Yaŋhooɓa moondiɗ ne a haad Kanaan
31
1 Kaɗta po Yaŋhooɓa kerahha ini kuɓuuciŋ Laban meeɗ woo, an : « Yaŋhooɓa ɓayiɗ raak-raakiŋ baab ɓoo jen po wa tahiɗ ɗe raak. » 2 Ŋ ɗooƴ ineem Yaŋhooɓa nammba hot ne findi Laban mandee na ɗe, a mandisɗi ɗaa. 3 Nikiɗi woosa Yaŋhooɓa ne : « Gurda fu haad kur ɗu, nga ɓi kahan baab ɗu, ŋ hey rise na ɗa. »4 Waam raak Yaŋhooɓa na gat ca ŋ yohon ca, a nakohha ɓeeɗkiɗu ɓitiɓ ciŋ ɗe Rasel na Leya ; 5 a woosa ɓa ne : « Ŋ markiɗ po ŋ hotiɗ ne baab ɗu mandisɗi nga so findi a mande. Waaye Koohiŋ baab ɓoo yii na so. 6 Ɗu inhiɗ ne ŋ pangkiɗiɗ ɗe findi ŋ minoh, 7 hondohɗi a worra so, a ɓoƴsohha wirndiŋ ngo waas ndaŋkiyaah, waaye Kooh faɗɗi ɗe ne a tum mbo miskiɗ. 8 A woosa so ne ɗoopaat ci tap-tap ci ceɗ wirndiŋ ngo ɗah, ndaamuuci jen na rime raakiɗ tap-tap. A woosa ne ci fiis-fiis ci ceɗ wirndiŋ ngo ɗah, ndaamuuci jen na rime raakiɗ fiis-fiis. 9 E Kooh naaf gatiŋ baabiŋ ɗu, a eɗta so wa.
10 Ŋ jamanooni ɗoopaat ci na rapke, ŋ hotta ŋ ɗooƴ heeƴ ne suket ci na rape jen nikee njeenje raakiɗ tap-tap mbaa fiis-fiis. 11 Weɗ malaakaaniŋ Kooh woyoh ne : “ Yaŋhooɓa ! ” Ŋ woosa ɗe ne : “ Ee mi yi kerah ɗa. ” 12 A woosa so ne : “ Marka, ɗoopaat ci na rape jen ca njeenje, raakiɗ tap-tap mbaa fiis-fiis, laam ŋ hotiɗ findi Laban na tumohe na ɗa. 13 Ñam Koohi teeɓkee ɗa ŋ Betel ŋ ɗiska fu yipee atoh fa, fu yiiffa diwliin nga, te fu gappa so mbaɗi. Ŋ ɗiski wa nik ndii, faɗa kur kii, fu haad kur ɗu. ” »
14 Wa Yaŋhooɓa woo woo keem, Rasel na Leya loffa ɗe ne : « Ɓoo raakisɗi ɓak na in lamaah ŋ kahan baabiŋ ɓoo. 15 Ɓoo mand na jaambur nga ɗe ; laam a tooniɗ ɓoo po a ñamiɗ candoomi. 16 Mbaa, in nu Kooh naafoh nga ɗe ɗah, a wiŋ ɓoo na kuɓuuciŋ ɓoo ; tuma ini Kooh nak ɗa. »
17 Weɗi Yaŋhooɓa kooɗkoh, a rapiɗta ɓitiɓ ciŋ ɗe na kuɓuuciŋ ɗe ŋ ngeelemb ca, 18 a nammba ɓay ɗoopaat caŋ ɗe na in ca a raakoh Paddan-Aram jen ne a dokuk kahan baab ɓa Isaahha ŋ Kanaan. 19 Waam raak Laban kaɗiɗ hufa find caŋ mbaal caŋ ɗe. Rasel tondukka nga, a rokka in ca pestuuɗ ca baab ɓa ambee ne ceɗ kooh ciŋ ɗe. 20 Yaŋhooɓa nammba inah ne Laban yi ɓaah ŋ cuuɓiŋ Aram ci nikɗi nga, a moonnda ɗe. 21 A saandohha na ina a raakoot jen, a huussa kala na woyse Efraat po a pullaa, a yurahha ŋ ɓak tangooca nik ŋ Galaad.
