fyanave kwa Yusufu, woope wávapyanisa ishakiilya ni falaasi, inkholo, imene, ingʼombe ni dogovi saanave. Umwakha ugo, uYusufu wáava ikivapeela ishakiilya kwa kivapyanisa ni fidiimwa fyanave fyona tipu.

18 Umwakha gula gwaganile kisila, umwakha guna gwatunjililaga aVamisili vayinsa khanji vamujovela, “Mutwa! Shiyooli ihela seesu saasila na ifidiimwa fyesu fyava fyakho. Mutwa! Tisiina shiinu sha kikupeela, ishiinu shina tisigeele nasho, magunda na mavili geesu. 19 Kwashi tifwe, kuno tina magunda geesu? Tupyanisisa ose amagunda geesu ni shakiilya, tive vavanda va Falawo. Tupeela ishakiilya tikulushe injala, kiija inyi yeesu yisikhasigalaga nyeene.”

20 Ndeeno, uYusufu wámugulila uFalawo inyi yoona iya Misili. AVamisili woona vaagusa amagunda gaanave goona, kwa kiiva injala yikhandi nkhali mandu. Inyi yoona yaava ya Falawo, 21 uYusufu wávagaha avaanu woona vave vavanda, shila luvala ulwa nyi ya Misili. 22 Leelo uYusufu asikhagulile amagunda ga vatambule va Vamisili, kwa kiiva aveene vakhandi viipata iligawo lyanave kihuma kwa Falawo, woona vakhandi ni fyakiilya fya kivakwila. Lulwene vasikhagusiise amagunda gaanave.

23 UYusufu wávajovela avaanu, “Puliisi, kiiva navagula omwe na magunda geenyu iminsiyaano mwava vavanda va Falawo, tooli imbeyu isi muvyale mu magunda geenyu. 24 Leelo pina mwakungula, mumugavilaje uFalawo ishipuga shimo kihuma mu fipuga fisaanu ifya fiinu fina mukhakungula. Ifipuga fina, ifya fiinu fina fikhasigala, fikhava mbeyu ni shakiilya sheenyu, lumo na vaneenyu na vaanu va mu nanda seenyu.” 25 Vamujovela, “Wee mutwa, watukulusa uwuumi weesu! Tilomba utusungupile, tisiive vavanda va Falawo.”

26 Baheene uYusufu wáviikhaga indaji mu nyi ya Misili kiija, shila shipuga shimo mu fipuga fisaanu ifya nkungulo iya shila muunu, yiiva ya Falawo. Indaji iyi yikwali mbakha iminsiyaano. Amagunda ga vatambule geene duguli, gageene gina gasikhagaviilwe kwa Falawo.

27 AVaisilaheli vayitenekha kikhala ku Gosheni, ku nyi ya Misili. Ukho, vakwava uwusi winshi mandu na kiyoolokha, vaava vinshi mandu.

UYaakobo ilajisa kisiilwa kunyaakwe

28 UYaakobo wáakhala ku Misili maakha ishumi na fungati. Amaakha gaakwe goona wáfisaaga maakha ligana limo na mashumi gana ni fungati (147). 29 Insiku saakwe isa kiifwa saganaga kihejeela, wámushemeela umwanaakwe uYusufu wámujovela, “Lino nda shiyooli unigeene, viikha iliwokho lyakho pa shiima shangu, uyiyiije kiija, usikhanisiila kuno ku Misili. Nikikulomba mandu, unigahile ndeeno kwa lishima ni shiyooli! 30 Leelo pina nikhava naafwa, ukhanisumulaje unitinie ku Kanaani, ulute unisiile ku majooja gina vasiliilwe avambuyeesu.” UYusufu wámujovela, “Nikhagaha ngaja shina walogola.” 31 Khanji uIsilaheli wámujovela, “Yiyiiga!” Woope uYusufu wáyiyiiga, baheene uIsilaheli wásungamya umutwe kulubali lwa matwe ulwa wusaga waakwe.