38
O Hiskija well nasselo un pale sasto
1 An kol diwessa was i merepaskro nasslepen pral o Hiskija. Un o Debleskro rakepaskro, o Jesaja, koleskro dad o Amoz his, was pash leste un penas ap leste: “Kawa penell o baro Dewel: ‘Tu weh gar sasto kau nasslepastar, un hunte meress. Doleske pen tire menshenge, har te djal pal tiro merepen dureder!’”
2 O Hiskija rissras pes o mujeha ap i massuri, un mangas o baro Debles un penas: 3 “Ach, baro Dewel, mangau tut, biste gar, kai djiwom glan tute an o tchatchepen un i djudjo djijeha un krom, hoi mishto hi glan tire jaka.”
Un o Hiskija rowas i baro ropen glan leste. 4 Kote penas o baro Dewel ap o Jesaja: 5 Dja pash o Hiskija, un pen leske: “Kawa penell o baro Dewel, ko Dewel tiro dadestar, o Davidestar: Me shunom tiro mangepen, un me dikom tire swa. Shun, me kamau pash tiro djipen gomme 15 (deesh-te-pantch) bersha pashel te tchiwell. 6 Un kamau tut un kau foro win te lell dran o wast o baro rajestar pral o them Assur. Un me rikrau mire wasta pral kau foro. 7 Kowa hi tuke ko sikepen o baro Deblestar, te djiness, kai o baro Dewel kowa rikrella, hoi lo penas. 8 Dik ap i khameskri kambana, hoi mukas o Ahas te krell. O baro Dewel mukell i kambana deesh kotja pale te djal.”
Un jaake kras les o kham ninna, un i kambana djas deesh kotja pale pale.
9 Kawa hi koi gili, hoi kras o Hiskija, ko baro rai pral o them Juda, har job nasselo his un pale sasto was:
10 Me penom mange: Mashkral an miro djipen hunte merap
un pash i mulende hunte djap.
I bersha, hoi mange hunte wans, wan mange randedo!
11 Me dikau o baro Debles gar buder
kate an o them, kai i djide hi.
Un kote, kai hi kek djipen buder,
dikau kek wawar menshen buder.
12 Tele phagedo hi miro djipen,
har o plachteno kheer i bakrengro murshestar, kai dureder djal.
Tele tchinlo hi miro djipen
har i thab dran i kotar than.
Diwes un rati mukeh tu man te haiwell, te hi mantsa trujel.
13 I tseli rati rowau i dukatar,
hoi jaake hi, har te phagals i lewo mire kokale.
Diwes un rati mukeh tu man te haiwell, te hi mantsa trujel.
14 An miri gole hi kek soor.
Har i tchirklengri gole shunell pes miri gole an,
un har te rowals i tauba.
Mire jaka hi khino, jaake rah dikom ap tute pre.
Miro rai, hom an o merepen!
Ab tu ap miri rig!
15 Hoi penap pal kowa gomme:
Job kras, hoi lo mange penas
Me nai sowau buder gar.
Miro tselo djipen was mange shutlo.
16 Rai, dran tire laba djiwenn i menshe.
Un dran lende djiwau me ninnaa.
Kre tu man sasto!
Un rike man djido!
17 Dik, kowa his mange mishto, te wom nasselo:
An tiro kamlepen tserdal tu miro djipen win dran o merepen.
I tseli doosh, hoi me ap mande anom, witsral tu pal tiro dumo.
18 An o mulengro them sharenn le tut gar.
I mule nai giwenn tuke kek gilja.
Un kolla kai paskedo hi,
nai dikenn buder gar, te rikreh tu tiro lab.
19 Kolla, kai djiwenn,
awa, i djide hi kolla,
kai sharenn tut,
jaake har me sharau tut kau diwes.
I dada penenn pengre tchawenge,
kai tu tiro lab rikreh.
20 O baro Dewel his kowa, kai las man win dran o merepen.
Un mer kamah leske te bashrell ap i dorjengre bashepangre
an o baro Debleskro kheer
hako diwes jaake rah mer djiwah.