22 Yaŋhooɓa cootiɗ po wa raakka neeh kaahay, Laban hanndaa woyu. 23 A jaarra hun na ɓooɓaŋ ɗe, ɓa taambɗeeɗa Yaŋhooɓa ini ree neeh yasna-kanak (7), ɓa hannda ɗe rahas ŋ tangoocaŋ Galaad. 24 Waaye ŋ weka, Kooh teeɓukka Laban ngaŋ heeƴ, a woosa ɗe ne : « Wortuka woo Yaŋhooɓa in. »
25 Wa Laban rahas Yaŋhooɓa, raak ɗe yipiɗ ŋ tangoocaŋ Galaad ; Laban nammba yip ɗiip caŋ ɗe nga, a yi na ɓooɓaŋ ɗe. 26 Weɗi a kaɗoh ŋ Yaŋhooɓa, a woosa ɗe ne : « Fu haɓiɗ ye cii, fu na ɗembohee so ye fu coote ? Fu ɓayndoh kuɓuuciŋ ngo ɓitiɓ ci po haa ɓooɓi ambohu ŋ hiñoh. 27 Wee tah fu moonnda so, fu kaɗe te fu asukɗi so ? Fu woyeen ndo ɗah, ŋ heen ɗa faɗe fu kaɗ moɗoɗ, ŋ ɓend ɗa na ɓi ƴeek na haan na riiti. 28 Fu onɗi so sah, ŋ askoh na set ciŋ ngo na kuɓuuciŋ ngo ; fu tum naanoha kat ! 29 Ŋ miniɗ ɗa tum in sepƴiɗ, waaye Koohiŋ baab ɗu teeɓkiɗ to niinma, a woosa so ne : “ Wortuka woo Yaŋhooɓa in. ” 30 Fu seesuk haad kahan baab ɗu ɗah, fu miniɗ kaɗ sah, waaye fu rokoh kooh ciŋ ngo ye ? » 31 Yaŋhooɓa loffa Laban ne : « Ŋ neƴƴohee ne fu naaf kuɓuuciŋ ɗa. 32 Waaye ɓo' nu fu hot na kooh ciŋ ɗa ɗah, a pesisanɗi. Ŋ fiki ɓooɓiŋ ngo na ɓiŋ ɗa, marka, in nu fu hot na so te nik ne ya fu raaka ɗah, ɓayaa. » Waam raak Yaŋhooɓa inahɗi ne a Rasel rok ca.
33 Weɗi Laban aasoh ŋ ɗiipaŋ Yaŋhooɓa na waŋ Leya na caŋ ñaam ca kanak ca, a hotɗi in. A pulohha waŋ Leya, a aassa waŋ Rasel. 34 Raak Rasel ɓayiɗ kooh ca, a ɓekka ca ŋ teg ngeelemb, a ɓooffa nga. Laban marakka ɗiipa jen, a hotɗi in. 35 Rasel woosa ɗe ne : « Baab deey, fu na hee so hey ɗaase, ŋ minɗi kuruk laam ŋ hot naaw. » Nda a markoh po a yaaɓpa, a hotɗi ali in.
