Shiyanso 18

UNguluvi ikimujovela uSaala kiija akhasava umwana

1 Ilijuva limonga uluhaavi ulwa paminsi, pina ilijuva likhandi likholile, uMutwa uNguluvi wámutwiwushilaga uAbulahamu pina akhandi akheele pa mulyango gwa litinga lyakwe, nkholeela na mapishi aga mwalooni, gina gali ku Mamule. 2 UAbulahamu wáloleela, baheene wávaaga avaanu vatatu vayiimile patali padoodo kihuma panyaakwe. Wáwuukha ikivasijila, iiluta kivasaajisa. Wáganile kifikha uluvala luna vakwali, wáfugama, 3 wáaja, “Wee mutwa wangu, nda waniyiitikha, nikikulomba mandu muyinjile munyangu mukhale padoodo. 4 Muletelwe amalenga aga kiyoosa amagulu geenyu, baheene mutuuye pansi pa mupishi ugu. 5 Pina mutuuya, nisivaleetele ishakiilya shidoodo mulye, baheene mupate ingufu isa kishuulila, mwaniyinsila ni muvanda weenyu, ndeeno munihepelese nivanosese.” Woope vamujovela, “Haaya! Gahaga ngaja shina walogola.”

6 Baaho, uAbulahamu wáyinjila nyangu mu litinga, wámujova uSaala, “Hapula nyangu uwutine uwunofu mandu uwa ngano, fijelo fitatu, unose amakhaate.” 7 Baheene uAbulahamu wáaluta nyangu mu lupanga, wáhaagula ingwada yina yineneepe mandu, wámupeela umudimaaji ayishinje na kiyitelekha nyangu. 8 Wáganile kimala kinosa ishakiilya, uAbulahamu wáleeta ulwelu, utupyo tuna tululile nasi nyama sila. Apo baheene wávasaajisa valye. Pina vakhandi viilya pa mumepo pa mupishi pala, uAbulahamu wáakhalaga nkholeela nawo, baheene ave ikivatanga ishiinu shina hambi vikishisakula.

9 Avahensa vala vamuposa uAbulahamu vaaja, “Ali kwi umudala waakho uSaala?” UAbulahamu wávajovela, “Ali mu litinga.”

10 Umunyaayumo wa vahensa vala, wámujovela uAbulahamu wáaja, “Shiyooli, nikhayinsa umwakha guna guyinsa uluhaavi ngaja ulu, uSaala umudala waakho akhava ana mwana umudiimi.”

Uluhaavi ulo uSaala wáali akheele kunyuma ya mulyango gwa litinga ipuliisa. 11 UAbulahamu nu Saala vaali vagogolo, ndeeno vasikhandi vakwiliile kisava umwana. USaala woope asikhandi iiluta ku nsiku saakwe. 12 USaala wáganile kipulikha ndeeno, baheene wáahekha mwene mu numbula yaakwe wáaja, “One nu mugoosi wangu tigosiipe ndeeni, tikwiliile wuli kipata umwana?”

13 Baheene uNguluvi wámuposa uAbulahamu wáaja, “Kwashi uSaala wáahekha na kiyiposa mwene kiija nda akwiliile kisava umwana, kwa kiiva agosiipe? 14 Wuli, kuna shiinu ishikhamu kwa Mutwa uNguluvi? Umwakha guna guyinsa uluhaavi ngaja ulu nikhatina, uSaala akhava asavile umwana mudiimi.” 15 Leelo uSaala wátungumala, wákhaana wáaja, “Nisaahekha!” Leelo uNguluvi wámujovela wáaja, “Ndaali, waahekha.”

UAbulahamu ikiyilombela iSodoma kiija yisikhanangwagwa

16 Baheene avaanu vala vawuukha, vaaluta mbakha vaafikha pina vakhandi vikilyaga ilijumbi lya Sodoma. Uluhaavi ulo, uAbulahamu akhandi ikivasindishila.

