29
O Jeremijeskro liil ap i pandlende an o them Babilonia
1 O Debleskro rakepaskro, o Jeremia, tchinas i liil ap i phurende, kai pral atchan kolendar, kai pandles krik anlo wan, un ap i rashajende un o Debleskre rakepangre un ap i tsele menshende, kolen o Nebukadnezar an Jerusalem pandles las un an o them Babilonia anas. 2 Job tchinas kau liil pal kowa, kai o baro rai Jekonja un leskri dai krik anlo wan khetne kol pralstunentsa dran o baro rajeskro kheer un i pralstunentsa dran o them Juda un dran o foro Jerusalem. Ninna kol budepangre an Jerusalem, kai haiwenn mishto te budrell o kashteha un o sasteha wan lentsa krik anlo. 3 O Jeremia das peskro liil kol dui murshenge peha, o Elasa, koleskro dad o Shafan his, un o Gemarja, koleskro dad o Hilkija his. Kolen bitchras o baro rai pral Juda, o Zedekja, an o them Babilonia pash o baro rajeste pral Babilonia, o Nebukadnezar. An ko liil his tardo:
4 O baro Dewel, ko rai pral o bolepen un i phub, kai o Israeleskro Dewel hi, penell ap i pandlende, kolen mukas job an Jerusalem pandles te lell un an o them Babilonia te anell:
5 Krenn tumenge khera, un djiwenn koi dren! Tchiwenn ruka un senlepen an i phub, un chan hoi kote bares well! 6 Romedinerenn un lenn tchawen! Lenn romjen tumare mursh tchawenge, un rodenn tumare tchenge murshen, te romedinerenn le, un anenn tchawen un tchen ap i phub! Awenn bud un gar tikneder! 7 Rodenn koi pal, te djal mishto o foreske, kai mukom tumen te anell. Un mangenn ko foreske mandar latchepen! Te djal o foreske mishto, djal tumenge ninna mishto.
8 O baro Dewel, ko rai pral o bolepen un i phub, kai o Israeleskro Dewel hi, kowa penell: Ma mukenn tumen te chochell kolendar, kai penenn glan-wi, hoi wella: kol rakepangre, kai pash tumende hi, un kol durkepangre. Ma shunenn ap lengre sunja! 9 Jon rakrenn chochepen an miro lab. Me bitchrom len gar, penell o baro Dewel.
10 Kowa penell o baro Dewel: Ap ko tsiro, kai hi i Babilonarja efta-deesh bersha i raja pral tumende, dikau me pale ap tumende, te rikrap miro latcho lab un anau tumen pale khere. 11 Djinau mishto, hoi man tumenge an o shero hi: latcho koowa un gar tchilatcho koowa, te djal tumenge jaake har tumer kamenna. 12 Te denn tumer man an-gole un wenn un mangenn mandar, palle shunau me ap tumende. 13 Tumer rodenn man un hatsenn man. Te rodenn man tumaro tselo djijeha, 14 palle mukau man tumendar te hatsell, penell o baro Dewel. Un me lau tumen dran tumaro pandepen win, un anau tumen khetne dran i tsele menshende un themma, kai tradom tumen, penell o baro Dewel. Un me anau tumen pale an kau them, kai mukom tumen krik te anell.