36 Weɗi Yaŋhooɓa ayrukoh, a ngasukka Laban an : « Ŋ tum ɗa ye, ŋ haɓiɗ wi nde ro' po fu taambɗee so mand an ? 37 Wi fu waak ŋ in ciŋ ngo po fu ƴutta, pulɗa ini fu hot ndii te fu raakkaa, degaa ndii ŋ fiki ɓooɓiŋ ngo na ɓiŋ ɗa, ɓa attee ɓoo. 38 Ŋ tumiɗ kiis ndaŋkiyaah kanak (20) ŋ kahan fu ; ali ɗoopaat moosɗi waanoh nga te ŋ moosɗi ɗa ñamɗoh kuy yino. 39 Yaa nu apseen nga ɗah, ŋ meeɗɗi ɗa ɗe kom, ñam meeɗa deguk, te ɗoopaat nu rokseen nga, wa nik na wek mbaa na noh, fu meeɗ to ɗe meeɗ wirndiɗuk. 40 Dohɗiŋ nohi meeɗ reeh nga so. Wek ree ɗah, soosi hee so ape ; ŋ minuu sah gind pani. 41 Kiis ndaŋkiyaah kanak (20) ceɗɗi, ŋ nikka ca ŋ kahan fu, ŋ pangkiɗiɗ ɗa kiis ndaŋkiyaah na kiis nikiis (14) ne fu on ndo kuɓuuciŋ ɗa kanak cii. Ŋ pangkiɗissa ɗa kiis yasna-yino (6) ne ŋ raak gat, waaye hondohɗi, fu ɓoƴsohiɗ wirndiŋ ngo waas ndaŋkiyaah. 42 Koohiŋ Ibrahiima, a nammba nik Yi baab ɓoo Isaahha nupe, a amboheeɗi so ɗah, fu heen ndo aañe yaah ɓarang. Waaye a hotiɗ findi ŋ yaaɓoh na ini ŋ op po tahha niinma, a atteesa. »
43 Wa a woo ineem, Laban loffa ɗe ne : « Ɓitiɓ cii, ɓa kuɓuuciŋ ngo, komaakcii, ɓa ɓiŋ ngo te gat cii, ñam raak ca. In nu fu hot ndii ɗah, wa ɓaah nga so ; ɗiski wa nik ndii fu liiɓiɗ moos ne ŋ hey tume kuɓuuciŋ ngo in, na komaakciŋ ɓa e ? 44 Mi yi kiim ɗa ɓoo tufkiɗ ambtiɗoh ndii mi na ɗa te wa raak ini seede'ana. » 45 Yaŋhooɓa parahha atoh, a yippaa, 46 a woosa ƴaaɓaŋ ɗe ne ɓa parhaat atoh ; ɓa parahha, ɓa juukka ca ɗisik yino. Ƴutta, ɓa ɓooffa nga jen, ɓa ñameeɗa. 47 Laban teekka ɗiska Yegaar-Sahaduta (juuk atoh seede ŋ peɗmiŋ ɗe), Yaŋhooɓa nammbaa teek Galeed (juuk atoh seede ŋ peɗmiŋ ɗe). 48 Laban woyeen ne : « Juukiŋ atoh fii weɗi ini na hee nike seedeeni ŋ harmban mi na ɗa woti. » Weɗ tah wa teekuusa Galeed. 49 Wa teekissuuɗ Mispa (ɗisik markoha), laam Laban woyisseen ne : « Nikiɗi markaat ɓoo kanak baahiɗ ne ɓoo hotohisɗi ɗah. 50 Fu torhiɗ kuɓuuciŋ ngo, mbaa fu ɓay ɓitiɓ wiiriis fu deg nga ɓa ɗah, inha ne ali ɓo' nikɗi ŋ harmban mi na ɗa, a Kooh nikan seedeeni ŋ harmban ɓoo. » 51 Laban woyissa Yaŋhooɓa ne : « Juukiŋ atoh fii na atoh fi ŋ yip, 52 ceɗ ŋ harmban ɓoo, weɗ teeɓoh ne ŋ joyɗi ca cootuk ne ŋ yurhiɗ in moɗaaɗi nga ɗa te fu joyɗaa nam tum. 53 Koohiŋ Ibrahiima na yiŋ Nahora, kooh ciŋ baab ciŋ ɓa, nikaat seedeeciŋ ɓoo. » Yaŋhooɓa ginnja ŋ Kooh yi baab ɓa Isaahha nupe. 54 Ƴutta a puliɗta seeƴkaah wuu Kooh, a ɓeeɗukka ƴaaɓa jen, ɓa ñammba, ɓa neehha nga, ŋ tangoora.