ABhaluumi 11

Ɨnkʉmbʉ ya Ngʉlʉbhɨ hwa Bhaizilaeeli

Ɨshi ɨbhʉzɨɨlɨzya huje, wɨlɨ, ʉNgʉlʉbhɨ abhaleshile abhantu bhaakwe? Ndaali, saga abhaleshile nka hashe! Anɨ nɨɨnɨ ɨndi Mwizilaeeli afume mu mpaapo ya Abulahaamu, ɨshikholo ɨsha Benjamiini. 2 ɄNgʉlʉbhɨ saga abhaleshile abhantu bhaakwe ɨbho ahabhasaluuye sha‑asɨɨle hubhapele. Wɨlɨ, saga mumɨɨnye ɨNsimbo ɨMfinjile ɨsho ziyanga hu nongwa ya nʼkuwi ʉEliya, ɨsho ahabhataakile aBhaizilaeeli hwa Ngʉlʉbhɨ? 3 Ahaga, “Wee Mwɨnɨ, abhantu ɨbha bhabhagojile abhakuwi bhaaho na‑anangaanye ɨvipuuto vyaho. Anɨ nɨmwene ɨnsyalile, hwope nanɨ bhahwanza hungoje!” 4 Wɨlɨ, ʉNgʉlʉbhɨ ahamʼmwamuuye yeenu? Ahajile, “Ɨhwibhɨshɨɨye abhalume ɨelufu pʉnga (7,000) hu Izilaeeli ɨbho saga bhahumʼpuuta ʉngʉlʉbhɨ ʉBaali.”

5 Hwope ɨshi sha shɨɨsho zili hu habhaazyo ɨha, bhalɨɨho abhantu bhashe ɨbho bhasyalile ɨbho ʉNgʉlʉbhɨ abhasaluuye hu mpyana yaakwe. 6 Bhasaluliilwe hu mpyana ya Ngʉlʉbhɨ, ɨshi saga bhafyʉlwa hu nongwa yɨ njendo zyabho. Nkashele bhafyʉlwaga hu nongwa yɨ njendo zyabho, ɨshi ɨmpyana saga yabhanga mpyana nantele. 7 Ɨshi zili ɨshi, aBhaizilaeeli bhahanzile huwaaje ʉgolosu, leelo saga bhahawaajile. Leelo ɨbho bhahasaluliilwe nʉ Ngʉlʉbhɨ, bha bhɨɨbho bhahawaajile. Leelo abhanjɨ bhonti ɨbho bhahasyalile, ʉNgʉlʉbhɨ ahabhabhomba huje bhabhe na mooyo amakhome, 8 nanshi ɨNsimbo ɨMfinjile sha ziyanga,

“ɄNgʉlʉbhɨ ahabhabhomba huje bhabhe na mooyo amakhome,

ahabhazijile amaaso huje bhagandi alole,

nantele ahabhadindile amakutu huje bhagandi ahwʉmvwe,

sha shɨɨsho bhali afishe sanyʉʉnʉ.”

9 Wope ʉmwɨnɨ ʉDaudi ahajile,

“Lwa bhabhomba ɨvikulukulu vyabho,

ʉNgʉlʉbhɨ agalulanye vibhe lwonzo na hwonzwe,

ʉlwonzo ʉlwa hubhonze na hubhafunde.

10 Amaaso gaabho giimwe ʉlukhozyo,

huje bhagandi alole hohonti nantele,

gope amasana gaabho gagondane lwonti

hu mayɨmba agɨ nsiku nɨ nsiku.”

Akhaane hwa Bhaizilaeeli huli nsayo hwa bha saga Bhaizilaeeli

11 Ɨshi, ɨbhʉzɨɨlɨzya nantele, aBhaizilaeeli bhahabʉmɨɨye na‑agwe lwonti? Ndaali, nka hashe! Leelo, hu nongwa yɨ mbiibhi zyabho, ʉfyʉli wubhɨnzɨɨye abhantu bha saga Bhaizilaeeli, huje aBhaizilaeeli bhabhalolele ɨjɨɨla. 12 Ɨshi, nkashele abhantu bha saga Bhaizilaeeli bhahambɨlɨɨye ɨmpyana ɨngoosi pɨpo aBhaizilaeeli bhahanʼkhaanile ʉMʼfyʉli, bhahayambɨɨlɨla ɨmpyana ɨngoosi tee, aBhaizilaeeli bhonti lwa bhafyʉlwa.

