Ɨkalaata ɨya bhɨɨlɨ ɨya nʼsontwa ʉPaulo hwa
Bhatesaloniike
ɄPaulo ahubhalamuha aBhatesaloniike
1
Ɨkalaata ɨnɨ ɨfumile huliinɨ anɨ nɨPaulo peeka nʉ Silwanoa nʉ Tiimoti.
Tihubhasimbila ɨkalaata ɨnɨ amwɨ mwa mumʼmwɨtɨɨshe ʉDaada weetu ʉNgʉlʉbhɨ nʉ Mwɨnɨ ʉYeesu ʉKilisiti,
b amwɨ mwa muli mu shibhanza ɨsha hwi‑ibooma ɨlyɨ Tesaloniike.
2 Ɨmpyana nʉ tengaanu afume hwa Ngʉlʉbhɨ,
ʉDaada weetu,
na hwa Mwɨnɨ ʉYeesu ʉKilisiti,
vibhanje peeka naamwɨ.
Ʉlongwe ʉlwa Ngʉlʉbhɨ ɨnsiku ɨzya hu malishilo
3 Mwɨ bhooziwa bhamwetu,
tihwanziwa hunʼsalifye ʉNgʉlʉbhɨ ɨnsiku zyonti hu nongwa yeenyu,
pɨpo ʉlwɨtɨho lwenyu lukula tee,
nantele akʉndane hwenyu huhwonjela tee.
4 Ɨpo sha shɨɨsho atɨ tihwibaada mu vibhanza ɨvyɨnjɨ,
hu nongwa yɨ jimbiilizu weenyu nʉ lwɨtɨho lwenyu ɨvyo muli navyo mu malabha gonti ga gahubhaaga.
5 Ɨgo gonti galolesya huje,
ʉlongwe ʉlwa Ngʉlʉbhɨ lwɨ lyoli.
Hu longwe ʉlwo,
amwɨ mwahayikhondela atʉʉshe mu wumwɨnɨ waakwe,
c ʉwo amwɨ muyɨmba hu nongwa yaakwe.
6 Ɨnjanjile ɨsho,
pɨpo ʉNgʉlʉbhɨ ahayihubhalonga hu lyoli,
ʉmwene ahayihubhapeela amayɨmba ɨbho bha bhahubhayɨmvya amwɨ,
7 nantele amwɨ mwa muyɨmba ɨshi,
mwahayitʉʉya peeka naatɨ.
Ɨgo gahayibhombeha hu habhaazyo ɨho ʉMwɨnɨ ʉYeesu ahayiloleha lwa‑ahwɨnza afume hu mwanya peeka na bhantumid bhaakwe abhi‑ikhone.
8 ɄMwɨnɨ ʉNgʉlʉbhɨ ahayɨnza mu lukhozyo ʉlwɨ mwoto na hubhafunde bhonti bha bhahunʼkhaana na bha saga bhazyɨtɨɨshe ɨNongwa ɨNyinza ɨzya Mwɨnɨ weetu ʉYeesu.
9 Ahayihubhafunda abhantu ɨbho hu lufundo ʉlwa wiila na hubhabhɨɨshe hutali nʉ Mwɨnɨ nʉ mwamu waakwe ʉwi‑ikhone.
10 Ʉlufundo ʉlwo lwahayibhombeha isiku ɨlyo ʉMwɨnɨ ʉYeesu lwa‑aweela,
ɨpo bhonti ɨbho bhamʼmwɨtɨɨshe bhahayiswiga na humʼmwamishe.
Namwɨ mwahayibha peeka nabho,
pɨpo mwahɨtɨɨshe ʉsimishizi wa tahabhabhʉzɨɨzye hu nongwa yaakwe.
ɄPaulo ahubhapuutila aBhatesaloniike
11 Ɨshi hu nongwa ɨyo,
tihubhapuutila hwa Ngʉlʉbhɨ weetu hu habhaazyo honti huje,
abhaavwe mukhondele akhale nanshi sha mwahakwiziiwe mu lwɨtɨho.
Nantele tipuuta huje,
hwi‑ikhone lyakwe abhaavwe abhombe aminza ga muhwanza abhombe,
alɨngaane nɨ mbombo ɨzyɨ nsɨɨbho ɨyɨ lwɨtɨho lwenyu.
12 Tilaabha ɨsho,
huje ʉMwɨnɨ weetu ʉYeesu amwamihwaje afumilane na shiila sha mulemba,
namwɨ mwahayimwamihwa peeka nʉ mwene.
Ɨga gahayibhombeha afumilane nɨ mpyana ya Ngʉlʉbhɨ weetu,
nʉ Mwɨnɨ ʉYeesu ʉKilisiti.