14
I Israelitarja wenn pale an pengro them
1 O baro Dewel krell peskro dji peskre menshenge pre. Un pale rodell lo peske i Israelitarjen win, un mukell len an pengro them te djiwell. Un wi-themarja wenna un djiwenna khetne lentsa. 2 Un menshe dran wawar themma anenn i Israelitarjen an ko them pale, hoi o baro Dewel len das. Un kol wi-themarja, mursha un djuwja, wenn lengre budepangre. Un kolla, kai i Israelitarjen pandles krik lan, kolen lenn jon pandles, un wenn i raja pral kolende, kai rikran len tele.
O baro rai dran Babilonia hi mulo
3 Un an ko tsiro lell o baro Dewel i Israelitarjen win dran lengre duka un lengro ropen un lengri phari budi, hoi jon hunte kran. 4 Palle giwenn le kai sapaskri gili pral o baro rajeste pral Babilon:
Har nai djal kowa?
Tu, kai menge i pharo djipen kral, wal dino.
Kekes nai dukreh buder.
5 O baro Dewel phagas tiro kasht, tu tchilatcho,
awa, o rajeskro kasht phagas lo an kotja.
6 Tu dal i menshen an bud themma,
un dal un dal un mukal gar tele.
Diwji choljah rikral tu len tele,
un lal len palla kek latchepah.
7 Kanna dell kowa lauter buder gar.
Latchepen un bacht wan pale ap i phub.
Hakeno giwell i bachtjatar.
8 Ninna i zipresstikre ruka hi bachtele pral tute,
un kol zedertikre ruka ap o Libanon penenn:
“Jaake rah har tu koi tchiddo hal
well kek kai pre, un dell men trujel.”
9 O tselo mulengro them hi ap i herja
un djinell, te weh.
I mulen mukenn le gar te sowell, tu te weh.
Kolla, kai bare raja his ap i phub,
awa, i raja pral bud menshende,
stenn pre fun pengre rajengre beshepangre.
10 Un lauter penenn tuke:
Ninna an tute atchas kek soor,
tuke djas har menge!
11 Tiro railepen, hoi trul tute his, was witsedo an o telstunepen,
un i bashepangrea bashrenn buder gar tuke.
I kirme hi kanna tiro tchiben,
un kirmentsa tchakreh tut.
12 Tu shukar bolepaskri momeli,
har nai was, kai peral tu tele?
Tu, kai stakral i tsele themma tel tute,
har djas, kai wal ap i phub tele dino?
13 Un tu penal tuke an tiro dji:
“Me kamau pre te djal an o bolepen,
pral i tsele bolepaskre momlia o Deblestar kamau me miri beshepaskri pre te tchiwell,
un man beshell kote ap i berga, kai i debla khetne wenn,
kote kai o kham gar diklo well.
14 Me djau dureder pre har i wolke hi,
un krau man jaake bares har o Dewel, ko pralstuno, hi.”
15 Awa, tele pash i mulende djal tu,
an o telstuno mulengro them!
16 Kolla, kai dikenn tut, krenn bare jaka, un nai patsenn kowa gar:
“Hi kowa ko mursh, glan koleste i tseli phub trissas,
un i tsele rajengre themma bari darjah glan leste trissan?
17 Hi job kowa, kai dran i phub i mulo them kras,
un i forja khetne phagas,
un leskre pandlen gar buder khere mukas?”
18 I tsele themengre raja wan shukar paskedo,
hakeno an peskro mulengro kheer.
19 Tu hal an i tchik witsedo, har i kotar kasht krik witsedo hi.
Tut hi kek muleskro kheer,
hal rido har kolla, kai wan maredo o chareha,
hal witsedo lentsa an i barrengri phub un khetne stakedo.
20 Tu kral tiro them paash,
un maral i menshen an tiro them.
Doleske weh tu gar paskedo har kol wawar raja, kai an barrengre khera paskedo wan.
Un tiri tchilatchi familja well bistedo hako tsireske.
21 Tire mursh tchawe hunte merenn!
Awenn un denn len mulo!
Jon hunte merenn ko tchilatchepaske, hoi lengre phure kran,
te nai hadenn le pen gar buder,
un lenn i phub penge dren
un krenn penge forja koi pre.
22 O baro Dewel, ko rai pral o bolepen un i phub, penell: Me hadau man pre ap i menshende an o foro Babilon. Leskro lab well bistedo. Un kek lendar atchell djido, witar gar lengre tchawe un tchawengre tchawe. 23 Me krau dran o foro i sapeni platsa, kai i stachelengre djiwenn. Un khossau o tselo foro krik, har jek i besa lell un o kheer win khossell. Kowa penau me, o baro Dewel, ko rai pral o bolepen un i phub.
O Dewel dell i Assirjen
24 O baro Dewel, o rai pral o bolepen un i phub, penas un das pes sowel:
Jaake har me les mange glan lom, jaake krau les ninna.
Un jaake har an miro dji hi te krap, jaake well ninna.
25 Me dau i Assirjen an miro them,
ap mire berge stakrau len khetne,
te nai rikrenn le buder gar mire menshen tele,
un krenn lenge buder gar i pharo djipen.
26 Jaake his kowa an o Debleskro dji te krell lo ap i phub. Un leskro wast hadas lo pre, te dell lo i menshen an hake themma pengri phagi. 27 O baro Dewel, ko rai pral o bolepen un i phub, las pes kowa glan.
Koon nai krell, te well kowa gar?
Leskro wast hi hadedo. Koon nai lell leskro wast pale?
O Dewel dell i Filistarjen
28 Kawa hi, hoi sikras o Dewel o Jesajes an ko bersh, kai o baro rai Ahas meras.
29 Tumer menshe an o them Filistia, ma awenn bachtelo,
te was o kasht, koleha dino wan, kanna phagedo.
Te merell i sap, well i djungleder sap pal leste.
Un lestar well i wawar sap, hoi hi gomme djungleder un nai hadell pes har i tchirklo.
30 I tchorwelen mire menshendar hi doha te chal.
Un kolen, kai tchi hi, nai tchiwenn pen tele kek darjah.
Tumen, Filistarja, mukau i bokatar te merell.
Un hoi tumendar pral atchell, dau mulo.
31 Denn soreles gole, tumer, kai han tardo pash o foreskre wudja!
Rowenn bari goljah, tumer, kai djiwenn an o foro!
Trissenn i darjatar an o tselo them Filistia!
Fun kotar, kai norden hi, well jagakro ducho un bud bud lurde,
un kek kolendar atchell pale.
32 Hoi hunte penas kolenge, kai i Filistarendar bitchedo wan?
Penenn lenge: O baro Dewel tchiwas o foro Zion soreles pre. Un kate nai khatrenn pen peskre tchorwele menshe kek darjah.