46
1 Kawa penell o baro Dewel, maro rai: Ko wudar glan i tikni glanstuni platsa ap koi rig, kai o kham pre djal, kowa atchell pandlo ap kol shob diwessa, kai budrenn le. Ap o eftato diwes – ko Debleskro diwes – well lo pre kerdo, ninna ap o diwes, kai o newo tchon diklo well. 2 Un o rai djal fun i bari glanstuni platsa dren an i wudareskri halla un atchell tardo pash i pesse kashta, hoi hi tchatches un serwes o wudarestar. Un i rashaja lenn leskre vieche, hoi lo o Debleske dell, un marenn len, un anenn len glan o baro Debleste, kolen kai wenn tseles chatchedo, un kolen, kai wenn chalo glan o Debleste. Un o rai atchell an o wudar un mangell o baro Debles an. Un palle djal lo pale win. O wudar atchell pre, bis te well i rati.
3 Ninna i Israelitarja wenn glan kau baro wudar ap o Debleskro diwes un ap ko diwes, kai well o newo tchon diklo, un mangenn o baro Debles an.
4 Kol vieche, hoi anell o rai o baro Debleske ap o Debleskro diwes, te wenn le leske maredo un tseles chatchedo, hi shob terne saste bakre, un jek murshkano bakro. 5 Un ko chapen dran djob, hoi glan o Debleste anlo well, hi 12 (deesh-te-dui) kilogramme jarro ko murshkano bakreske, un jaake bud jarro, har kamell lo, i terne bakrenge. Un jek khoro djet pash hake 12 (deesh-te-dui) kilogramme jarro.
6 Ap o diwes, kai well o newo tchon diklo, anell o rai jek terno gurum un shob terne bakre – halauter hunte wenn sasto – te wenn le maredo un chatchedo o Debleske. 7 Koi pashel anell lo 12 (deesh-te-dui) kilogramme jarro ko gurumeske un 12 (deesh-te-dui) kilogramme jarro ko murshkano bakreske, un jaake bud jarro, har kamell lo, i terne bakrenge. Un jek khoro djet pash hake 12 (deesh-te-dui) kilogramme jarro.
8 Un ap ko emligo drom, kai djas o rai dren an koi wudareskri halla, djal lo pale win.
9 I wawar Israelitarja, te wenn le glan o baro Debleste, te mangenn le les an ap kol bare diwessa, hunte djan jon gar an o emligo baro wudar dren un win. Koon dren djal an ko baro wudar, hoi ap koi rig hi, kai norden hi, kowa djal win dran ko wudar ap koi rig, kai o kham pralstunes tardo hi. Un koon an o wudar dren well, hoi ap koi rig hi, kai o kham pralstunes tardo hi, djal dran ko wudar win, kai kote hi, kai norden hi. Job djal gar an ko wudar win, kai lo dren djas. Na-a, dran o wudar, hoi wergel hi, djal lo win. 10 Un o rai djal lentsa dren ap koi bari glanstuni platsa, un djal ninna pale lentsa win.
11 Un ap kol bare diwessa anell lo 12 (deesh-te-dui) kilogramme jarro ko gurumeske un 12 (deesh-te-dui) kilogramme jarro ko murshkano bakreske, un jaake bud jarro, har kamell lo i terne bakrenge. Un jek khoro djet pash hake 12 kilogramme jarro.
12 Un te kamell o rai i viecho pestar o baro Debleske te anell, nai well sawo viecho, hoi well tseles chatchedo, nai well sawo viecho, hoi chan le khetne glan o baro Debleste, palle well leske o baro wudar pre kerdo, hoi ap koi rig hi, kai o kham pre djal, te nai well o dren, har lo ap o Debleskro diwes ninna dren well. Un palle djal lo pale koi win. Un o baro wudar hunte well pal leste pandlo.
13 Haki tsalla hunte well jek sasto terno bakro, hoi jek bersh phuro hi, maredo un chatchedo o baro Debleske. 14 Un haki tsalla well koi pashel i chapen glan o baro Debleste anlo: dui kilogramme jarro un jek litari latcho djet, hoi ap o jarro tchoredo well. Jaake well kowa kerdo hako tsireske. 15 Haki tsalla, diwes pal diwes, well o bakro, o jarro un o djet o baro Debleske chatchedo.
O rajeskro them
16 Kawa penell o baro Dewel, maro rai: Te dell o rai jekes peskre tchawendar i kotar them pestar, atchell kowa hako tsireske leske. 17 Te dell o rai i budepaskres i kotar them pestar, atchell ko kotar them koleske jaake rah, bis te well ko bersh, kai halauter pale dino hunte well ap koleste, koneske kowa his. Palle djal ko kotar them pale pale pash o rajeste. Kokres i tchawe o rajestar nai rikrenn, hoi len dino well. 18 Un o rai lell gar ko themestar, hoi i Israelenge dino was, te atchell kowa lenge. Jon hunte wenn gar win tradedo dran koleste, hoi lenge hi. Fun peskro, hoi leskro hi, dell o rai peskre tchawen, te well kowa lenge. Kek mire menshendar hunte well win tradedo dran kowa, hoi lenge hi.
I bobengre khera
19 Un ko mursh anas man ap ko drom, hoi langs ko baro wudar hi, hoi kote hi, kai norden hi, un anas man pash i rashajengre iseme, hoi kote hi, kai norden hi. Dur palla dikom i isema an koi ekka, kai o kham tele djal. 20 Un job penas ap mande: Kowa hi koi isema, kai kerenn i rashaja ko mass kol viechendar, hoi maredo wan, te well i doosh pale mishto, ninna kol viechendar, kai maredo wan, te well i doosh un o pale-tchiddo koowa krik lino, un kai le pengro maro pekenn dran ko djob un dran ko djet, hoi o Debleske dino was. Jon hunte hidjrenn kowa gar ap i bari glanstuni platsa, te taprenn gar i menshe kowa an, hoi o Debleske hi.
21 Un palle anas lo man win ap i bari glanstuni platsa, un mukas man an i star ekke fun kai platsa te djal. Un koi dikom an haki ekka his i tikni platsa. 22 Haki tikni platsa his jaake baro har koi wawar: 20 metarja lengsto un 15 metarja buchlo. 23 Un trul lende djas i massuri trujel. Un dren trul koi massuri his boba tardo. 24 Un o mursh penas ap mande: Kalla hi i boba, kate kerenn i budepangre o Debleskro kherestar o mass kol viechendar, hoi chan i menshe khetne glan o Debleste.