Yaŋhooɓa kociɗ Esaaw ŋ barkeena
27
1 Wa Isaahha yaɓko, has caŋ ɗe neɓisɗi, kaɗta po a minisɗi sah hot, wa raakka mbeh a ɓeeɗukka saawaŋ ɗe an : « Esaaw ! » Yeem loffa ɗe ne : « Ee ñam yii ! » 2 Isaahha woosa ɗe ne : « Fu hot nga, ɗiski wa nik ndii ŋ mand na kurkiɗ nga. 3 Mbaa ɗah, ɓaya halliiniŋ ɗa na ɓis ciŋ ɗa fu kaɗ kaalsuka, fu kom mbo, 4 fu tikiɗ to tik neɓiɗ findi ŋ waaɗoha, ŋ ñam, ŋ eɗ ɗa barkeeni ndo ŋ kaanan ɗah. »5 Wa Isaahha woyee na Esaaw, Rebeka kerhee nga. Esaaw ɓayya halliina na ɓis caŋ ɗe, a cootta kaala. 6 Weɗ Rebeka ɓeeɗkoh Yaŋhooɓa a woosa ɗe ne : « Ŋ kerhiɗ baab ɗu woyeeɗa taambɗoh fu Esaaw ne, 7 a kaalsukɗaat ɗe, a tikiɗ ɗe tik neɓiɗ, a ñam, a eɗ ɗe barkeeni ŋ fiki Nikiɗi ndo a kaanan ɗah. 8 Sikɗuk ko, te fu tum ini maa hee ɗa woye. 9 Kaɗa gat ca fu kom mbo koteng kanak baahiɗ nga, ŋ tikiɗ baabiŋ ɗa tik neɓiɗ findi a waaɗoha ; 10 fu eɗ ɗe a ñam, a eɗ ɗa barkeeni ndo a kurkan nga ɗah. »
11 Yaŋhooɓa loffa yaay ɓa Rebeka ne : « Moo, Esaaw paariɗ te ŋ paarɗi ; 12 baab ɓoo laal lo yaah ɗah, a hey inhe ne maa ñaañohee ɗe, te ŋ kooɗohan alku nga waaye barke haa. » 13 Yaay ɓa woosa ɗe ne : « Alkeem hay ɗah, wa ambaat to, tuma ɗaa rek, kom mbo in ci ŋ woo ɗa. » 14 Yaŋhooɓa kaɗta ɓaya koteng ca, a eɗta yaay ɓa ca, yeem tikka ca findi baab ɓa waaɗoh. 15 Ƴutta, Rebeka ɓayya kulɓaacaŋ saawaŋ ɗe Esaaw ca uupee moɗ, raak ca na ɗe ŋ kahna, a ɓekiɗta Yaŋhooɓa ca. 16 A ɓayya ŋ und caŋ koteng ca a muurra yaah ciŋ Yaŋhooɓa na ɓaki raakeeɗi find ŋ mbooh kiŋ ɗe. 17 Ƴutta a eɗta ɗe mbuuru na kañam ka a tike.
18 Wa Yaŋhooɓa ɓay kañam ka, a kaɗta ŋ baab ɓa a woosa ɗe ne : « Baab ! » Isaahha loffa ne : « Ee, ñam yii. A fu ɓa ? » 19 Yaŋhooɓa woosa ne : « Ñam Esaaw saawiŋ ɗa, ŋ haɓɗiɗ ini fu nakee so, ɓoofa fu ñam, ƴut ɗah, fu eɗ to barkeeni. » 20 Isaahha woosa ɗe ne : « Moo fu tumoh na po fu arra malu ? » Yaŋhooɓa loffa ɗe ne : « E Koohiŋ ɗa Nikiɗi, tum po ŋ arra malu. » 21 Isaahha woosa ɗe ne : « Reɓa ndii ŋ saaɓiɗ ɗa, ŋ marak andi a fu Esaaw. » 22 Yaŋhooɓa reɓpa, baab ɓa saaɓiɗta ɗe a woosa ne : « Hoosoori, a wiŋ Yaŋhooɓa waaye yaah ci, e ciŋ Esaaw. » 23 A inhiseeɗi Yaŋhooɓa laam, yaah ciŋ ɗe muurkeen na find findi ciŋ Esaaw. Tahha po a eɗta ɗe barkeeni. 24 Waaye ndo a eɗan ɗe wa ɗah, a meekissa ɗe an : « Wa hooliɗ ne a fu Esaaw e ? » Yaŋhooɓa loffa ɗe : « Ee, a ñam. » 25 Isaahha woosa ɗe ne : « Deƴiɗ to ŋ ñam po ŋ min ɗa eɗ barkeeni. » Yaŋhooɓa deƴiɗta ɗe, a ñammba ; a nammba ɗe eɗ biiñ, a annda. 26 Ƴutta, Isaahha woosa ɗe ne : « Haya fu morgiɗuk ko. » 27 Yaŋhooɓa reɓpa, a morgiɗukka ɗe. Wa Isaahha amb hetaŋ kulɓaaca, a eɗohha ɗe barkeeni an : « Aah ! Hetiŋ kuɓkiŋ ngo mand na wiŋ bilaf fi Nikiɗi barke'iɗ.
