10
I Israelitarja mangenn chochene deblen an
1 O Israel hi har i sasto drakengro ruk,
ap koleste bud drake bares wenn.
Un har i menshe brawelo un brawleder wan,
kran le penge bud un budeder altare i chochene deblenge.
Kote, kai o them o latcheder his,
tchiwan le i shukar bare barra lenge pre.
2 Lengre djia hi pherdo chochepen.
Kanna well lengri doosh pral lende.
Lengre altare wenn khetne phagedo,
un kol pre-tchidde bare barra wenn tele dino.
3 Palle hunte penenn le: “Mer shunam gar ap o baro Debleste,
doleske hi men kanna buder kek baro rai.
Ninna te wals men jek baro rai,
nai krals lo buder tchi menge!”
4 I bare raja krenn bud laba,
denn pen chochene sobja,
un krenn pen wawar thementsa khetne.
Kowa, hoi kharenn le ‘tchatchepen’,
hi har ko tchilatcho senlepen,
hoi well baro ap i hachetikri phub un anell o merepen.
5 I menshe an o foro Samaria darenn, te well ko sonakaskro terno gurum krik lino,
hoi hi tardo an o foro Bet-Awen.
Jon rowenna har pal jekeske, kai meras.
Leskre rashaja trissenna trul leskro shukapen,
te well lo lestar krik lino.
6 Awa, ko terno gurum well an o them Assur anlo,
un kote well lo o baro rajeste, o Jareb, dino.
Hawi ladj o Efrajimeske!
Hawi ladj well ap i Israelitarja, kai patsan, te hi le jaake gosewo!
7 O rai pral o foro Samaria hi buder gar koi,
har i patri ap o pani was lo krik hidjedo.
8 Khetne dine wenn i mulne platsea,
kai i Israelitarja i chochene deblen an-mangan,
un o baro Deblestar tele peran.
Subjengro senlepen un subjengre burra wenn bares ap lengre altare.
Un jon penenna: Tumer bare un tikne berge, perenn pral mende, un tchakrenn men!
9 O baro Dewel penell ap i Israelitarja:
Tumare phure hadan pen pral mande an o foro Gibea.
Fun ko tsiro mukan tumer pale te pale miro drom.
Doleske well an o foro Gibea o kurepen pral kol tchilatche menshende.
10 Man hi an miro dji, te dap len kote dawa.
Me anau lurden dran wawar themma khetne,
te lenn le len pandlo,
kol dui doshenge, hoi le ap pende anan.
11 O Efrajim his i terni grumni
hoi budras mishto, te dell li o djob win.
Har dikom lakro shukar meen,
tchiwom lake i kasht pre, te dap lat i phareder budi:
O Juda te witsrell i phub trujel,
un o Jakob hunte krell i phub tchatcho.
12 Djiwenn an o tchatchepen,
te well latchepen dran tumaro djipen!
Krenn tumaro dji newes pre o baro Debleske,
jaake har i hacho i newo kotar phub pre krell o djobeske.
Kanna hi o tsiro, te rodenn man, o baro Debles.
Palle wau un tchorau o latchepen pral tumende win har i brishin.
13 Tumer kran o tchilatchepen,
un tumaro djipen anas tchilatcho koowa win.
Un tumer chan, hoi dran tumaro chochepen win was.
Tumer djan pal tumaro shero,
un dikenn ap tumare bare un sorele kurepangre, te wenn le tumenge ap i rig.
14 Doleske well i kurepaskri gole shunlo an tumaro them.
Un tumare tsele sorele forja wenn khetne dine.
Tumenge djal jaake har o foreske Bet-Arbeel,
hoi das o rai Shalman paash an o kurepen,
har wan i daja mulo dine khetne pengre tchawentsa.
15 Jaake djal tumenge an o foro Betel ninna.
Kowa well dran tumaro baro tchilatchepen!
Te djal o kham pre ap ko diwes, hi trujel o baro rajeske dran Israel.