9
O Debleskri choli well pral Jerusalem
1 Un me shunom, har das o baro Dewel soreles gole, un penas: Mu wenn le, kolla, kai denn o foro peskri phagi! Hakeno lendar te lell peskro kurepaskro kasht an o wast! 2 Koi wan shob mursha ap o drom, kai was kotar, kai o pralstuno baro wudar hi, ap i nordetikri rig o baro Debleskro kherestar. Un hakenes his tchomone an o wast, koleha job nai marell. Un pash lende his jek, koleskre koola his dran laintikro than. Ap leskro pereskri dori his i tchinepaskri pandlo, koleha job nai laba pre tchinell. Un jon wan un atchan pash i sasterni chatchepaskri tardo.
3 Un o railepen o Israeleskro Deblestar, kai his pral kol star bolepangren, kai kharan Cherubim, hadas pes fun kotar, un djas pash o kheer, kote kai o wudar hi. Un o baro Dewel das ap ko mursheste gole, koleskre koola dran laintikro than his, un koles i tchinepaskri ap peskri rig his, 4 un penas ap leste: An o foro Jerusalem hi gomme menshe, kolengro dji rowell un dell gole pral kau bud djungelo koowa, hoi kate kerdo well. Dja an o tselo foro trujel, un kre i sikepen glan ap kolengre sherja.
5 Ap kol wawar murshende penas lo jaake, te shunom kowa: Djan pal leste an o foro un denn hakenes mulo. Dikenn kek kamlepah ap lende! Kek hunte khaitell tumen! 6 Denn i phuren mulo, un i terne murshen un i terne tchen, ninna i tchawen un i djuwjen! Ma taprenn jekeske an, koles ko sikepen glan ap peskro shero hi! Djan glanstunes pash miro kheer, un fun kotar dureder.
Jaake kran le, un maran glanstunes kol pralstunen, kai glan o baro Debleskro kheer tardo his.
7 Un o baro Dewel penas ap lende: Anenn kolen, kai mulo dino wan, ap i platse glan o Debleskro kheer! Krenn jaake o kheer pale-tchiddo! Palle djan win an o foro! Un jon djan win, un dan i menshen an o foro mulo.
8 Un har le kowa kran, atchom me kokres ap i platsa glan o Debleskro kheer pale. Un mukom man ap i phub te perell, un dom pre gole un penom: Baro Dewel, miro rai! Hal tu jaake chojedo pral Jerusalem, te mukess halauteren mulo te dell, kai i Israelendar pral atchan?
9 Un job penas ap mande: I doosh, hoi i menshe dran o kheer Israel un dran o kheer Juda ap pende anan, hi jaake bud. Bud marepen hi an o them. Un an o foro rikrenn i sorele i wawaren sorjah tele. Un jon penenn: “O baro Dewel djas peske dran kau them. Job dikell men gar!” 10 Doleske dikau me kek kamlepah ap lende, un jon khaitenn man gar. Lengro tchilatchepen anau ap lengre sherja pale.
11 Koi was ko mursh, koleskre koola dran laintikro than his, un koles i tchinepaskri ap peskro pereskri dori pandles his, un penas: “Me krom kowa, hoi tu mange penal.”