7
O sikepen ap kolende, kai o Debleske budran
1 Un pal kowa dikom me star bolepangren.
Kolla his tardo ap kol star rigja i phubjatar,
un rikran ko sorelo ducho pale,
hoi phurdell dran hake star rigja pral i phub.
Jon rikran les pale,
te phurdell lo gar pral i phub,
witar gar pral o baro pani,
witar gar pral i tsele ruka.
2 Un me dikom i wawar bolepaskres.
Kowa was kol rigjatar,
kai o kham pre djala.
Un job kras i sikepen ap kolende,
kai o djido Debleske koi hi.
Un job das soreles gole ap kol star bolepangre,
kolen i soor dino was,
te dukrenn le i phub un o baro pani.
3 Un job penas ap lende:
“Ma dukrenn i phub un o baro pani,
witar gar i ruka,
jaake rah har mer kram gar i sikepen glan ap i shere kolendar,
kai maro Debleske budran.”
4 Un me shunom kitse menshe ko sikepen lan.
Kolla his 144.000 (jek-sheel-te-star-deesh-te-star serja) menshe,
kai wan dran i tsele menshende,
kai wenna pal o Israeleskre deesh-te-dui tchawende.
5-8 Deesh-te-dui serja wenna dran o Juda.
Deesh-te-dui serja wenna dran o Ruben.
Deesh-te-dui serja wenna dran o Gad.
Deesh-te-dui serja wenna dran o Asser.
Deesh-te-dui serja wenna dran o Naftali.
Deesh-te-dui serja wenna dran o Manasse.
Deesh-te-dui serja wenna dran o Simeon.
Deesh-te-dui serja wenna dran o Levi.
Deesh-te-dui serja wenna dran o Issachar.
Deesh-te-dui serja wenna dran o Sebulon.
Deesh-te-dui serja wenna dran o Josef.
Deesh-te-dui serja wenna dran o Benjamin.
I patsle dran bud themma sharenn o Debles
9 Pal kowa dikom me bud menshen,
jaake bud,
te nai penell kek,
kitse jon hi.
Kolla wenna dran hako them,
haki natsjona,
haki harmenatsjona un hako rakepen.
Un jon his khetne tardo glan o rajeskro beshepaskro un glan ko terno bakro.
Len his parne ripja ap lende un bare patria an lengre wasta.
10 Un jon dan soreles gole:
“Mer sharah maro Debles,
kai ap o rajeskro beshepaskro beshdo hi un ko terno bakres!
Jon lan men win dran o tchilatchepen un o merepen.”
11 Un i tsele bolepangre his tardo trul o rajeskro beshepaskro un trul i tchatchepangre phurende un trul i star sorele bolepangre.
Un jon witsran pen glan o rajeskro beshepaskro tele o mujeha ap i phub,
un sharan o Debles.
12 Un jon penan:
“Hi mishto,
te giwas mer gilja maro Debleske,
hoi les hadenna,
un hoi les bares krenna.
Leskro railepen un goswepen hi baro.
Un les hi bari soor.
Hi mishto,
te parkras men pash leste,
un te sharas les,
kanna un hako tsireske.
Amen!”
13 Un jek kol tchatchepangre phurendar putchas mandar:
“Koon hi kolla,
kai hi len parne ripja ap lende?
Kai wan le?”
14 Un me penom ap leste:
“Miro rai,
tu djineh les.”
Un job penas ap mande:
“Kolla wan soreles palla lino,
un wan win dran ko pharo tsiro.
Un jon thowan pengre ripja,
un kran len parno an o terno bakreskro rat.”
15 Doleske hi le tardo glan o Debleskro beshepaskro un hi leskre rashaja an leskro kheer,
un hi leske koi o tselo diwes un i tseli rat.
Un kowa,
kai ap o Debleskro beshepaskro beshdo hi,
djiwell pash lende,
un dell jak ap lende.
16 Un jon hunte bokenn buder gar,
witar gar trushenn le buder.
Un o kham chatchrell len buder gar,
witar kek wawar tatepen.
17 O terno bakro,
hoi mashkral o Debleskro beshepaskro hi,
kowa dell jak ap lende,
har i bakrengro rai ap peskre bakre jak della,
un anell len pash o pani,
hoi o djipen della.
Un o Dewel khossell hake swaa ap lengre jaka tele.