Ɨkalaata ɨya hwande ɨya nʼsontwa ʉPaulo hwa
Tiimoti
ɄPaulo ahunʼnamuha ʉTiimoti
1
Ɨkalaata ɨnɨ ɨfumile huliinɨ anɨ nɨPaulo,
nɨnʼsontwa wa Yeesu ʉKilisiti,
a nanshi ʉNgʉlʉbhɨ ʉMʼfyʉli weetu nʉ Yeesu ʉKilisiti ʉyo tihunʼsʉʉbhɨla,
sha bhahandajiziizye.
2 Anɨ ɨhusimbila aawe Tiimoti,
we mwana waanɨ ʉwɨ lyoli mu lwɨtɨho.
Ɨmpyana,
ɨnkʉmbʉ nʉ tengaanu afume hwa Ngʉlʉbhɨ ʉDaada na hwa Mwɨnɨ weetu ʉYeesu ʉKilisiti,
vibhanje peeka naawe.
Ɨnsundo hu nongwa ya bhamanyizyi abhi‑ilenga
3 Ɨhwanza huje,
ʉsagale hwʉhwo hwi‑ibooma ɨlyɨ Efeeso,
nanshi sha nahaʼlaabhile mu habhaazyo haala ha nahasogʉʉye abhale hu mukowa ʉgwɨ Makedoniya.
Nahajile ʉbhabhʉʉzye abhantu bhamo huje,
bhapɨndushe hu manyizyo zyabho ɨzi‑ilenga.
4 Nantele,
ʉbhakhaane huje,
bhalehane navyo ɨvilaale vya saga vikhondɨɨye,
awe abhambishe amataawa ga bhamaama bha bhahafwiye.
Ɨgo galeeta madali lwene mwa bhantu,
saga gali na pa‑amalishile.
Saga gajendeelezya abhantu abhombe ɨmbombo zya Ngʉlʉbhɨ,
pɨpo ɨmbombo zya Ngʉlʉbhɨ zikhamantana mu lwɨtɨho lwene.
5 Ɨndajizyo ɨzyo hwa huje abhantu bhabhe nʉ kʉndwa.
Ʉkʉndwa ʉwu wuli mwa bhantu ɨbho amooyo gaabho gasangaluushe,
bha bhasaaga abhombe ɨnyinza,
na bha bhali nʉ lwɨtɨho ʉlwɨ lyoli.
6 Abhantu abhanjɨ bhazileshile ɨzyo na‑agalushile mu mazwi agɨ nanjisu.
7 Bhope bhahwanza abhe bhamanyizyi abhɨ ndajizyo zya Moose,
b leelo amazwi ga bhayanga na‑akhajiilizye,
abheene bhɨɨbho saga bhahugaaganya.
8 Atɨ timɨɨnye huje,
ɨndajizyo zya Ngʉlʉbhɨ nyinza,
nkashele ʉmuntu ahuzilondolezya hwi‑idala lya likhondɨɨye.
9 Nantele timɨɨnye huje,
ɨndajizyo saga zibhɨhwɨlwe hwa bhantu bha bhali bhagolosu.
Lyoli zibhɨhwɨlwe hu nongwa ya bhantu abhananzi bha saga bhasaaga.
Zibhɨhwɨlwe hwa bhantu bha saga bhahunʼtiniha ʉNgʉlʉbhɨ,
na hwa bhabhomba mbiibhi.
c Nantele zibhɨhwɨlwe hwa bhantu bha saga bhahumʼpuuta ʉNgʉlʉbhɨ na bha bhasʉngwa ɨzya mu nsi.
Zibhɨhwɨlwe hwa bhantu bha bhagoga abhayise bhaabho na bhaanyina bhaabho,
na hwa bhagoji abhanjɨ bhonti.
10 Ɨndajizyo ɨzyo zibhɨhwɨlwe hwa bhabhembusu,
na hwa bhaala bha bhahwegana abhalume hwa bhalume,
hwa bha bhahwibha abhantu na hubhakazye,
bha bhayanga ilenga,
na hwa bhonti bha bhalapa ilenga.
