40
O Dewel rakrell latches peskre menshentsa
1 “Rakrenn latches mire menshentsa,
un khossenn lengre swa”, penell tumaro Dewel.
2 “Rakrenn i menshenge an Jerusalem an o dji,
un penenn lenge: Ko tsiro hi trujel, kai hunte budran tel duka un dawa.
Tumari tseli doosh hi plaissedo.
O baro Dewel das tumen i phagi, hoi his jaake baro, har te lans dui kope i phagi tumaro tselo tchilatchepaske.”
3 Shunenn! Koi dell jek gole:
“Krenn o baro Debleske o drom an o mulo tato them, te nai well lo pash i menshende!
Lenn halauter krik, hoi maro Debleske an o drom tchiddo hi!
4 Krenn, te well haki berga tikneder!
Un hadenn ko them, hoi mank i berge tchiddo hi!
O bango drom te well buder gar bango!
Un o djungelo drom te well mishto kerdo.
5 O baro Debleskro railepen well diklo.
Un i tsele menshe dikenn les.
Kowa penas o baro Dewel.”
6 Un shunom, har jek penas: “Rake tire menshentsa!”
Un me putchom: “Hoi dap gole?”
“I tsele menshe hi har khass,
un har diwje blume djiwenn le kek rah tsiro.
7 Te phurdell o baro Dewel pral lende, well o khass djelto, un i bluma perell tele.
Tchatchepah, i menshe hi har khass!
8 Un o khass well djelto un i bluma perell tele,
– o rakepen o baro Deblestar kowa atchell hako tsireske.”
O latcho lab
9 Tu, koi berga Zion, hal har i tchai, kai anell i latcho lab.
Tu, o foro Jerusalem, hal bitchedo te aness bacht.
Dja pre ap i bari berga!
De sorjah gole, un ma dare!
Dja pre ap i bari berga!
Pen ap i forja an o them Juda:
“Ake, tumaro Dewel!”
10 Dikenn, o baro Dewel, maro rai, well bari sorjah.
Un job hi o rai pral halauter.
Kolen, kai job win las dran o pandepen, hi pash leste.
Awa, kolen, kai job peske ginas, djan leske glan win.
11 Job dell jak ap lende har i bakrengro dell jak ap peskre bakre un dell len te chal,
un lell i terne bakren an peskre mussja,
un hidjrell len an peskri baja.
Un kolla, kai len terne hi, lenge djal lo latches trujel.
O Israeleskro Dewel hi har kek wawar
12 Koon hi jaake baro, te nai lell lo i tsele panja an peskro wast?
Koon nai tchiwell peskro wast ap o bolepen un penell, har buchlo kowa hi?
Koon nai tchiwell i tseli tchik i phubjatar an i baro tcharo, te dikell lo har bud kowa hi?
Un koon nai penell, har pharo i berge hi,
un nai tchiwell len ap i waga?
Kek mensho nai krell kowa!
13 Kek nai penell o baro Debleske, hoi te krell lo.
Kek nai sikrell les, har te krell job tchomone.
14 Kekestar putchas job goswepen, te haiwell lo, hoi mishto hi.
Kek sikras les, har te krell lo o tchatchepen win.
Kek sikras les, har te djinell lo kau tselo koowa,
un haiwell lauter mishto.
15 Dik, i menshe dran wawar themma hi leske gar budeder moldo har o pani, hoi ap o khoro tele nashell,
un har i stauba, hoi ap i waga tchiddo atchas.
Dik, i tikne themma an o baro pani hidjrell lo pre, har te wans le i wast pherdo tchik.
16 Un o tselo kasht ap i berga Libanon hi gar doha, te well kolestar o Debleske i jag kerdo.
Un i tsele wesheskre vieche kote hi gar doha, te wenn le leske maredo un chatchedo.
17 I tsele themma hi har tchi glan leste,
un hi leske tchi moldo jaake har te wans le gar.
18 Koon hi har o Dewel?
Hi tchomone jaake har job?
19 I figura, nai well li har o Dewel?
I budepaskro krell lat dran saster,
un i wawar tchiwell sonakai trul late,
un krell rupene werklia un pandell len ap late pre.
20 Jek, kai hi tchorwelo, rodell peske i kasht, hoi sorelo atchell,
un anell les pash i mursheste, kai haiwell mishto o kashteha te budrell,
te krell lo leske i figura, hoi gar trujel perell.
21 Haiwan tumer gar?
Shunenn tumer gar?
Was kowa tumenge gar penlo glan rah tsiro?
Djinenn tumer gar, har i phub kerdo was?
22 Job hi kowa, kai hi o rai pral i tseli phub.
Un kolla, kai ap i phub djiwenn, hi glan leste har stepangre.
Job hi kowa, kai tchiwas o bolepen pral i phub har i buchli plachta,
har te krell jek i plachteno kheer, te nai djiwell lo dren.
23 Job krell, te well i pralstunen buder tchi penepaske,
un i rajenge pral i phub lell lo lengri soor krik.
24 Jon hi har djoba, hoi an i phub witsedo hi.
Jaake sik har i draba lendar win djal,
phurdell i ducho pral lende, te wenn le truk.
Un i baro phurdepen phurdell len krik har phuss.
25 “Koon hi jaake har me”, putchell o tchatcho Dewel,
te nai penenn tumer: “O baro Dewel hi jaake har kowa?”
26 Hadenn tumare jaka pre,
un dikenn: Koon kras kowa?
Job anell kol tsele bolepangre momlia ap lengro drom,
un djinell kitse jon hi,
un dell hakeni pash peskro lab gole.
Un kek hi koi, hoi palle gar well.
Jaake baro un sorelo hi lo.
27 Hoske penenn tumer Israelitarja, tumer, kai wenna pal o Jakob:
“O baro Dewel prindjrell men buder gar.
Maro Dewel dikell gar koi pre, te well men maro tchatchepen.”
28 Haiwan tumer gar?
Shunan tumer gar?
O baro Dewel hi i Dewel kai atchell hako tsireske.
Job kras i tseli phub.
Khino well lo gar,
un lestar djal i soor gar krik.
Leskro goswepen hi jaake baro, te nai hatsell les kek win.
29 Job dell kolen, kai khino wan, newi soor.
Un an kolende, kai kek soor buder hi, dell lo newo djipen.
30 Ninna terne menshe wenn khino un nashrenn pengri i soor,
un terne kurepangre perenn, te hi len kek soor buder.
31 Kolla, kai ap o baro Debleste dikenn,
lenn newi soor.
Jon hadenn pen har bare tchirkle hadenn pen pengre mussjentsa.
Jon nashenn un lengri soor djal gar krik.
Jon djan trujel un wenn gar khino.