Ɨkalaata ɨya bhɨɨlɨ ɨya
Yoohani
ɄYeesu yʉ Lizwi ɨlyɨ wʉʉmi
1
Ɨkalaata ɨnɨ ɨfuma huliinɨ anɨ nɨnʼgoosi wɨ shibhanza.
Ɨhusimbila aawe nʼshɨ wʉ‑ʉsaluliilwe nʉ Ngʉlʉbhɨ,
peeka na bhaana bhaahoa bhɨ‑ɨmbagɨɨne hu lyoli.
Leelo saga nɨɨnɨ nɨmwene wɨ‑ɨmbagɨɨne,
leelo na bhaala abhanjɨ bhonti bha bhamɨɨnye ɨlyoli ɨyɨ Nongwa ɨNyinza,
bhope bhahubhagana amwɨ hu mwoyo gwonti.
2 Tibhagɨɨne,
pɨpo atɨ naamwɨ timɨɨnye ɨlyoli ɨyo,
nantele tɨnza‑ajendeelele amanye wiila.
3 Ɨmpyana,
ɨnkʉmbʉ nʉ tengaanu afume hwa Ngʉlʉbhɨ ʉDaada na hwa Mwana waakwe ʉYeesu ʉKilisiti,
b vinza‑abhe peeka naatɨ mu lyoli,
na mu lugano.
Ɨlyoli nʉ lugano
4 Nahashiiye tee,
lwa nʉmvwa huje abhaana bhaaho bhamo bhalemba hwa‑akhate ɨlyoli,
nanshi ʉDaada ʉNgʉlʉbhɨ sha‑ahatilajiziizye.
5 Ɨshi,
aawe maayɨ nʼkʉndwe,
ɨhulaabha huje ʉkhate ɨndajizyo ɨla yɨ‑ɨyiga,
tigananaje.
Ɨndajizyo yɨ‑ɨhusimbila saga njenu,
lyoli ya yɨɨla ya tahali nayo afume lwa tahanda humʼmwɨtɨshe ʉKilisiti.c
6 Aganane hwa huzitinishe ɨndajizyo zya Ngʉlʉbhɨ.
Ɨndajizyo ya mwʉmvwɨzye afume hu wandilo ɨyiga,
mugananaje.
Mugandi hubhambɨɨlɨle abhagobezi
7 Ɨnjanjile ɨsho,
pɨpo abhagobezi abhinji bhafumiiye mu nsi.
Abheene saga bhahwɨtɨha huje,
ʉYeesu ʉKilisiti ahɨnzɨle sha‑ali nʉ mʼbɨlɨ nanshi ʉmuntu.
Ʉmuntu wa‑ayanga ɨsho,
nʼgobezi nantele nʼnʉgʉ wa Kilisiti.d
8 Mubhe maaso nɨ‑ɨbho,
huje ɨmbombo yeenyu ɨgandi abhe ɨteejile lwene.
Mubhe maaso huje mwahambɨɨlɨle ɨmpeesya ya mukhondɨɨye hu mbombo yeenyu.
9 Ʉmuntu wowonti ʉyo agalulanya ɨmanyizyo zya Kilisiti,
nantele saga ajendeelela akhate ɨmanyizyo zya‑amanyiziiwe,
ʉyo saga ali palishimo nʉ Ngʉlʉbhɨ.
Leelo,
wowonti wa‑ajendeelela akhate ɨmanyizyo ali palishimo nʉ Daada ʉNgʉlʉbhɨ nʉ Mwana waakwe.
10 Nkashele ʉmuntu ahwɨnza huliimwɨ,
nantele saga amanyizya ɨmanyizyo ɨzyɨ lyoli ɨzya Kilisiti,
mugandi humʼmwambɨɨlɨle mu nyumba zyenyu.
Nantele mugandi hunʼnamushe nanshi ʉmwoziwa ʉwamwenyu.
11 Wowonti ʉyo ahunʼnamuha na humʼmwambɨɨlɨle nanshi ʉmwoziwa ʉwamwabho,
ʉyo ali peeka nawo mu mbiibhi ɨzyo ahuzibhomba.
Amazwi aga hu malishilo
12 Ɨndi na mazwi gaminji ga nahanzaga huje ɨmbasimbile,
leelo saga ɨhwanza aje,
ɨnsimbe ɨgo mu kalaata.
Leelo,
ɨsʉʉbhɨla ahwɨnze huliimwɨ,
hubhayaatile huje lwa tahayilolana,
tahayanje,
ɨpo pa tahayisha tee.
13 Abhaana bha yɨlʉmbʉ waahoe wa‑asaluliilwe nʉ Ngʉlʉbhɨ,
bhahulamuha.