47
O Debleskri choli well pral i Babilonarja
1 Tele tumentsa, tumer Babilonarja,
tumer, pral kolende bis kanna kek o sorleder his!
Beshenn tumen an i tchik!
Tumer dran o them Kaldea hans beshdo har i rajetsa ap peskri beshepaskri.
Kanna besh tut ap i phub!
Tutar penell kek buder:
‘Babilon, koi shukar tchai’
un ‘Babilon, koi raili’.
2 Le kol dui barra, kolentsa o djob tiknes kerdo well,
un kre jarro!
Tchip ko diklo glan tire jaka pale,
hade tiri tsocha pre,
tchake tire herja pre,
un dja an o pani!
3 Tu well diklo, har djal nanges,
un ladj well ap tute.
Kanna dau me tut ko tselo tchilatchepen pale, hoi kral.
Un kek nai rikrell man pale.
4 Kowa penell o Israeleskro Dewel, kai kokres ko tchatcho Dewel hi,
un kai lell o koowa peskre menshendar an peskro wast.
Leskro lab hi ‘baro Dewel, rai pral o bolepen un i phub’.
5 Rike tiro mui, un besh tut tele, Babilon!
Khate tut an i kali rati!
Tu well buder gar kharedo ‘Rajetsa pral bud themma’.
6 Me homs chojedo pral mire menshende,
un tchiwom len pale mandar,
har te wans le buder gar mire,
un dom len an tiro wast.
Un tut his kek dji lenge.
Ninna ap i phurende tchiwal tu tiro pharo wast
un dal len phari budi.
7 Un tu penal: Me atchau rajetsa hako tsiro.
Un mukal gar an tiro dji te djal, te nai perals kau koowa ap tute pale.
Har kowa win djals, his tuke tchi moldo.
8 Shun kanna, tu, kai kameh o brawlepen,
un patseh, kote kai beshdo hal, nai djal tuke tchi,
un an tiro dji peneh: “Me hom i bareder.
Kek well sorleder har me.
Me hom kek, kolakro rom merella,
un me hom kek, kolat kek tchawe hi.”
9 Well i diwes, kai well kowa lauter pral tute:
Tu nashreh tiro romes, un tire tchawe hi mulo.
Kowa well sik un soreles ap jek diwes pral tute,
ninna te djineh bud drawepangre laba pre te penell, hoi te rikrenn i bibacht dur tutar,
un kral bud bengeskro koowa.
10 Tu rikral tut ap tiro tchilatchepen
un penal: “Kek dikas man!”
Tiro goswepen un lauter, hoi djineh, kras tut pre-phurdo,
jaake te penal an tiro dji: “Me hom i bareder.
Kek well sorleder har me.”
11 Kanna well i bibacht pral tute,
hoi tu nai gar krik drawereh.
Awa, bibacht perell ap tute,
kolatar nai nasheh gar tuke.
Un jaake sik well koi bibacht pral tute,
te nai dikeh lat gar glan-wi.
12 Stake glan, pen kol tsele laba pre, hoi te rikrenn i bibacht dur tutar!
Kre tiro bengeskro koowa,
hoi kral fun tiknes pre!
Dik, har tu tut koi nai win leh!
13 Bud gosewe penan tuke, hoi te kress, jaake te wal khino kol bud labendar.
Mu wenn le kanna un lenn tut dran i bibacht win,
kolla, kai drawerenn an i bolepangre momlia, te djinenn le, hoi wella,
un hako newo tchon tuke penenn, hoi pral tute well.
14 Dik, jon wan har tchinlo phuss, hoi i jag pre chatchrell!
Kaja hi gar i tikni jag, pash kolate besheh un tut tatsreh.
Na-a, jaake sorelo hi koi jag, te nai nashenn le gar penge, un nai lenn gar pengro djipen win.
15 Jaake hi kol tsele drawepangre, kolentsa khetne budral,
kolla, kai paran tuha fun ko tsiro, har terno hals.
Kek lendar nai rikrell pes ap peskre herja, un perell fun jek rig ap i wawar.
Un kek hi koi, kai lell tut win dran i bibacht.