Findi Ibrahiima romoh kehƴa a uumboh Saarata
23
1 Saarata pesiɗ kiis teemet na kiis ndaŋkiyaah kanak na yasna-kanak (127) a hannda kuruk nga. 2 A kaanoh ŋ Kiriyat-Arba, weɗ Hebron, ŋ kur kaŋ Kanaan. Ibrahiima miskiɗukka kakaan kaŋ Saarata ; a fuɗta ɗe lool. 3 Ƴutta, Ibrahiima faɗta fiɗaafa ŋ ɗiska wa nik, a kaɗta hotoha na cuuɓaŋ Hit ca.4 Wa Ibrahiima ree, a woosa ɓa ne : « Ŋ jaambur ŋ ɗooƴ ɗu, ŋ nikohaah nikohaah ŋ ndii, mi yii kiim ɗu ne ɗu on ndo ŋ waak ruy-ruyi mi na hee uumbohe fiɗaafiŋ ɓitiiso. » 5 Hit ca loffa Ibrahiima ne : 6 « Sikɗuka ini ɓoo na wee ɗa ; Kooh tumiɗ ɗa kilifa yakak ŋ ɗooƴ ɓoo, kon mbaa ɗah, kooɗa wi neɓ ɗa ŋ ruy-ruy ciŋ ɓoo, fu uumb ɓitiifu nga ; nama inah ne ali ɓo' heyɗi ɗa sangohe ɗiski fu joy uumb ɓitiifu. »
7 Wa Ibrahiima kerah woo keem, a kurukka, a hiirra ŋ fiki Hit ca genee ŋ kur ka. 8 Ƴutta, a hannda ɓa woo ne : « Nik ne ɗu teyɗukiɗ ne ŋ uumb ɓitiiso ndii ɗah, kiimaat Efron, kuɓkiŋ Sohar, 9 a faɗiɗ to huraŋ atoh faŋ ɗe nik ŋ Makpela, weɗaa ŋ sereendaŋ yohon ce ; kiimaat ɗe a toon ndo wa ŋ candoomiŋ wa po wa nik ruy-ruyi ŋ raakoot ŋ fikiiɗu. »
10 Wa Ibrahiima na wee, raak Efron ɓoofiɗ ŋ ɗooƴ ɓaah caŋ ɗe Hit ca. Ŋ fiki Hit ca cohee ŋ ɗiska jen, ŋ aasohaanaŋa kur ka, Efron loffa Ibrahiima ŋ ɗafka ne : 11 « On ndo ŋ woo ɗa kilifaani, ɓaya ɓay yohna na huraŋ atoh fa ; ŋ fiki ɓooɓiŋ ngo, ŋ on ɗa wa, fu tuma ruy-ruyiŋ ɓitiifu. » 12 Ŋ woo keem, Ibrahiima hiirissa ŋ fiki ɓooɓaŋ kur ka. 13 Ƴutta, a woosa Efron ŋ ɗafka ne : « Ɓoo kanaata nookoh, faɗa ŋ eɗ ɗa candoomiŋ yohni ; teya haalsi po ŋ min uumb ɓitiiso. » 14 Efron woosa ɗe ne : 15 « Kilifaani, yohni na care nguɗ haalisb teemet nikiis (400), ineem ye ŋ harmban mi na ɗa ? Kon fu miniɗ uumb ɓitiifu nga. » 16 Ibrahiima kerahha woo ka, a eɗohha candooma Efron woo ŋ fiki Hit ca, wa nikka nguɗ teemet nikiis (400) ŋ haalis, ɓeesuuɗ ŋ findi toonoh caam meeɗ tumoh. 17 Ibrahiima raakoh yohon Efron ɗaa, wa nikee ŋ Makpela, ŋ pulohaaɗ nohaŋ Mamre. Yohna, po ɗiska wa top, na kidig ca nikee ŋ ɗooƴa na huraŋ atoh fa ; 18 ca nikka raakuuɗaŋ Ibrahiima ŋ fiki Hit ca cohee ŋ aasohaanaŋ kur ka jen.