3
I phurengre laba un o Debleskro Ducho
1 Tumer penans nai:
Kanna sharenn le pen pale glan mende.
Kowa krah mer gar.
Witar gar hunte anas mer tumenge lila,
kai dren tardo hi,
har mishto mari budi hi.
Wawar menshe krenn kowa,
mer hunte kras kowa gar.
Witar gar kamah tumendar,
te tchinenn tumer menge sawe lila.
2 Tumer han o feteder liil menge,
tchinlo an mare djia.
Ap tumende nai dikenn i tsele menshe,
har kram mer mari budi.
3 Dran mari budi wan tumer pash o Jesus Kristeste.
Un kanna han har i liil,
hoi wella o Jesus Kristestar.
Kau liil tchinas o Ducho o djido Deblestar,
un kek mensho.
Kau liil was gar tchinlo ap i barra.
Na-a.
Kau liil was tchinlo an i menshengre djia,
an tumare djia.
4 Mer patsah soreles,
te krell o Dewel sawo liil dran tumende.
Kau patsepen das men o Jesus Kristo.
5 Dran mari soor nai krams mer mari budi gar mishto.
Kai budi krah mer dran o Debleskri soor.
Un kowa,
hoi haiwah,
well o Deblestar.
6 Job kras dran mende peskre budepangre,
te sikras mer i menshende o newo drom,
kai o Dewel un i menshe mala wenna.
Ap o phuro drom hunte rikrenn le pen ap i tchinle laba.
Kol phure tchinle laba anenn i menshen an o merepen.
Ap o newo drom lenn le o Debleskro Ducho,
hoi dell len o djipen.
7 Kol phure tchinle laba,
hoi anenn i menshen an o merepen,
his tchinlo ap i barra.
Har anas o Mose i menshenge kol barra,
was leskro mui jaake railes,
te dikan nai i Israelitarja gar ap leste.
Jaake dikah,
ninna ap o phuro drom was o Debleskro railepen diklo,
ninna te djas ko railepen pal i tikno tsiro krik.
8 Kitse shukeder hi o newo drom,
kai lenn le o Debleskro Ducho!
9 Kau newo drom,
kai wenn i menshe tchatcho glan o Debleste,
hi bud bud shukeder har ko phuro drom,
kai djan i menshe nashedo,
ninna te was kote i tikno kotar railepen diklo.
10 Tchatchepah,
o railepen ap o newo drom hi bud bud bareder har ko railepen ap o phuro drom.
11 Kowa djas krik pal i tikno tsiro.
Har bud raileder hi kowa,
hoi atchella!
12 Mer djinah soreles,
te hi kowa jaake.
Doleske hi men kek traash,
te penas kowa jaake i menshenge.
13 Mer krah kowa gar har o Mose:
Kowa tchiwas i diklo glan peskro mui,
te dikenn kol Israelitarja gar,
har leskro railepen krik djas.
14 Kolengre djia wan har bar.
Ninna kau diwes haiwenn i bibolde gar,
hoi an o Moseskre lila tchinlo hi pral o phuro drom,
te shunenn le kol laba an i biboldengre kangria.
Kowa hi jaake,
har te well i diklo ap lengre jaka tchiddo,
te dikenn le gar.
O Jesus Kristo kokres nai lell ko diklo lengre jakendar tele.
15 Ninna kau diwes hi kowa jaake.
Te shunenn le o Moseskre laba,
hi ko diklo ap lengre djia,
te haiwenn le len gar.
16 Ap ko diwes,
kai mukenn i Israelitarja pengro drom un djan ap o Jesuseskro drom,
lell job ko diklo lendar krik.
17 Maro rai Jesus un o Debleskro Ducho hi jek.
Te djiwell o Debleskro Ducho an jekeste,
hi ko mensho buder gar pandlo,
un hunte djal buder gar ap o phuro drom.
18 Mer lauter,
kai patslo ham,
dikah o Debleskro railepen jaake mishto,
har te dikah an i dikepaskria.
Kek diklo hi ap mare jaka tchiddo.
Un har mer dikah ap leste,
wah mer bud un budeder jaake,
har job hi.
Kowa krell o Debleskro Ducho an mende.