2
O diwes, kai o Debleskri choli wella
1 Phurdenn an i phurdepangre!
Denn bares gole ap miri berga, koi berga Zion!
Trashenn, tumer lauter, kai djiwenn an o them Juda!
O diwes o baro Deblestar wella sik!
2 Kowa hi i kalo diwes, i tamlo diwes, pherde wolke.
Jaake sik har o kham pre djal pral i berge,
wenn bud bud lurde pral o them,
kolla hi jaake sorelo un jaake bud,
har gomme gar koi his,
un witar buder gar wella an kek tsiro.
3 Glan lende djal i jag un pal lende chatchell i phub.
Glan ko tsiro, kai wenn le, hi o them har o Debleskri baar Eden,
un te djan le pral wergel, atchell i diwjo paash them.
Kek nai nashell lendar krik.
4 Jon dikenn win har graja un nashenn har kurepangre graja.
5 Te stenn le pral i berge, hi koi gole har i gole, hoi i wurdja krenn,
un har i jag an o phuss,
awa, har sorele kurepangre, kai o marepaske rido hi.
6 Menshe an wawar themma trashenn lendar,
un lengre muja wenn parno.
7 Jon nashenn har sorele mursha,
un stenn pral i massurja har kurepangre;
kek lendar mukell peskro drom,
un djal gar tchatches witar gar serwes o dromestar tele.
8 Kek well o wawareske an o drom;
hakeno atchell ap peskro drom,
Kek charo nai rikrell len pre.
Dureder un dureder djan le.
9 Jon witsrenn pen ap o foro,
djan pre ap i massurja,
un dren an i khera.
Jaake har i tchorepaskro wenn le an i wochja dren.
10 I phub un o bolepen trissenna glan lende,
o kham un o tchona wenn kalo,
un i bolepangre momlia chatchenn buder gar.
11 O baro Dewel dell bari gole glan peskre kurepangre, te penell lo len, hoi te krenn le.
Bud bud hi le un len hi bari soor, un krenn, hoi lo lenge penell.
Awa, o diwes o baro Deblestar hi baro un pherdi traash.
Koon nai rikrell les win?
12 “Ninna kanna”, penell o baro Dewel,
“nai mukenn tumaro tchilatcho drom un wenn pash mande.
Awenn tumaro tselo djijeha, chan tchi un rowenn, denn gole i bibachtjatar!
13 Tserdenn tumare djia an kotja un gar tumare ripja!”
Un djan pale pash tumaro baro Debleste!
Les hi i baro dji, pherdo kamlepen.
Job well gar sik chojedo.
Leskro latchepen hi baro.
Un koi phagi, hoi kamas lo te dell, lell lo pale.
14 Koon djinell, te rikrell lo ninna kau kopo i phagi pale,
un mukell djob un drake bares te well,
te nai anenn tumer jarro un mool
o baro Debleske, kai hi tumaro Dewel.
15 Phurdenn i phurdepaskri ap i berga Zion!
Denn i menshen khetne gole!
Penenn lenge, te chan le tchi,
un sikrenn jaake, te khaitell lenge lengri doosh.
16 Kharenn i menshen khetne,
un thowenn tumen jaake har glan tchinlo hi, te wenn djudjo glan o Debleste.
Awenn halauter khetne, tumer phure, tchawe un ternepen!
O bijabeskro te djal dran peskri isema, un leskri pirni dran kolakri.
17 Penenn i rashajenge, kai budrenn o baro Debleske,
te rowenn le ap i platsa mank o Debleskro kheer un leskri chatchepaskri,
un penenn: Baro Dewel, kre tiro dji pre tire menshenge!
Ma muk i menshen dran wawar themma men te praassell un sanell pral mende.
Hoske te penenn le: ‘Kai hi lengro Dewel?’
18 Palle well o baro Debleskro kamlepen bares an leste peskro themeske,
un job krell peskro dji pre peskre menshenge.
19 Job penell lenge: Tchatchepah, me bitchrau tumen djob, mool un djet
jaake bud, te nai chan tumen tchalo.
Un i menshe dran wawar themma nai praassenn tumen buder gar.
20 Un me tradau kol bud lurden krik tumendar, kai wenn koi rigjatar, kai norden hi.
Kolla lendar, kai djan glanstunes, tradau an o Mulo Baro Pani,
un kolla, kai wenn palstunes, tradau an o Mashkralstuno Baro Panib;
un i tsele wawar lurden tradau an i diwjo tato them.
Kote merenn le. Un lengri khand djal pre.
Jaake lenn le pengri phagi ko bud tchilatchepaske, hoi le kran.
21 Tu them, ma dare!
Ab bachtelo un giw koleske,
hoi o baro Dewel tuke lauter kras.
22 Tumer diwje vieche, ma darenn!
I phub well senelo,
un i ruka hidjrenn pengre rukengre.
Dell bud faige un drake.
23 Un tumer menshe dran o foro Zion, awenn bachtelo,
un giwenn pral kowa, hoi kras o baro Dewel.
Job hi tumaro Dewel,
un dell tumen doha brishin ap o tchatcho tsiro, har lo kras glan kowa,
24 te wenn i djobengre khera pherdo djob,
un budeder har doha mool un djet koi hi.
25 Un me dau tumen kol bersha pale, hoi nashran,
har i bud stepangre lauter chan.
Me homs, kai kolen lauteren mank tumende bitchrom.
26 Tumen well doha chapaske,
un tumer sharenn o baro Debles, kai tumaro Dewel hi,
un kras bud sorelo koowa mank tumende.
Un tumer, mire menshe, wenn buder gar praassedo.
27 Un tumer Israelitarja dikenna, te hom me mashkral tumende.
Me, o baro Dewel, hom tumaro Dewel un kek wawar.
Un tumer, mire menshe, wenn an kek tsiro buder praassedo.