51
O them Babilonia djal tele
1 Kawa penell o baro Dewel:
Dik, me bitchrau i ducho,
hoi anell o merepen pral o them Babilonia
un pral kolende, kai kote djiwenna –
kolla, kai hadan pen pral mande.
2 Me bitchrau an o them Babilonia wi-themarja,
kai tradenn i Babilonarjen win dran pengro them,
har i ducho, hoi phurdell o phuss krik,
bis te o them djudjo hi.
Ap ko tchilatcho diwes wenn le haki rigjatar pral lende.
3 Me penau lenge: Denn kol lurden an Babilon kek tsiro, te denn le karje!
Ma mukenn len pengro kurepaskro gad ap pende te riwell!
Lengre terne mursha te khaitenn tumen gar!
Marenn lengre tsele lurden halauter khetne!
4 Palle hi i mule lurde tchiddo an o tselo them Babilonia,
un tele tchurje-dine ap i dromma.
5 I Babilonarja kran baro tchilatchepen ap o Israeleskro Debleste.
O Israel un o Juda wan gar muklo pengro Deblestar,
ko baro Deblestar,
kai hi o rai pral o bolepen un i phub.
6 Nashenn sik dran o foro Babilon,
nashenn tumaro djipaske!
te djan gar halauter tele an koi doosh, hoi kau foro ap peste anas!
Kowa hi o baro Debleskro tsiro,
kai dell lo i Babilonarjen ko tchilatchepen pale, hoi kolla kran.
7 O foro Babilon his har i sonakaskro khoro an o baro Debleskro wast,
i khoro, hoi pherdi mool his,
kolestar i menshe an i tsele themma pijan un mato wan.
Doleske wan jon jaake narwelo.
8 Har i khoro tele perell un an kotja phagell,
jaake sik peras o foro Babilon un khetne phagedo.
Rowenn pral o foro Babilon!
Anenn leske dukepaskro djet,
Nai well, te well lo pale sasto!
9 [I wi-themarja, kai kote djiwenn, penenn:]
Mer kamam o foro Babilon sastes te krell,
un job kamas gar sasto te well.
Palle mukenn les, har job kamella!
Mer djas halauter pale an mare themma!
Leskri phagi hi jaake baro, te djal li bis an o bolepen.
10 [I Israelitarja penenn:]
O baro Dewel sikras, kai ham an o tchatchepen tardo.
Awenn, te djas ap i berga Zion,
te penas, hoi maro baro Dewel latcho koowa kras.
11 I Babilonarja kran o baro Debleskro kheer paash. Doleske las pes o baro Dewel glan, te phagell lo o foro Babilon tele. Job das i rajende dran o them Media bud soor an lende, te djan le ap o foro Babilon pre.
Tchinenn tumare faile!
Lenn tumare sasterne betcheskre patria an o wast!
12 Hadenn o kurepaskri plachta pre,
te sikrenn, kai djan tumer an o kurepen o foreha Babilon.
Tchiwenn bud kurepangren trul o foro!
Tchiwenn ninna kol lurden kote koi, kai garda denn!
Tchiwenn ninna lurden khatemen pal o foro,
te nai perenn le i Babilonarjen an o dumo.
O baro Dewel krell, hoi job pes glan las, un hoi lo pral i menshende an o foro Babilon rakras.
13 Tu foro, kai hal kote, kai bare panja hi,
tu, kai tut baro brawlepen hi,
tiro tsiro hi trujel,
tiro djipaskro thab well tele tchinlo.
14 O baro Dewel, ko rai pral o bolepen un i phub das pes sowel pash peste:
Tchatchepah, me anau bud lurden an tiro foro – jaake bud har stepangre!
Un jon denn bari gole i bachtjatar, te lenn le tiro foro dren.
15 Job, o baro Dewel, kras i phub peskri sorjah,
un kras lat soreles an peskro goswepen,
un kras o bolepen koi pral.
16 Te dell job gole,
well bud pani khetne an o bolepen;
i wolke mukell job te well fun dural,
un mukell jag pral un tele karje te della an o brishin.
Ninna o phurdepen well win dran peskro kheer.
17 Glan sau baro koowa hi hako mensho dineles koi tardo.
Sawo koowa nai haiwell lo gar te krell.
Kolla lauter, kai kran figure, te mangenn le len an,
hunte ladjenna pen.
Lengre figure hi kek tchatche debla,
kek djipen hi an lende.
18 Jon molenn tchi, un hi sapaske.
An ko tsiro, kai rakrell o baro Dewel o tchatchepen win,
hunte djan jon tele.
19 Har wawartchandes hi ko Dewel,
koles o Jakobeskre tchawe an-mangenna!
Job hi kowa, kai kras halauter.
Un i Israelitarja hi leskre menshe.
Job kharell: o baro Dewel, ko rai pral o bolepen un i phub.
20 Un job penell: Tu, foro Babilon, hals miro depaskro saster,
miro kurepaskro tower;
wawar natsjone dom tuha khetne,
un wawar rajengre themma krom tuha paash.