13 Ɨshi, ɨyanga naamwɨ mwa saga muli Bhayahuudi. Lyoli ʉNgʉlʉbhɨ ahansonteleziizye ɨmbe nʼsontwa hu nongwa ya bhantu ɨbho saga Bhayahuudi, anɨ ɨhuyimwamiha ɨmbombo ɨyo ʉNgʉlʉbhɨ ahubhabhombela amwɨ ashilile huliinɨ. 14 Ɨsʉʉbhɨla huje, lumo aBhayahuudi abhamwetu bhanza hubhalolele ɨjɨɨla amwɨ hu gaala ɨgo ʉNgʉlʉbhɨ ahubhabhombela huje, bhamo muuhati yaabho bhafyʉlwe. 15 Enya, aBhayahuudi lwa bhahanʼkhaanile ʉYeesu, ʉNgʉlʉbhɨ wope ahabhakhaanile abheene, ahɨtɨɨhana na bhantu bha saga Bhayahuudi. Ɨshi, hu habhaazyo ɨho ʉNgʉlʉbhɨ ahayihubhɨɨtɨha aBhayahuudi nantele, hwahayibha nanshi huje abhafwe bhazyʉshɨle. 16 Nkashele ʉmuntu ahumʼfumizya ʉNgʉlʉbhɨ ɨviyabho vyakwe ɨvifinjile ɨvya hwande, ɨshi ɨviyabho vyakwe vyonti vibha vya Ngʉlʉbhɨ. Nantele, nkashele ʉmuntu ahumʼfumizya ʉNgʉlʉbhɨ amalandazi agɨ mizeyituuni, ɨpo zyope ɨnsamba zyakwe zibha mfinjile.

17 Amwɨ mwa saga muli Bhaizilaeeli muli nanshi ɨnsamba ɨzya mwi‑izeyituuni ɨlya mwi‑igona. ABhaizilaeeli bhali nanshi ɨnsamba ɨzya mwi‑izeyituuni lya litotiilwe. Amwɨ musopehɨɨnywe mwi‑izeyituuni lya litotiilwe ʉmwo ɨnsamba zimo zitemwilwe. Mwɨ‑ɨlyo muhwambɨɨlɨla ɨnsayo ɨzyo zifuma mwi‑izeyituuni ɨlyo litotiilwe. 18 Ɨshi, amwɨ mugandi asyonshele ɨnsamba ɨzyo zyahatemwilwe. Nantele muleshe ahwibaade, leelo mumanye huje amalandazi saga gahubhasʉʉbhɨla amwɨ, leelo amwɨ mwɨmwɨ muhugasʉʉbhɨla amalandazi. 19 Lumo mubhajiiye ayanje huje, “Ɨnsamba ɨzyo zyahatemwilwe, huje anɨ ɨnsopeehanywe ɨpo ɨnsamba zyahatemwilwe.” 20 Ɨgo gɨ lyoli. Ɨnsamba ɨzyo zyahatemwilwe hu nongwa ya saga zyahali nʉ lwɨtɨho, leelo aawe ʉsopehɨɨnywe ni‑ikwi hu nongwa yɨ lwɨtɨho lwaho. Ɨshi leelo ʉleshe ahwibaade, leelo ʉmʼmwogope ʉNgʉlʉbhɨ. 21 Nkashele ʉNgʉlʉbhɨ wabhafunda aBhayahuudi ɨbho bhali nanshi ɨnsamba ɨzya hu wandilo ɨzi‑ikwi, lyoli hwope nawe abhajiiye hufunde.

22 Enyi ɨsho ʉNgʉlʉbhɨ ahubhabhombela aminza abhantu abhanjɨ, nɨ‑ɨsho ahubhafunda abhantu abhanjɨ hu lufundo ʉlukhali! Ʉmwene ahubhapeela ʉlufundo ʉlukhali ɨbho bhakhaana humʼmwɨtɨshe, leelo huliiwe ali nʼtonsu nkashele ʉjendeelela humʼmwɨtɨshe. Leelo nkashele waaleha humʼmwɨtɨshe, nawe ʉnza‑adumulwe. 23 Bhope aBhayahuudi ɨbho nkashele bhahwiweezye ʉmwoyo na‑apatiihanywe nʉ Ngʉlʉbhɨ, bhanza‑asopehwe nantele mwi‑ikwi ɨli‑izeyituuni, pɨpo ʉNgʉlʉbhɨ ali ni‑ikhone ɨlya hubhasopeehanye nantele. 24 Amwɨ mwa saga muli Bhayahuudi ɨbho muli nanshi ɨnsamba ɨzya mwi‑izeyituuni ɨlya mwi‑igona, mwahadumuliilwe na‑asopeehanywe mwi‑izeyituuni lya lyahatotiilwe, ɨho hantu hajenu abhombeshe. Mumanye huje saga mbombo home hwa Ngʉlʉbhɨ aweelele hubhasopeehanye aBhayahuudi bha bhali nanshi ɨnsamba ɨzya mwi‑izeyituuni zya zihwanziwa mwi‑ikwi lyakwe!

