ɄPaulo ahwiyʉʉmɨla pitagaalila lya mwɨnɨ ʉAgilipa
26
Ɨpo ʉmwɨnɨ ʉAgilipa ahamʼmʉʉzya ʉPaulo ahaga,
“Ɨshi ʉyɨtɨshɨlɨɨlwe ahwiyʉʉmɨle weewe.”
Ɨpo ʉPaulo ahagolosya ɨnyoobhe hu mwanya.
Ahanda ahwiyʉʉmɨle ahaga,
2 “Wee mwɨnɨ Agilipa,
ɨhwiyʉmvwa huje,
ɨndi nʉ tʉʉyɨlo lwɨ‑ɨhwiyʉʉmɨla pitagaalila lyaho hu nongwa zya bhahuntaaka aBhayahuudi abhamwetu.
3 Ɨyanga ɨsho,
pɨpo aawe weewe ʉli mʼmanyiihanyi wɨ miiho geetu gonti agɨ Shiyahuudi na zyonti ɨzyo bhadaliihana.
Ɨshi ɨhulaabha aje,
ʉntejeelezye hu jimbiilizu.
4 ABhayahuudi bhonti bhamɨɨnye anɨ shinza afume hu waana waanɨ.
Bhamɨɨnye anɨ afume hu wandilo sha nahakulaga mu nsi yeetu ɨya hu Izilaeeli mwi‑ibooma ɨlyɨ Yelusaleemu.
5 Bhamɨɨnye anɨ hu maaha gaminji,
nantele nkashele bhagɨɨtɨha,
bhɨɨbho bhagaafumya ʉsimishizi huje,
anɨ nahalondolezyaga amiiho gonti agɨ shipʉga ɨsha Bhafalisaayo.
Ɨshipʉga ɨshi shihwifumya tee alondolezye ɨndajizyo ɨzya Ngʉlʉbhɨ ashile ɨvipʉga ɨvyɨnjɨ vyonti.
6 Zya zinaziizye huje ɨndongwe asanyʉʉnʉ,
lwʉ lusʉʉbhɨlo lwanɨ ʉlwɨ lufingo ʉlwo ʉNgʉlʉbhɨ lwa‑ahalapile hwa bhamaama bheetu.
7 Bhope abhantu abhɨ vikholo vyetu ishʉmi na vibhɨɨlɨ bhasʉʉbhɨla huje,
ʉNgʉlʉbhɨ ahayihubhabhombela nanshi sha‑ahalapile.
Sha shɨɨsho bhahumʼpuuta ʉNgʉlʉbhɨ hu dandamazu pasanya na nʉsiku.
Aawe wʉmwɨnɨ wɨ nshɨnshɨ,
ʉlusʉʉbhɨlo ʉlwu,
lwa luhubhabhɨɨha aBhayahuudi huntaake ɨleelo ɨli!
8 Yeenu amwɨ mulola hukhome ahwɨtɨshe huje,
ʉNgʉlʉbhɨ abhajiiye hubhazyʉsye abhafwe?
9 Ɨmandɨ nanɨ nahalolaga huje,
shinza abhombe lyolyonti ɨlya hunʼkhaane ʉYeesu ʉwa hwi‑ibooma ɨlyɨ Nazaleeti.
10 Ɨshi,
ɨgo ga gɨɨgo nahabhombile lwa nahali hu Yelusaleemu.
Ʉhwo nahabhakʉngaga abhooziwa abhinji mu hoobhe hwi‑ikhone ɨlya bhalongozi bha bhasayi bha Ngʉlʉbhɨ.
Nantele,
abhanjɨ lwa bhahalongwaga afwe,
nanɨ nahɨtɨhaga huje,
bhafwanje.
11 Nahabhombaga hahinji lwene hubhalavye mu nyumba zyonti ɨzya‑apuutile na‑amanyiilile huje,
lumo bhaganʼniga ʉYeesu.
Ilyoyo lyanɨ lyahali ligoosi tee hu bheene.
