4
O pantchto dikepen: i momelengri un dui djeteskre ruka
1 Un o bolepaskro, kai mantsa rakras, was pale un djangras man pre har dran o sopen, 2 un penas ap mande: “Hoi dikeh?”
Me penom: “Me dikau i momelengri kerdi dran sonakai. Ap late hi i tcharo. Koi pre hi efta momlia, hakeni i mujeha. 3 Un dui djeteskre ruka hi koi tardo, jek ap lakri tchatchi rig un jek ap lakri serwi rig.”
4 Un me penom ap o bolepaskro, kai mantsa rakrell: “Miro rai, hoi hi kowa?”
5 “Djineh gar, hoi kowa hi”, putchas lo mandar.
“Na-a, miro rai”, penom me.
6 (10b) “Kol efta momlia hi o baro Debleskre jaka, hoi lauter dikenn, hoi ap i phub djala.”
7-8 (11-12) “Un hoi hi kol dui djeteskre ruka”, penom me, “hoi tchatches un serwes pash i momelengri tardo hi, un hoi hi lengre dui kashtaa, kolengro djet an kol dui sonakangre koolab nashell?”
9 (13) Un job putchas: “Djineh gar, hoi kolla hi?”
Me penom: “Na-a, miro rai.”
10 (14) Job penas: “Kolla hi kol dui wi-rodede mursha, kolen o rai pral i tseli phub o djeteha dren makas, te krenn le leskri budi.”
Latche laba o mursheske Serubbabel
11 (6) Un o bolepaskro rakras pale ap mande un penas: O baro Dewel penell ap o Serubbabel: Kowa, hoi kameh te krell, nai kreh gar lurdentsa, witar gar dran tiri soor. Kowa krell miro ducho. Kowa penell o baro Dewel, ko rai pral o bolepen un i phub. 12 (7) Hadell pes tchomone bares har i berga glan tute, Serubbabel? Kowa hunte perella an peste khetne. Tu tchiweh miro kheer pale pre. Un ap ko tsiro, kai tchiweh o pralstuno bar pre, denn i menshe gole: Shukar, kowa hi shukar!
13 (8-9) Un o baro Dewel penas mange: O Serubbabel tchiwas i telstune barra miro kherestar jek ap o wawar. Un leskre wastentsa tchiwell lo i pralstune barra pre, te well o kheer kerdo.