21 Tiri sorjah dom me grajen un klissepangren paash,
ninna wurdja un kol kurepangre, kai koi pral tardo hi.
22 Tiri sorjah dom murshen un djuwjen mulo,
phure un terne,
tchawe un tcha.
23 Tiri sorjah dom bakrengre un lengre bakre mulo,
hache un lengre grumja, kai i wurdja tserdan,
ninna themeskre raja un wawar raja.
24 Kanna dikenn tumer,
har plaissrau o foreske Babilon
un i tsele menshenge, kai an o them Babilonia djiwenn,
lengro tselo tchilatchepen pale pale,
hoi jon ap i berga Zion kran.
Kowa penell o baro Dewel.
25 Babilon, tu marepaskri berga,
tu, kai o merepen anal pral i tseli phub,
dik, me wau pral tute,
penell o baro Dewel.
Me taprau tut miro wasteha,
un witsrau tut i berga tele.
Hoi tutar atchell hi chatchede barra.
26 Kek barra hi mank lende, kai hi jaake latcho,
te tchiwenn le i kheer ap lende pre,
un hoi nashte hidjrenn i kheer.
Hako tsireske atchell tutar tchi har barra pral.
Kowa penell o baro Dewel.
27 Hadenn o kurepaskri plachta pre ap i phub!
Phurdenn an i phurdepaskri an i tsele themma!
Denn i rajen pral i wawar themma gole,
te djan le an o kurepen o foreha Babilon!
Penenn i bare rajenge pral i themma Ararat, Minni un Ashkenas, te bitchrenn le lurden,
te kurenn le pen i menshentsa an Babilon!
Rodenn lurdengre pralstunen win!
Anenn jaake bud graja khetne har stepangre!
28 Denn i rajen pral i wawar themma gole,
te djan le an o kurepen o foreha Babilon,
kol bare rajen dran o them Media,
lengre themeskre rajen un kol wawar pralstunen,
ninna kol tsele lurden an kol themma, kai jon penepaske hi.
29 I phub trissella un darella!
Kowa, hoi o baro Dewel pes glan las, well jaake:
O foro Babilon un o tselo them Babilonia well i mulo them,
kai buder kek nai djiwella.
30 Kol sorele kurepangre an o them Babilonia atchenn an lengre sorele khera,
un djan gar an o kurepen.
Lengri sorjah hi tchi buder,
jon wan har djuwja.
O foreskre wudja hi pre-phagedo,
un i khera chatchenna.
31 Bitchepangre wenn haki rigjatar, jek pal o wawar,
te penenn le o baro rajeske pral o foro Babilon:
“Tiro foro was dren lino haki rigjatar.
32 Lurde hi tardo pash o lengsto pani, te nashell nai buder kek wergel.
I sorele khera hi tele chatchedo.
Un mare kurepangre wan dareno.”
33 Kawa penell o baro Dewel, ko rai pral o bolepen un i phub, kai o Israeleskro Dewel hi:
O foro Babilon hi har i djobeskri platsa,
hoi well i pirentsa soreles stakedo,
te denn le nai kote o djob win.
Sik well o tsiro o foreske, kai well lo khetne stakedo.
O baro Dewel well o foreske Jerusalem ap i rig
34-35 O foro Jerusalem penell:
O Nebukadnezar, ko baro rai dran o them Babilonia,
chas man pre un maras man.
Har i baro panjeskro sap chas lo man,
un kras peskro per pesso miro brawlepah.
Palle witsras lo man krik har i khoro, kai tchi dren hi.
“Mu well pral o foro Babilon ko tchilatchepen,
hoi was menge ninna kerdo”,
penenn i menshe ap i berga Zion.
“I Babilonarja mukan maro rat te nashell.
Kanna mu nashell lengro rat!”
36 Doleske penell o baro Dewel ap o foro Jerusalem:
Dik, me kamau tiro koowa an miro wast te lell.
Me krau, te well lengro lengsto pani Eufrat truk,
un te nashell an lengre wawar panja buder kek pani.
37 Tchi te atchell o forestar Babilon har barra,
un diwje djukle djiwenn kote.
Kolenge, kai dikenn ko foro, atchell o rakepen krik i trashatar.
O foro well lenge sapaske.
Un kek mensho djiwell buder kote.
38 Kanna denn le khetne gole har i lewe,
un sikrenn i danda har i terne lewe.
39 Len hi bari bok – un me krau lenge i chapen,
un krau, te pijenn le pen mates,
un lenge hi halauter sapaske.
Palle sowenn le dren hako tsireske,
un stenn buder gar pre.
Kowa penell o baro Dewel.
40 Me kamau len kote te anell,
kai wenn le tele tchurje dino
har terne bakre, mursh bakre un busja.
41 O foro Sheshachb hi khetne phagedo!
Ko foro, hoi ap i tseli phub bares an-diklo his, hi dren lino!
Har nai was kowa?
I menshenge an i wawar themma atchell o rakepen krik i trashatar.
42 I baro pani was pral o foro Babilon,
sorele panja tchakran o foro tel pende.
43 I wawar forja an o them hi paash dino.
O them Babilonia was i mulo tato them kek panjeha,
i diwjo truk them, kai kek mensho djiwell,
un kek mensho ap i raisa djal.