Hu nongwa ɨyo,
nahabhalaga hubhalavye na mu mabooma aganjɨ aga hu nsi ɨzyɨnjɨ.”
12 Ɨpo ʉPaulo ahajendeelela ayanje ahaga,
“Abhalongozi bha bhasayi bha Ngʉlʉbhɨ bhahampeelile ikhone igoosi ɨlya hubhalavye abhooziwa.
Isiku limo nahabhala hwope hwi‑ibooma ɨlyɨ Damesiki.
13 Ee mwɨnɨ,
lwɨ‑ɨndi mwi‑idala,
mu saala nʼtanda ɨya pasanya ɨshi,
nahalola ʉlukhozyo ʉlugoosi ashile ʉlukhozyo lwi‑isanya.
Ʉlukhozyo ʉlwo lwahandawushila tee anɨ afume hu mwanya peeka na bhamwetu ɨmbali zyonti.
14 Tenti tahagwa pa nsi.
Ɨpo nahʉmvwa izwi lihumbʉʉzya mu njango yeetu ɨyɨ Shiebulaniya liyiga,
‘Sauli!
Sauli!
Yeenu ʉhundavya?
Lwʉ‑ʉlwa naanɨ nɨMwɨnɨ,
ʉhwivwalazya weewe!’
15 Anɨ nahabhʉzɨɨlɨzya nahaga,
‘Mwɨnɨ,
aawe we naanu?’
ɄMwɨnɨ ahanaamula ahaga,
‘Anɨ nɨ Yeesu wʉ‑ʉhundavya.
16 Ɨshi bhʉʉha,
ɨmɨɨlɨla!
Ɨʼloleshɨɨye aawe huje,
ʉbhe mʼmomvi waanɨ,
nantele nʼsimishizi waanɨ.
Wahayibha nʼsimishizi wa gonti ɨgo ʉgalolile na gaala ga nahayihulanga.
17 Ɨshi,
ɨhusonteelezya hu Bhayahuudi abhamwenyu na hu bha saga Bhayahuudi.
Nantele nahayihufyʉla afume hwa bhantu ɨbha.
18 Ʉbhaavwe amanye ɨlyoli na‑aleshe ahwɨtɨshe ilenga.
Bheepe mu longozi wa Seetano ʉwɨ hiisi,
bhatʉʉshe mu wumwɨnɨ ʉwa Ngʉlʉbhɨ,
pɨpo mu wumwɨnɨ ʉwa Ngʉlʉbhɨ muli ʉlukhozyo hwa bhantu.
Bhabhombe ɨsho huje,
bhakhobhoshelwe ɨmbiibhi zyabho na‑abhe peeka na bhamwabho bhonti bha bhasangalusiiwe hwi‑idala ɨlya hunɨɨtɨshe.’ ”a
19 ɄPaulo ahajendeelela ayanje ahaga,
“Ɨshi mwɨnɨ Agilipa,
lwa naalola ɨndoleshelo ɨzyo afume hu mwanya,
nahamanya huje,
anɨ saga ɨhondɨɨye akhaane.
20 Lyoli nahanda abhalʉmbɨɨlɨle abhantu abha hwi‑ibooma ɨlyɨ Damesiki,
pamandɨ aBhayahuudi abha hu Yelusaleemu na hu mukowa gwonti ʉgwɨ Yudeeya.
Nantele nahabhalʉmbɨlɨlaga na bhantu bha saga Bhayahuudi.
Nahabhakhajilizyaga alaate ɨmbiibhi zyabho na hunʼgalushile ʉNgʉlʉbhɨ na‑abhombe zya zilolesya huje,
bhalaatile ɨmbiibhi zyabho.
21 Ɨzyo zya zyahambombile huje,
aBhayahuudi abhamwetu bhahate lwɨ‑ɨndi mu lubhaga lwɨ nyumba ɨmfinjile ɨya Ngʉlʉbhɨ,
na‑ajele hungoje.
