37
O Zedekja mukell o Jeremijes te kharell
1 O Zedekja, koleskro dad o Josia his, was o baro rai pral o them Juda. Koles tchiwas o baro rai dran Babilonia, o Nebukadnezar, dren, te well lo baro rai pal o Konja. Kowa his o tchawo o Jojakimestar. 2 O Zedekja un i pralstune trul leste un kol wawar menshe an o them shunan gar ap i laba, hoi o baro Dewel ap peskro rakepaskro, o Jeremia, penas, te penell lo len lenge dureder. 3 Un o baro rai Zedekja bitchras o Juchal, koleskro dad o Shelemja his, ninna o rashajes Zefanja, koleskro dad o Maaseja his, pash o Jeremia un mukas leske te penell: Mange maro baro Debles menge, i Israelitarja! 4 O Jeremia djas an ko tsiro pash i menshende dren un win, un was gomme gar an o stilepen witsedo. 5 An ko tsiro djan i lurde o Faraestar dran o them Egiptia win. Har o Babilonarja, kai glan o foro Jerusalem pre tardo his, kowa shunan, tserdan le pen pale dran o foro Jerusalem. 6 Un kote penas o baro Dewel ap peskro rakepaskro, o Jeremia: 7 Kowa penell o baro Dewel, kai o Israeleskro Dewel hi: Pen o baro rajeske dran o them Juda, kowa kai bitchras tumen pash mande, te putchenn man: Kol lurde o Faraestar, kai djan win dran pengro them, te wenn le ap tumari rig, kolla djan pale khere an o them Egiptia. 8 Un i Babilonarja wenn kate pale un rikrenn kau foro an pengro wast, un lenn kau foro penge dren, un chatchrenn kau fores tele. 9 Doleske penell o baro Dewel: Chochenn tumen gar un penenn tumenge gar: “I Babilonarja wenn gar pale kai.” Jon wenna pale kai. 10 Te nai marans tumer ninna i tsele lurden dran o them Babilonia khetne, kolla kai kurenn pen tumentsa, un te atchans lendar kokres i wast pherdo pral, kai dukedo hi, palle stakrans le dran pengre plachtene khera pre, un chatchrans kau fores tele.
O Jeremia well stildo
11 Har i egiptikre lurde pash Jerusalem wan, mukan i Babilonarja o foro Jerusalem. 12 Koi kamas o Jeremia dran o foro Jerusalem win te djal an o them Benjamin, te rakrell lo peskre menshentsa pral kowa, hoi jek, kai meras, lenge palla mukas, un hoi hakeno lella. 13 Har job pash o Benjamineskro Wudar was, his kote i lurdo, kai das garda, koon dren te win nashella. Kowa kharas Jirija, leskro dad his o Shelemja, koleskro dad his o Hananja; o Jirija das garda ap ko wudar, un rikras o Jeremijes peske wastentsa pre, un penas: Tu kameh pash i Babilonarja wergel te nashell. 14 Kote penas o Jeremia: Kowa hi gar tchatcho, me kamau gar pash i Babilonarja wergel te nashell. O Jirija kamas gar ap o Jeremia te shunell, un tapras les un anas les pash i pralstune murshende. 15 I pralstune wan chojedo ap o Jeremia, un mukan les dawa te dell, un witsran les an o stilepen an o kheer o murshestar Jonatan. Kowa his i mursh, kai haiwas lila te tchinell; dran koleskro kheer kran le i stilepen. 16 Jaake was o Jeremia stildo an i isema dur tele an kau kheer. Kote atchas lo bud diwessa.
O Zedekja putchell tchorchanes o Jeremijes
17 I diwes was, kai mukas o baro rai Zedekja les tchorchanes pash peste te anell, un putchas lestar: Hi tut i lab o baro Deblestar? Un o Jeremia penas: Awa, man hi i lab tuke: Tu weh an o wast o baro rajestar dran o them Babilonia dino.
18 Palle putchas o Jeremia o baro rajestar Zedekja: Hoi krom me tuke un tire pralstunenge, un hawo tchilatchepen krom ap kal menshende kate, kai witsran le man an o stilepen? 19 Kai hi kanna tumare dikepangre, kai penan tumenge glan-wi, te well o baro rai dran o them Babilonia gar pral tumende, un witar gar pral kau tselo them? 20 Miro pralstuno un rai, muk miro mangepen glan tute te well! Un shun, hoi tutar mangau! Ma muk man pale te anell an o kheer o Jonatanestar, kowa kai tchinell i lila. Kowa wals miro merepen!
21 Kote mukas o baro rai Zedekja te penell, te rikrenn le o Jeremia ap koi platsa stildo, kai rikran pen i lurde pre. Un job mukas leske hako diwes i maro te anell, kotar kai o maro peklo was, jaake rah bis te his buder kek maro an o foro. Jaake atchas o Jeremia ap koi platsa stildo.