Shiyanso 45

UYusufu ikiyikhoona kwa vamaame

1 UYusufu wáganile kipulikha amaswi ga Yuuda, wágombolaga kiyijimfilisa kikhoola pa vaanu woona vina akhandi anawo. Wávalajisa avavanda vaakwe kiija, “Woona humi kunja.” Kusiina umuunu yuna wásigalaga pina uYusufu akhandi ikiyikhoona kwa vamaame. 2 Apo, wákhoola kwa ngufu mbakha aVamisili vamupulikha, vatwala amaswi ago kwa Falawo.

3 UYusufu wávajovela avamaame wáaja, “One yuune Yusufu! Uwiheesu shiyooli ashaanali apili muumi?” Woope vasikhajelile kimuyankha, kwa kiiva vatiilaga mandu. 4 Khanji uYusufu wávajovela wáaja, “Nilomba munihejeele.” Vaganile kimuhejeela, baheene wávajovela, “One yuune Yusufu ni munangʼana weenyu, yuna mwanigusaaga ku Misili.” 5 Lino musikhangʼuulaji, khanji musikhayikhalalilaji yuumwe, kwa kiiva ya kinigusa kuno. Kiiva uNguluvi wánilongosaaga kumwandi yeenyu, kiija nivakuluse avaanu. 6 Ugu mwakha gwa wuvili hela gwa njala inkhome, gashaanali amaakha aganji gasaanu gina avaanu vasikhalima na kikungula. 7 UNguluvi wánileetaga kuno nivalongole, kiija nishisunje ishikholo sheesu, baheene avapeele uwukulukho wukhome mu njala iyi inkhome. 8 Ndeeno, musili yuumwe mwanileetaga kuno, leelo yu Nguluvi. Umwene wánigaha nive muunu wa kimusimila uFalawo, nive mukhome wa livansa lyakwe lyona, na muyimililaaji wa nyi yoona iya Misili.

9 “Lino, luti nyangu kwa wiheesu mumujovele kiija, ‘Umwanaakho uYusufu wáajova, “UNguluvi wánigaha nive muyimililaaji wa nyi yoona iya Misili, lino, usikhadiilaga kiyinsa kunyangu. 10 Usiikhale mu nyi ya Gosheni nkholeela noone na vanaakho, avasukulu vaakho, inkholo saakho, imene saakho, ingʼombe saakho ni fiinu fyona fina unafyo. 11 Ukho, nisikupeele ishakiilya ni nanda yaakho ni fidiimwa fyakho, musilaave mufwe ni njala. Kiiva gashaanali amaakha aganji gasaanu, aga njala inkhome.”’”

12 UYusufu wávajovela khanji wáaja, “Omwe lumo nu Benyamini mwaloleela kwa meeho geenyu kiija, yuune Yusufu nilogola noomwe. 13 Luti mumujovele uwiheesu one nili muunu mukhome apa pa Misili. Khanji mujovelaji goona gina mwagaaga uluhaavi luna mwava apa. Lutaji mumuleete nyangu uwiheesu panu.” 14 Apo, wámukumbaatila umunangʼana waakwe uBenyamini, wákhoola na uBenyamini woope wákhoola, kuno vakumbatileene. 15 Khanji wávanoonela avamaame vaakwe woona kuno ikhoola. Ago gaganile kishila hela, avamaame vaakwe valogola nawo. 16 Amaswi aga kiyinsa avamaame va Yusufu, gamufishila uFalawo umutwa uwa ku Misili na vakhome vaakwe, baheene vashendeeva. 17 Apo, uFalawo wámujovela uYusufu, “Vajovela avamaamo ndeeni, ‘Gahi ndeeni, sumusi amasigo geenyu pa dogovi, muwuye mbakha ku nyi ya Kanaani. 18 Mumuleete uwiheenyu, ni fiinu fyenyu fyona, baheene muyinse kunyangu. One nisivapeele uluvala lunofu mandu pa Misili panu. Ukho, musiilye uwunofu uwa nyi iyi.’ 19 Khanji nakujova uvajovele avamaamo, ‘Tooli amamutukha gina gikwehwa ni dogovi kihuma ku nyi ya Misili, baheene mulute muvatoolele avaana veenyu na vashimaayi veenyu. Mumuleete uwiheenyu apa. 20 Musikhatiilaji ulwa wusi weenyu, kwa kiiva nikhavapeela uluvala ulunofu ulwa apa pa Misili, luve lwa kunyeenyu.’”

21 Lino avaana va Isilaheli^a vaagaha ngaja shina vakhandi vajoviilwe. UYusufu wávapeela amamutukha gina gikwehwa ni dogovi ngaja shina akhandi ajoveelwe nu Falawo, baheene wávapeela ishakiilya sha mu nsila. 22 UYusufu wámupeela shila muunu amenda mapya, leelo uBenyamini wámupeela amenda gasaanu ni hela magana gatatu (300). 23 Kwa wihaanave wátwala ifiinu ifi, idogovi ishumi sina sisumwile ifiinu finofu mandu ifya ku Misili, idogovi imbalusi ishumi sina sisumwile imbumbulu, amakhaate ni fiinu ifinji ifya kiilya mu nsila. 24 Apo, wáhwesania na vamaame. Pina vakhandi viwuukha, wávapavila wáaja, “Musikhadalinkhanaji mu nsila.” 25 Vawuukha ku Misili, vaaluta mbakha ku nyi ya Kanaani kwa wihaanave. 26 Vaganile kifikha vamujovela uwihaanave, “Wiheesu, uYusufu muumi! Khanji, mukhome wa nyi yoona iya Misili!” Leelo, uwihaanave wáswigaga hela, asikhahuviliile amaswi gaanave. 27 Leelo, vaganile kimujovela amaswi goona gina vakhandi vajoveelwe nu Yusufu, na wáganile kiwona amamutukha goona gina uYusufu akhandi amutwaliile aga kiluta kimutoola, inumbula ya wihaanave yashendeeva mandu. 28 Apo, baheene uIsilaheli wáaja, “Nayiitikha! Umwanangu uYusufu muumi, nisiilute nimwaje nishaanali nipili muumi.”