Nantele zibhɨhwɨlwe hwa bhanjɨ bhonti bha bhabhomba zya zilegana nɨ manyizyo ɨzyɨ lyoli.
11 Ɨmanyizyo ɨzyo zibhoneha mu Nongwa ɨNyinza ɨzya Ngʉlʉbhɨ,
wa‑ali nʉ mwamu nʉ wɨ nsayo zyonti.
Nanɨ,
ampiiye ɨNongwa ɨNyinza ɨzyo huje,
ɨndʉmbɨlɨlaje.
ɄNgʉlʉbhɨ ahunʼnolela ɨnkʉmbʉ ʉPaulo
12 Ɨhunʼsalifya ʉMwɨnɨ weetu ʉYeesu ʉKilisiti sha‑ahalolile huje ɨndi nʼnʉnjɨsu,
ahansaluuye hu mbombo yaakwe,
ahampeela ikhone ɨlya humʼmombele.
13 Hwope hwisinda ʉhwo,
nahabhaligaga,
nahabhayɨmvyaga haani na hubhaviisye abhantu bhaakwe,
leelo ʉYeesu ahandolela ɨnkʉmbʉ.
Nahabhombile ɨgo,
sinta amanye,
shɨ‑ɨnsɨɨle ahumʼmwɨtɨshe ʉYeesu ʉKilisiti.
14 Leelo,
ʉMwɨnɨ weetu ʉYeesu ʉKilisiti ahandolela ɨmpyana haani,
ahampeela ʉlwɨtɨho nʉ kʉndwa hwi‑idala ɨlya‑apatiihanywe nawo.
15 Huli ni‑izwi ɨlyɨ lyoli lya likhondɨɨye hulyɨtɨshe hu mwoyo gwonti huje,
“ɄYeesu ʉKilisiti ahɨnzɨle mu nsi ʉmu hubhafyʉle abhɨ mbiibhi,”
ɨbho ʉwa hwande waabho nɨɨnɨ.
16 ɄYeesu ʉKilisiti ahandolɨɨye ɨnkʉmbʉ naanɨ nɨmʼmiibhi ashile abhanjɨ bhonti.
Ahalolesiizye ʉjimbiilizu waakwe ʉwa‑aswijizye hwaliinɨ,
huje ɨmbe shifwani hwa bhaala bha bhahayihumʼmwɨtɨha na huwaaje ʉwʉʉmi ʉwa wiila.
17 ɄNgʉlʉbhɨ yʉ Mwɨnɨ ʉwa wiila,
saga ahayifwa nalumo.
Saga alɨɨho ʉmuntu wa‑abhajiiye hunʼnole ʉNgʉlʉbhɨ,
saga alɨɨho ʉNgʉlʉbhɨ ʉwɨnjɨ.
Yʉʉyo mwene ayambɨlɨlaje ɨnshɨnshɨ nʉ mwamu wiila na wiila.
Aameni!
ɄPaulo ahunʼnajizya ʉTiimoti
18 Aawe wʉmwana waanɨ Tiimoti,
ɨhulajizya huje,
ʉyɨɨtɨshe abhombe ziila abhakuwi bha Ngʉlʉbhɨ zya bhahayanjile hwaliiwe.
Ʉlondolezyaje amazwi ɨgo huje,
gahwavwaje alwe ʉlʉgʉ ʉwinza ʉwa‑asʉnje ɨmanyizyo ɨzyɨ lyoli.d
19 Ʉkhatilizyaje ʉlwɨtɨho lwaho,
na‑asaaje abhombe ɨnyinza,
pɨpo bhamo saga bhahuzisaajila ɨzyo.
Sinta abhombe ɨzyo,
pa zyahaazya ʉlwɨtɨho lwabho huje lunanjishe lwonti.
20 Muuhati mwɨ‑ɨbho alɨɨho ʉHimenaayo nʉ Alekizanda.
Ɨbho bhonti,
nahabhadajiiye hwʉnzɨ hwa Seetanoe huje,
bhamanyile aleshe ahunʼshente ʉNgʉlʉbhɨ.