15 Tumer penenn, kai o baro Dewel das tumen peskre rakepangre ninna an o them Babilonia. – 16 Shunenn, hoi o baro Dewel penell pral o baro rajeste, kai ap o Davideskri beshepaskri beshdo hi, un pral kol menshende an kau foro, kolla kai tumare phrala hi, kai wan gar tumentsa pandles krik anlo. 17 O baro Dewel, ko rai pral o bolepen un i phub penell: Me bitchrau kurepen, bok un nasslepen mank lende, un krau lentsa, har te wans le djungele faige, hoi nai chal kek. 18 O kurepen, i bok un o nasslepen lenn len palla. Un i menshe dran i tsele themma ap kai phub denn i wasta khetne pral o shero, te dikenn le len. An hako them, kai tradau len, dikenn le ap lende har ap praassede menshende, kolendar darenn le. Un jon denn shola pral lende un praassenn len. 19 Kowa well pral lende doleske, kai shunan le gar ap kol laba, hoi mire rakepangre lenge pale te pale penan. Jon kaman gar te shunell, penell o baro Dewel. 20 Kanna shunenn, tumer lauter dran o foro Jerusalem, kai pandles krik anlo han an o them Babilonia! Shunenn, hoi mukell o baro Dewel tumenge te penell:
21 Kowa penell o baro Dewel, ko rai pral o bolepen un i phub, kai o Israeleskro Dewel hi: O Ahab, koleskro dad o Kolaja his, un o Zidkija, koleskro dad o Maaseja his, kolla dui rakran chochepen ap tumende an miro lab. Doleske dau len an i wasta o baro rajestar Nebukadnezar dran Babilonia. Kowa mukell len mulo te dell glan tumare jaka. 22 I tsiro well, kai penenn i menshe dran o them Juda, kai krik anlo wan an Babilonia, te kamenn jon jekes te praassell: Mu krell o baro Dewel tuha, har kras lo ap o Zidkija un ap o Ahab, kolen mukas o baro rai dran Babilonia djides te chatchrell. 23 Koi phagi was ap lende doleske, kai kran le i wi-ladjedo koowa an Israel, un lan penge romjen, kai romedino hi, un penan an miro lab tchomone glan-wi, hoi chochepen his, hoi me lenge gar an o mui tchiwom. Me djinau, hoi le kran, me dikom les, penell o baro Dewel.
O Jeremia un o Shemaja
24 Un ap o Shemaja dran o foro Nehelam hunte peness: 25 Kowa penell o baro Dewel, ko rai pral o bolepen un i phub, kai o Israeleskro Dewel hi: Tu bitchral an tiro lab lila ap i Israelitarja an o foro Jerusalem, un kek penas tuke, te kress kowa. Kal lila bitchral ap o rashajeste Zefanja, koleskro dad o Maaseja his, un ap i tsele wawar rashajende. An kal lila penal o rashajeske Zefanja:
26 O baro Dewel rodas tut win, te wess o rashai pal o rashajeste Jojada. Tu wess o pralstuno an o baro Debleskro kheer, te tchiwess kol tsele narwelen pandles, kai wenna un penenn, te hi le Debleskre rakepangre, un penenn tchomone glan-wi. Tu tchiwess lengre pire an kashta un sasterne shelle trul lengri meen. 27 Kanna, de koi phagi o Jeremijeste dran Anatot, kai pash tumende glan-wi penell, hoi wella. 28 Job bitchras menge i liil an o them Babilonia, un mukas menge te penell: Tumer hunte atchenn i rah tsiro koi. Krenn tumenge khera un djiwenn koi dren! Tchiwenn ruka un senlepen an i phub, un chan, hoi ap lende bares wella.
29 Ko liil, hoi o Shemaja tchinas, draweras o rashai Zefanja glan o Debleskro rakepaskro, o Jeremia.
30 Koi pal penas o baro Dewel ap o Jeremia: 31 Bitche i liil ap i tsele Israelitarjen, kai wan anlo an o them Babilonia, un muk lenge te penell: Kowa penell o baro Dewel pral o Shemaja dran o foro Nehelam: O Shemaja das glan, te hi lo miro rakepaskro, un me bitchrom les gar. Job kras, te patsan tumer leskro chochepen. 32 Doleske dau me, o baro Dewel, leste un leskri familjate i phagi. Kek lendar atchell djido mank kal menshende. Un job dikell gar ko latchepen, hoi krau ap mire menshende. Peskro rakepah anas job mire menshen mandar krik. Kowa penell o baro Dewel.