36
I pandle Israelitarja wenn khere an pengro them
1 Tu, mensho, rake ap i berge an Israel un pen lenge, hoi lentsa djal, un pen: Tumer berge Israel: Shunenn, hoi o baro Dewel penell!
2 Kawa penell o baro Dewel, maro rai: Kolla, kai chojedo pral tumende hi, san pral tumende un penenn: Haha! Kal berge, kai his hako tsiro koi, wan kanna menge!
3 Doleske pen ap i berge, hoi wella! Pen: Kawa penell o baro Dewel, maro rai: Hi tchatcho, jon kran, te wan tumer i mulo them. Haki rigjatar wan le un stakran o them khetne. Un menshe dran i themma trul tumende wan un lan tumaro them penge. Un i menshe rakrenn djungeles pral tumende.
4 Doleske shunenn, tumer berge Israel, hoi o baro Dewel penell!
Kawa penell o baro Dewel, maro rai, ap i bare un tikne berge, ap i panja un tale, ap i barra, hoi i tele-phagede kherendar pral atchan, un ap i mukle forja. I menshe dran i themma trul tumende, randan tumen win, un tumer wan lenge sapaske. 5 Doleske penell o baro Dewel, maro rai: Tchatchepah, an miri tati choli rakrom me i phagi win pral i menshende an o them Edom un an i themma trul tumende, kolla miro them penge lan, te randenn le les win. Koi pashel san le pen mulo pral tumende, te djas tumenge jaake, un praassan tumen.
6 Doleske pen glan-wi, hoi pral o them Israel wella. Pen ap i bare un tikne berge, ap i panja un tale: Kawa penell o baro Dewel, maro rai: Tumer hunte hidjran sawo baro praassepen kol wawar menshendar. Doleske hom chojedo pral lende, un an miri tati choli rakrau i phagi win pral lende. 7 Doleske penau me, o baro Dewel, tumaro rai: Me hadau miro wast un dau man sowel: Tchatchepah, kol wawar menshe, kai djiwenn an i themma trul tumende, jon hi kolla, kai wenn praassedo wawarendar.
8 Tumer berge Israel, ap tumende wenn pale ruka baro un senelo, un hidjrenn rukengre mire menshenge Israel. Sik well ko tsiro, kai wenn le pale khere. 9 Tumer dikenn: Me hom ap tumari rig, un dikau latches ap tumende. Un ap tumende budrenn pale hache un witsrenn djob win ap i phub.
10 Un me krau, te wenn i menshe bud, kai djiwenn ap tumende. O tselo kheer Israel, halauter lendar, djiwenn kote. Palle djiwenn le pale an lenge forja. Un kol tele-phagede forja wenn pale newes kerdo. 11 Un me krau, te wenn i menshe un vieche bud ap tumende. Jon lenn bud tchawe. Un me krau te nai djiwenn i menshe kote jaake, har an i phure tsirja his. Un krau tumenge budeder latchepen har an kek tsiro glan kowa. Palle dikenn un haiwenn tumer, te hom me o baro Dewel.
12 Un me mukau pale mire menshen Israel ap tumende te djiwell. Tumer berge wenn pale lengro them, kai djiwenn le hako tsiro. Un tumer krenn buder gar, te merenn lengre tchawe i bokatar.
13 Kawa penell o baro Dewel, maro rai: Pal o them Israel well penlo: “Ko them marell peskre menshen, un krell, te merenn i tchawe kolendar, kai an leste djiwenn.” 14 Doleske penau me, o baro Dewel, tumaro rai: Kowa te well buder gar jaake! Tu chah buder gar menshen! Un kreh buder gar, te merenn i tchawe kolendar, kai an tute djiwenna. 15 Me krau, te shuness buder gar o praassepen kolendar dran wawar themma, un hunte ladjess tut buder gar glan lende. Tu kreh buder gar, te hi tumare menshen buder kek tchawe. Kawa penell o baro Dewel, maro rai.
16 Un o baro Dewel penas ap mande: 17 Tu, mensho, har o kheer Israel an peskro them djiwas, kran le sawo koowa, un djiwan jaake, te was o them pale-tchiddo. Lengro djungelo djipen his mange har ko pale-tchiddo tsiro i djuwjatar, kolat pengro koowa hi. 18 Jon maran menshen, un mangan djungele deblen an. Jaake kran le o them pale-tchiddo.
