33
O foro Jerusalem un o them Juda wenn pale soreles
1 Un o baro Dewel penas ap o Jeremia o duito kopo, har lo ap i lurdengri platsa stildo his: 2 Kowa penell o baro Dewel, kai halauter krell un mukell lauter te well, hoi lo peske glan las. ‘Baro Dewel’ hi leskro lab. 3 Khare man, palle kamau tuha te rakrell, un kamau tuke baro koowa te sikrell, hoi tu gar haiweh, un kolestar tchi djinal. 4 O baro Dewel, kai o Israeleskro Dewel hi, penell pral i khera an kau foro un pral kol khera i bare rajendar pral o them Juda, hoi phagan le tele, te krenn le o foreskre massurja lentsa sorleder un bareder, te nai wenn gar i Babilonarja pral pengre pre-tchidde dromma an o foro dren. 5 Tumaro kurepen lentsa hi tchitcheske. Jaake wenn i khera an o foro pherdo i mule menshendar, kai mukom me an miri choli mulo te dell. I menshe an kau foro his jaake tchilatcho, te kamom buder gar ap lengri rig te well.
6 Kanna shun, me kamau kau foro pale soreles te krell, un leskro dukepen sasto te krell, te djal leskre menshenge mishto, un te nai djiwenn le kek darjah. 7 Awa, me krau te well pale lauter mishto i menshenge Juda un Israel, un krau kal themma pale jaake sorelo, har his le glan kowa. 8 Un me lau ko tselo tchilatcho koowa krik, hoi le ap mande kran, un djungelo koowa, koleha jon man dukran un choiran. 9 Palle well o foro Jerusalem mange i foro, pral koleste bachtelo hom. I menshe an i tsele themma sharenn man, un hadenn man, te shunenn le ko tselo latcho koowa, hoi me o foreske Jerusalem krau. Lenge atchell o rakepen krik, un jon krenn bare jaka, te dikenn le ko tselo latchepen un koi tseli bacht, hoi dau kau foreske.
10 Kowa penell o baro Dewel: Tumer penan: ‘Kau them hi i mulo them, kek menshe un kek vieche djiwenn kote.’ Djinenn, kal forja an o them Juda un i dromma o forestar Jerusalem, kai kanna jaake paash dino hi, te hi kote buder kek mensho un kek viecho dren, 11 kote well pale sapen shunlo un bachteli gole. O pirno un leskri pirni, kai i bijab krenn, giwenn pale. Un wawar anenn viechen an miro kheer, te parkrenn le pen pash mande, un giwenn koi pashel:
Parkrenn tumen pash o baro Debleste,
ko rajeste pral o bolepen un i phub;
job hi kamles ap mende.
Hako tsiro hi leskro latchepen menge koi.
Me krau te djal kau themeske pale jaake mishto, har leske glan kowa djas. 12 Kowa penell o baro Dewel, ko rai pral o bolepen un i phub: Ninna te dikell kau them kanna win har i mulo them, kai nai djiwenn kek menshe un kek vieche, well i tsiro, kai hi hako fores pale latcho them, kai i bakrengre pengre bakren anenna. 13 Un i bakrengre ginenna pale pengre bakre, kitse jon hi, te djan le win un dren glan kol forja, kai hi ap i bare un tikne berge, un an o them Negev, un an o them Benjamin un trul Jerusalem, un an i forja o themestar Juda. Kowa penell o baro Dewel.
14 Tchatchepah, penell o baro Dewel, ko tsiro wella, kai mukau ko latcho lab tchatches te well, hoi me penom ap o khereste Israel un ap o khereste Juda. 15 An kol diwessa mukau i baro rai dran o Davideskri familja pre te stell, kai hi an o tchatchepen tardo. Kowa krell hoi mishto un tchatcho hi an o tselo them. 16 An ko tsiro wenn i menshe an Juda win lino dran i tchilatche wasta, un kolla an Jerusalem nai djiwenn kek darjah. Un o foro well kharedo ‘o baro Dewel krell men tchatcho’.
17 O baro Dewel penell: Hako tsiro hi jek o Davideskre tchawendar o baro rai pral o them Israel. 18 Un hako tsiro hi rashaja koi dran o kheer Levi, kai chatchrenn mange hako diwes viechen un chapen, sawe vieche, hoi tseles chatchedo wenn un wawar, kolendar kotja mass chatchedo wenn.
19 Un o baro Dewel penas ap o Jeremia: 20 Kowa penell o baro Dewel: Pal o diwes well i rat. Jaake, har kek nai krell kowa wawartchandes, 21 jaake nai lell kek ko lab pale, hoi dom Davideske, kai mange koi his. Leske penom, te hi hako tsiro jek leskre tchawendar o baro rai pral Juda. Witar gar nai lell jek ko lab pale, hoi dom i Levitarenge, kol rashajenge, kai mange budrenn. 22 Kek nai penell, kitse bolepangre momlia an o bolepen hi. Un kek nai penell har bud santa pash o baro pani hi. Jaake dau miro budepaskro o Davideste jaake bud tchawe, kai pal leste wenna, te djinell kek, har bud jon hi. Un ninna krau, te wenn i Levitarja bud bud, kai mire rashaja hi.
23 Un o baro Dewel penas ap o Jeremia: 24 Shunal tu, hoi kal menshe rakran: “I menshe dran kol dui khera, dran o kheer Juda un dran o kheer Israel, kolen o baro Dewel peske win rodas, kolendar kamell lo buder tchi te djinell.” Un jon dikenn tele ap mire menshende. An lengre jaka hi jon buder kek natsjona.
25 Doleske penell o baro Dewel: Jaake har krau me gar i tsirja wawartchandes, un pal o diwes i rati wella, 26 jaake tchiwau me gar mire menshen pale, kai wenna pal o David, kowa, kai mange koi his, un pal o Jakobeskre wawar tchawende. Dran o Davideskro kheer lau jekes, kai well o baro rai pral i menshende, kai wenna pal o Abraham, o Isaak un o Jakob. Me krau te well mire menshenge halauter pale mishto. Un me krau miro dji lenge pre.