ɄNgʉlʉbhɨ ali nɨ nkʉmbʉ hwa bhantu bhonti

25 Bhooziwa bhamwetu, ɨhwanza mumanye ɨlyoli ɨnɨ ɨyo ɨfisiilwe, huje musahahwilole huje muli nɨ njeele tee. Ɨlyoli ɨyo ɨya Ngʉlʉbhɨ ya yɨɨnɨ, aBhaizilaeeli bhamo bhahali na mashento hu habhaazyo lwene, afishe hu habhaazyo ɨho ɨmbaazyo yonti ɨya bhantu ɨbho saga Bhaizilaeeli lwa bhambɨlɨɨye ʉfyʉli. 26 Na hwi‑idala ɨlyo, aBhaizilaeeli bhonti bhahayifyʉlwa. Nanshi ɨsho ahayanjile ʉNgʉlʉbhɨ mu Nsimbo ɨMfinjile huje,

“ɄMʼfyʉli ahayifuma hu Sayuuni,

ahayihuyibhɨɨha ɨmpaapo ɨya Yaakobo huje ɨgandi hunʼkhaane ʉNgʉlʉbhɨ.

27 Ɨpo ilagano lyanɨ nabho lɨnza‑alʉnjɨshe,

hu habhaazyo ɨho ɨnza hubhakhobhoshele ɨmbiibhi zyabho.”

28 ABhaizilaeeli lwa bhahakhaanile ɨNongwa ɨNyinza ɨzya Yeesu, bhahahwibhɨɨha bhalʉgʉ bha Ngʉlʉbhɨ. Leelo ɨnongwa ɨnɨ yabha nɨ zya pa mwanya huliimwɨ amwɨ mwa saga muli Bhaizilaeeli. Hwope ɨsho, ʉNgʉlʉbhɨ asɨɨle abhagɨɨne ɨbho, alɨngaane na hubhasalule abhamaama bhaabho na‑abhɨɨshe ilagano nabho. 29 ɄNgʉlʉbhɨ lwa wabhasalula abhantu bhaakwe na hubhasaye, saga abhajiiye agalulanye. 30 Ɨmandɨ, amwɨ mwahali saga muhunʼtiniha ʉNgʉlʉbhɨ, lyoli ɨshi ʉNgʉlʉbhɨ abhalolɨɨye ɨnkʉmbʉ pɨpo aBhaizilaeeli saga bhahunʼtiniha. 31 Enya, shɨɨsho ɨshi saga bhahunʼtiniha huje amwɨ mulolelwe ɨnkʉmbʉ ya Ngʉlʉbhɨ, ɨpo pamandɨ bhope bhalolelwe ɨnkʉmbʉ nanshi amwɨ. 32 ɄNgʉlʉbhɨ, yʉʉyo ahabhaleshile abhantu bhajendelelaje asinte humʼmwɨtɨshe huje abhalolele ɨnkʉmbʉ abhantu bhonti ɨbho.

ɄNgʉlʉbhɨ asayiwaaje

33 Aha! Weenu abhajiiye amanye ɨsho wuli ʉtabhazi, ʉtengamazu nʉ manyiihanyi ʉwa Ngʉlʉbhɨ? Nantele, weenu wa‑abhajiiye amanye ʉlongwe lwakwe awe ayanje idala ɨlyɨ bhomvi waakwe?

34 “Nʉʉmo ʉmuntu ʉyo agamɨɨnye ɨgo ʉMwɨnɨ ʉNgʉlʉbhɨ asɨɨbha,

nantele nʉʉmo ʉmuntu ʉwa humʼmwavwe ɨnsɨɨbho.”

35 “Wɨlɨ, weenu ʉmuntu wa‑ahanʼkhopɨɨye ʉNgʉlʉbhɨ ahantu hohonti,

ɨho ʉmwene ʉNgʉlʉbhɨ akhondɨɨye aweezye?”

36 ɄNgʉlʉbhɨ ya yʉʉyo wa‑ahapelile ɨvintu vyonti hwi‑ikhone lyakwe.

Nantele hwi‑idala lyakwe, ɨvintu vyonti vijendeelela abhe,

nantele ɨvintu vyonti vilɨɨho hu nongwa yɨ mwamu waakwe.

ɄNgʉlʉbhɨ asayiwaaje wiila. Aameni!