22 Leelo,
ʉNgʉlʉbhɨ anavwizye afishe hu habhaazyo ɨha.
Nahasimishizyaga ɨnongwa ɨzya Yeesu ʉKilisiti hwa bhonti abhatabhazi na bhapɨɨna.
Nagamo amazwi aganjɨ gɨ‑ɨyanga,
lyoli gagaala ɨgo abhakuwi nʉ Moose ga bhahayanjile huje gahayifumila.
23 ɄMoose na bhakuwi bhonti ɨbho bhahayanjile huje,
ʉMʼfyʉli ahayilaviwa na‑agogwe.
Nantele ahayibha wa hwande azyʉshe afume hwa bhafwe huje,
alʉmbɨɨlɨle ɨnongwa ɨzyɨ fyʉli hwa Bhayahuudi na hwa bha saga Bhayahuudi.
Ʉfyʉli ʉwo lukhozyo hwa bhonti.”
24 ɄPaulo lwa‑ajendeelela ahwiyʉʉmɨle,
ʉFeesito ahayanga hwi‑izwi igoosi ahaga,
“Wee Paulo!
Ʉli mʼbwalusu!
Amanyile hwaho hwonti huhuteezya ɨnjeele!”
25 ɄPaulo ahamʼmwamula ahaga,
“Wee Feesito wɨ nshɨnshɨ,
anɨ saga ɨndi mʼbwalusu!
Amazwi gɨ‑ɨyanga gɨ lyoli,
nantele gɨ njeele zyonti.
26 Wope ʉmwɨnɨ ʉAgilipa agamɨɨnye shinza amazwi ɨga.
Nanɨ ɨmɨɨnye lwonti huje,
hwɨ‑ɨgo nalimo nka lyeka lya saga alimɨɨnye,
pɨpo gonti gahabhombɨɨshe pa pazelu.
Hu nongwa ɨyo ɨmbajiiye ayanje pitagaalila lyakwe sinta wooga.”
27 Ɨpo ʉPaulo ahamʼmʉzɨɨlɨzya ʉmwɨnɨ ahaga,
“Mwɨnɨ Agilipa,
bhʉlɨ,
ʉhugɨɨtɨha ɨgo abhakuwi bhahayanjile?
Anɨ ɨmɨɨnye huje ʉhugɨɨtɨha.”
28 Wope ʉAgilipa ahamʼmʉzɨɨlɨzya ʉPaulo ahaga,
“Bhʉlɨ,
ʉyiga ʉnza hungalulanye aje,
ɨmbe mwoziwa hu habhaazyo hashe nanshi ɨha?”
29 ɄPaulo ahamʼmwamula ahaga,
“Ɨhunʼnaabha ʉNgʉlʉbhɨ aje,
hubhe hu habhaazyo ahadoodo awe ahatali,
aawe peeka na bhantu bhonti ɨbha bha bhahuntejeelezya sanyʉʉnʉ,
mubhe nanshi anɨ shɨ‑ɨndi,
leelo sinta apinywe na manyololo ɨga.”
30 Ɨpo ʉmwɨnɨ ʉAgilipa,
ʉnʼgoosi ʉwɨ mukowa ʉFeesito,
ʉBeenike peeka na bhanjɨ bha bhahakhɨɨye peeka nabho,
bhahɨmɨɨlɨla na‑asogole mwi‑ikoloti liila.
31 Lwa bheepa paala,
bhahabhʉʉzanya bheene bhahaga,
“Ʉmuntu ʉnʉ lyoli saga abhombile lyolyonti lya likhondɨɨye hunʼkʉnje mu hoobhe awe hunʼgoje.”
32 Ʉmwɨnɨ ʉAgilipa ahamʼmʉʉzya ʉFeesito ahaga,
“Ʉmuntu ʉnʉ nkashele saga wapilulaga ɨnongwa yaakwe huje,
ɨbhale alongwe hwa mwɨnɨ ʉnʼgoosi ʉKayisali,
handɨ ayiguliilwe.”