Doleske mukom miri choli ap lende te well. 19 Un me tradom len an wawar themma mank wawar menshende, un dom len pengri phagi koleske, hoi le kran un har le djiwan. 20 An hawo them, kai le ninna wan, was lendar penlo: “I menshe o baro Deblestar hi kalla, un hunte djan penge dran leskro them.” Jaake anan le ladj ap miro latcho lab. 21 Kote, kai le wan, rakran i menshe djungeles pral mande. Kowa dukas man, te was miro latcho lab an i tchik tserdedo.
22 Doleske pen ap o kheer Israel: Kawa penell o baro Dewel, maro rai: Tumer kran, kai was djungeles rakedo pral mande mank i menshende an wawar themma, pash kolende tumer wan. Kowa, hoi kanna krau, krau gar tumenge dran o kheer Israel. Na-a, kowa krau, te well miro latcho lab pale sharedo.
23 Tumer kran, kai was djungeles rakedo pral miro baro lab mank i menshende an wawar themma. Un me krau, te wap pale sharedo. Kowa hoi krau tumenge, sikrell lende, te hom tchatchepah o Dewel. Un jon hunte dikenn un haiwenn, te hom me o baro Dewel. Kowa penau me, o baro Dewel, tumaro rai. 24 Me lau tumen win dran i tsele themma un wawar menshendar. Un lau tumen khetne un anau tumen an tumaro them. 25 Me witsrau djudjo pani ap tumende, te wenn djudjo halauterestar, hoi kras tumen pale-tchiddo. Ko tselo tchilatchepen, hoi ap tumende anan, har mangan i chochene deblen an, thowau tumendar tele. 26 Me dau tumen i newo dji, un tchiwau i newo ducho an tumende, un lau ko dji dran bar dran tumende win, un dau tumen i dji dran mass. 27 Me dau miro ducho an tumende, un me krau sawe menshe tumendar, kai krenn, hoi tumendar kamau, un djiwenn pal mire tchatchepaskre laba, un rikrenn len dren. 28 Un tumer djiwenn an kau them, hoi dom tumare phurende, un han mire menshe, un me hom tumaro Dewel.
29 Un me lau tumen win dran ko tselo koowa, hoi kras tumen pale-tchiddo. Un o djob mukau pale bares un bud te well, un mukau buder kek bok pral tumende te well. 30 Me krau, te anenn i ruka bud rukengre. Un kowa hoi ap i phub pre djal, well bud un budeder. I menshe dran wawar themma nai san buder gar pral tumende, doleske, kai hi tumen tchi te chal. 31 Un palle well tumenge an o shero, har tchilatcho kowa his, hoi kran un har djiwan. Un ko tselo tchilatcho koowa, hoi kran, un har i chochene deblen an-mangan, well tumenge tchadepaske. 32 Me o baro Dewel, tumaro rai penau tumenge: Hi gar tumenge, kai me krau kau latcho koowa. Ma bistrenn kowa! Tumer dran o kheer Israel, ladjenn tumen un awenn lolo i ladjatar pral kowa, hoi kran!
33 Kawa penell o baro Dewel, maro rai: An ko tsiro, kai me tumari doosh tumendar tele thowom, mukau tumen pale an tumare forja te djiwell. Palle nai krenn tumer i forja pale newes, kolendar kanna tchi har barra pral hi. 34 Un ap tumaro them budrenn pale i hache. Palle hi ko them buder gar mulo un muklo tchiddo glan i jaka halauterendar, kai kote djan. 35 Palle penenn le: Kau them his muklo un diwjo. Kanna hi lo har i baar Eden. Un kal forja his paash-dino, tele-phagedo un wi-meredo. Kanna hi le soreles koi tardo, un menshe djiwenn pale dren. 36 Un kol menshe an i wawar themma trul tumende, kai djido atchan, kolla dikenn un haiwenn, te krom me, o baro Dewel, kowa newes, hoi tele-phagedo his, un mukom senlepen un djob bares te well kote, kai tchi bares was. Me, o baro Dewel, penom kowa glan-wi, un me krau kowa ninna jaake.
37 Kawa penell o baro Dewel, maro rai: Ninna kowa krau i menshenge dran o kheer Israel: Te mangenn le mandar, mukau lendar jaake bud te well, har hi len bakre. 38 An kol forja, kolendar kanna tchi har barra koi hi, djiwenn palle jaake bud menshe, har his bakre an o foro Jerusalem an kol bare diwessa, har kol bakre o baro Debleske maredo un chatchedo wan. Un jon dikenn un haiwenn palle, te hom me o baro Dewel.