28 Kooh yipkiɗaat maar ŋ yohon ciŋ ɗa,
te a baahiɗ merhey miŋ ca,
fu laayiɗ pees na biiñ.
29 Ɓi cuuɓ ñaamkaat ɗa,
ɓi heet ƴekɗaat ɗa,
fu adgoh ɓaah ciŋ ɗa,
kuɓuuciŋ yaayiŋ ɗa ƴekiɗ ɗa,
ɓo' nu waaɗiɗ ɗa moɗaaɗi ɗah, a alku'aat,
ɓo' nu waaɗiɗ ɗa moɗiɗ ɗah, a raakaat barke. »
30 Wa a ƴut eɗ Yaŋhooɓa barkeeni, yeem cootee coot rek, Esaaw pulohha kaala. 31 A nammba tik tik neɓiɗ, a kommbaa baabiŋ ɗe. Wa a ree a woosa ɗe ne : « Baab, ɓoofa fu ñam, fu eɗ to barkeeni. » 32 Isaahha meekissa ɗe ne : « A fu ɓa ? » A loffa ne : « Ñam Esaaw, saawiŋ ɗa. » 33 Isaahha feyuusa po a saakɗoheeɗa ; a woosa ne : « Moo, a ɓa kee kaala po a hayya a eɗta so ŋ ñammba raak ɗa hayɗi ? Yeem a yi ŋ eɗ barkeeni te wa hey nike na ɗe. »
34 Wa Esaaw kerah woo keem, keeñiŋ ɗe aayya, a leehkeeɗa ŋ ɗafka. A woosa baab ɓa ne : « Na so ! Nam mbo eɗ barke. » 35 Isaahha loffa ɗe ne : « Taambɗoh fu hayiɗ ndii a ñaañohha so po ŋ eɗta ɗe barkeeni ŋ joyee ɗa eɗ. » 36 Esaaw woosa ne : « A ɗalɗi tiikiŋ ɗe Yaŋhooɓa (ñaañohoh), a ñaañohiɗ to waas kanak, a adug ɓay waɗiŋ saawi ŋ nikoh, a yi a ɓayissiɗ barkeeni fu joyee so barke'iɗ. » A woosa baab ɓa ne : « Moo fu tasiɗɗi barkeeni fu min ndo eɗ e ? » 37 Baab ɓa loffa ɗe ne : « Ŋ tumiɗ ɗe kilifaaniŋ ɗa po ƴutiɗ, ŋ kiimɗiɗ ɗe pees na biiñ laayiɗ te a hey nike kilifaaniŋ ɓaah ciŋ ɗe, ŋ min ɗa ye tumiɗ ? » 38 Esaaw ɓaatta ndengɗuk nga an : « Fu min barke'ɗoh waas yino dong e ? Nam mbo eɗ barke, baab. » A ammba muhun ca a fuɗeeɗa. 39 Baab ɓa woosa ɗe ne :
« Fu hey use merhey mi baahɗi
na maari na pulohe ŋ ɗafki.
40 Fu na hee pesohe hiñoh
te a taambɗoh fu yilfan ɗa,
waaye mbeha fu ndengɗukohan
fu hey kaambsuke ini a raan ɗa. »
41 Barkeeni Yaŋhooɓa ɓayoh ŋ baab ɓa, weɗ tah po Esaaw ambiɗta ɗe aay-keeñ. A woosa ŋ ɗooƴ ce ne : « Baab mand na kaaniɗ, ruyiŋ ɗe reeh ɗah, ŋ ap Yaŋhooɓa. » 42 Wa Rebeka inah ina saawiŋ ɗe Esaaw nar tum, a nakohha ɓeeɗkiɗu Yaŋhooɓa, kuɓkiŋ ɗe ƴini, a woosa ɗe ne : « Ŋ ɗiski wa nik ndii, taambɗoh fu waaɗ ɗa ap ne a wirnduk. 43 Mbaa fu na hee tume an : Ara saandoh ɗiskaŋ taambɗoh ho Laban ŋ Haaraan, 44 fu ɓoofohaah nga po Esaaw giif ngaŋ ayrukiŋ ɗe. 45 Aay-keeñiŋ ɗe reeh po a alkoh ini fu haɓiɗ ɗe ɗah, ŋ hey woose ɓo' a kaɗ ɗa ɓaya ; ŋ waaɗɗi ɗu ñak kanak ŋ noh yino. »
Saandohaŋ Yaŋhooɓa ŋ Paddan-Aram
46 Wa Rebeka woo na Yaŋhooɓa po ƴutta, a woosa Isaahha ne : « Ɗiski ŋ nik kipes neɓisɗi so sagu ɓitiɓ ciŋ Esaaw ɓii, na cuuɓiŋ Hiti ɓa nikoh. Yaŋhooɓa nam ɓay ɓitiɓ nga ɓa ɗah, wa carissanɗi ŋ pese. »