17 Pina vali mu nsila vijenda, uMutwa uNguluvi wáyansa kihiiva iija, “Wuli, nimufihe uAbulahamu ili lina nisakula kiligaha? 18 Umwene akhava daada wa shikholo ishikhome sha vaanu avanya ngufu, khanji kwa kishilila umwene avaanu woona ava mu nyi vakhayimiililwa! 19 Namuhagulaga uAbulahamu kiija avamanyise avanaakwe ni shisafi shaakwe kiija vaniyinatilaje. Vagahaje amanofu na kiiva vagolofu, baheene na yuune nisigasenje gina nikhandi nifinjile.” 20 Apo baheene uNguluvi wámujovela uAbulahamu wáaja, “Napulikha inkhoolo ya vaanu vina vigahilwa amavi na vaanu va lijumbi ilya Sodoma ni lya Gomola. Avaanu va Sodoma ni Gomola vanansi mandu. 21 Lino, nilute yuune nigaloleele aga gina nipulikha, nimanye nda ga shiyooli.”

22 Uluhuma apo, avahensa vavili vala vaaluta ku Sodoma, leelo, uAbulahamu wásigala ayiimile pa Nguluvi. 23 Apo uAbulahamu wávejeela kwa Nguluvi, baheene wámuposa wáaja, “Wuli, usivabude avaanu avanansi lumo na vagolofu? 24 Wuli, nda kuna vagolofu mashumi gasaanu apo pa Sodoma, usilibude ilijumbi awu usilileshe kwa kiiva ya vagolofu awo mashumi gasaanu? 25 Nilomba mandu usikhagahaga ndeeno, usikhavabudaga avagolofu mashumi gasaanu lumo na vanansi. Umugolofu ave ngaja munansi? Ndaali! Umuhigaaji wa nyi yoona asingalekha kihiga finofu!”

26 UNguluvi wámujovela uAbulahamu wáaja, “Nda nivaaje avagolofu mashumi gasaanu, kwa kiiva ya awo, nisilinanga ilijumbi lya Sodoma.” 27 UAbulahamu wámujovela wáaja, “One nili ngaja mankundi na mafuliikho hela, nisili shiinu kunyaakho. Lino, puliisa wee Nguluvi, nilomba niyiteneshe kilogola noowe. 28 Wuli, avaanu avagolofu nda vasheepushe vave mashumi gana na vasaanu, usivabude avaanu woona kwa kiiva vasheepukha vasaanu ava?” UNguluvi wámujovela wáaja, “Kwa kiiva ya vaanu avagolofu awo mashumi gana na vasaanu, nisilinanga ilijumbi.”

29 Khanji uAbulahamu wámuposa uNguluvi wáaja, “Wuli, nda vakwali avaanu mashumi gana?” UNguluvi wámuyankha wáaja, “Kwa kiiva ya vaanu avagolofu awo mashumi gana, nisilinanga ilijumbi ilyo.”

30 Khanji uAbulahamu wámujovela wáaja, “Wee Nguluvi, usikhanikhalalilaga nilomba nikupose. Wuli, nda vakwali avaanu avagolofu mashumi gatatu?” UNguluvi wámuyankha wáaja, “Nda vakwali avagolofu mashumi gatatu, nisivabuda.” 31 UAbulahamu wáaja, “Kwa kiiva one nikiyitenekha kilogola noowe Mutwa Nguluvi, nilomba nikupose khanji. Wuli, nda vakwali avaanu avagolofu mashumi gavili hela mu lijumbi ilyo?” UNguluvi wámujovela wáaja, “Kwa kiiva ya awo, nisilinanga ilijumbi ilyo.”

32 Kuwudugo uAbulahamu wámuposa wáaja, “Wee Nguluvi nikikulomba usikhanikhalalilaga nilogole noowe khanji ulwa wudugo. Wuli, nda uvaaje avaanu avagolofu ishumi hela?” UNguluvi wámujovela wáaja, “Kwa kiiva ya vaanu awo ishumi, nisilinanga ilijumbi ilyo.”

33 UNguluvi pina wámalile kilogola nu Abulahamu wáwuukha, woope uAbulahamu wáawuya kunyaakwe.