44 O baro Dewel penell:
Awa, me dom o chocheno debles Bel an o them Babilonia peskri phagi,
un tserdom dran leskro mui kowa, hoi job pre chas.
I menshe dran wawar themma nashenn leske buder gar palla.
I massurja o forestar Babilon peran khetne.
45 Tumer Israelitarja, mire menshe, djan win dran ko them!
Hakeno tumendar mu nashell peskro djipaske!
Miri bari choli well pral o foro.
46 Te shunenn tumer, hoi an o them rakedo well,
nai darans tumer,
un nai nashrans tumare djia pengri soor.
Hako bersh well wawar djungelo koowa rakedo:
Bari sorjah djan le ap i tiknende an kau them,
un jek rai djal ap o wawareste.
47 Dikenn, ko tsiro wella,
kai krau me kol mule deblen an Babilonia paash.
O them Babilonia djal tele an ladj.
Un kolla, kai wan maredo, atchenn kote ap i phub tchiddo.
48 O bolepen un i phub,
un halauter, hoi kote dren hi,
denn gole i bachtjatar,
te perell o foro Babilon an i wasta kolendar,
kai wenn dran ko them, hoi kote tchiddo hi, kai norden hi,
te denn le o foro Babilon paash.
Kowa penell o baro Dewel.
49 I lurde dran Babilon maran bud bud menshen ap i tseli phub.
Kanna hunte well o foro Babilon maredo doleske,
kai maran leskre lurde kol menshen dran Israel.
50 Tumer i menshendar Israel, kai wan gar maredo,
djan win dran o foro Babilon!
Un rikrenn tumen gar pre!
Ninna te han an i dur them,
ma bistrenn o baro Debles,
witar gar o foro Jerusalem!
51 Tumer penenn: I ladj was pral mende.
Menshe dran wawar themma praassan men un san pral mende.
Wi-themarja peran an o kheer o baro Deblestar dren.
52 O baro Dewel penell: Doleske penau tumenge:
Ko tsiro wella,
kai krau i chochene deblen an Babilon paash.
Un an o tselo them hi kolla tchiddo, kai an o kurepen dukedo wan, un denn i bari gole.
53 Ninna te stakrals o foro Babilon pral an o bolepen,
un te krans le pengre massurja jaake baro,
te nai stakrals kek pral wergel,
bitchrau me marepangre, kai wenn pral lende.
Kowa penell o baro Dewel.
54 Bari gole well shunlo dran o foro Babilon,
un sorelo ropen dran o them Babilonia.
55 O baro Dewel krell o foro Babilon paash,
un marell kol bud menshen, kai kote djiwenn.
Har i baro sorelo pani, hoi bari gole dell,
56 wenn kolla pral o foro Babilon, kai phagenn o foro tele.
Kol sorele kurepangre an Babilon wenn pandlo,
lengre boge wenn phagedo.
O baro Dewel hi i Dewel, kai dell lenge ko tchilatchepen pale, hoi le kran.
57 O baro Dewel penell:
Me krau len mato, kol pralstunen an Babilon,
kol gosewe murshen, themeskre rajen, pralstune lurden, un kol wawar lurden an Babilon,
te perenn le an i sopen,
kolestar jon buder gar pre stenn.
Kowa penell o baro rai,
koleskro lab hi: baro Dewel, ko rai pral o bolepen un i phub.
58 Kawa penell o baro Dewel, ko rai pral o bolepen un i phub:
I massurja ko baro forestar Babilon wenn tele phagedo bis ap i phub,
un o foreskre bare wudja wenn chatchedo.
Palle hi koi budi tchitcheske kerdo, hoi menshe dran wawar themma kran.
Koleske jon pen tele maran, kowa chatchrell pre.
59-60 Kal tsele laba, kai penenn, hawi bibacht pral o foro Babilon well, tchinas o Debleskro rakepaskro, o Jeremia, an i liil. Kau liil das lo i mursheste, kowa kharas Seraja. Leskro dad his o Nerija, koleskro dad his o Machseja. Kowa his an ko tsiro, har o Zedekja an o starto bersh baro rai pral o them Juda his, un an o foro Babilon djas. O Seraja djas leha. Un an leskro wast his, te dikell lo, kai lauter mishto djas ap o drom.
61 Un o Jeremia penas ap o Seraja: Te weh tu an o foro Babilon, palle dik, te draweress kal tsele laba glan. 62 Un palle pen: “Baro Dewel, tu penal, kai kreh kau foro paash, jaake kai kek nai djiwella buder kate, kek mensho un kek viecho. Tu penal, te well kau foro i mulo foro hako tsireske.”
63 O Jeremia penas dureder ap o Seraja: Te draweral kau liil win, palle pande i bar koi trujel, un witse les an o Pani Eufrat, 64 un pen: “Jaake hunte djal o foro Babilon tele, un well buder gar pre dran koi bari bibacht, hoi o baro Dewel pral kau foro anell.” Palle hi ko foro buder gar koi.
Kalla his o Jeremijeskre laba.