5
I drakengro them Israel
1 Shunenn, kamau miro maleske i gili te giwell, i gili pral leskro drakengro them.
Miro males his i latchi phub ap i tikni berga.
2 Un job rissras koi phub,
un las i tsele barra krik,
un tchiwas wi-rodede, latche drakengre ruka an koi phub.
Un job tchiwas i turmo pre tardo mashkral dren.
Un hadas i gruba win, kai wenn i drake win stakedo, te well o mool win.
Un palle dikas lo ap ko tsiro, kai wenn i drake bares, – latche drake, patsas lo.
Har ko tsiro was, wan diwje shutle drake baro.
3 Kanna awenn, tumer menshe an o foro Jerusalem un an o them Juda,
un krenn o tchatchepen win mashkral mande un miro drakengro them!
4 Hoi hunte kroms budeder an miro drakengro them, hoi gar krom?
Hoske anas lo diwje shutle drake win?
Un me patsom, te hi le latcho un gudlo.
5 Jaake kamau tumenge kanna penell,
hoi kamau te krell ko drakengro themeha, hoi mange hi.
Me kamau kol burra krik te lell, hoi trul leste hi,
jaake te well lo tele chalo,
un leskri massuri mukau tele te phagell,
jaake te well lo khetne stakedo.
6 Un me mukau ko them tchiddo, har lo hi.
I ruka wenn gar pale tchinlo, un i phub gar trujel witsedo.
Palle wenna subjengre burra un subjengro senlepen bares koi pre.
Un me penau o brishineske, te perell lo gar koi tele.
7 O kheer Israel hi o drakengro them o baro Deblestar, ko rajestar pral o bolepen un i phub.
Un i mursha an o them Juda hi kol drakengre ruka, hoi job an i phub tchiwas un pral kolende job bachtelo his.
Ap lende dikas lo, te anenn le o latchepen glan.
Un hoi was, his tchilatchepen.
Jon te dans hakenes peskro tchatchepen,
un kran, hoi his tchi har tchilatchepen.
O tchilatchepen i menshendar
8 Djungelo djal kolenge, kai krenn pen jek kheer pal o wawar,
un ginenn penge jek kotar phub pal o wawar,
bis te buder kek kotja phub pral atchenn,
un lenge kokres o tselo them hi.
9 O baro Dewel, ko rai pral o bolepen un i phub,
das pes sowel un penas glan mire kanda:
Kol bud khera wenn paash dino,
un kek djiwell buder an kol bare shukar khera!
10 Ap deesh hektarja drakengro them wenn drake bares, hoi denn gar budeder har ochta litarja mool.
Un sheel kilogramme djob, hoi wi-witsedo wan an i phub, anenn gar budeder har deesh kilogramme djob.
11 Djungelo djal kolenge, kai stenn pre taissarlake, te djan le an i kertchima,
un rati gomme koi beshdo hi un mato wenn!
12 Jon mukenn penge mishto te djal un krenn bashepen ap dorjengre bashepangre un phurdepangre un wawar bashepangrea.
Un mool hi ninna pashel.
Ap kowa, hoi o baro Dewel krell, dikenn le gar.
Kolestar kamenn le tchi te djinell.
13 Doleske penell o baro Dewel:
Mire menshe haiwan tchi.
Doleske wenn le pandles krik lino,
un i brawele mank lende merenn i bokatar,
un kol bud menshe merenn i trushatar.
14 O mulengro them bokell pal lende
un kras peskro mui dur pre,
un peskri meen jaake dur har djal,
un chal i brawelen un kol wawaren, kai i bachtjatar gole dan un khelan.
15 Un jaake well o mensho tikno,
un hunte dikell dren, te hi lo tchi.
Un kolla, kai dikan tele ap i wawarende, hunte tchiwenn pengre jaka tele pherdi ladj.
16 O baro Dewel, ko rai pral o bolepen un i phub sikrell peskri soor, un krell, hoi tchatcho hi.
O tchatcho Dewel sikrell, te hi lo kokres o Dewel, kai rakrell o tchatchepen win.
17 Mank i barra ko paash-dino forestar nashenn i bakre trujel un rodenn o chapen.
Un i busja chan mank i khera, hoi kol brawele pale hunte mukan.
18 Djungelo djal i tchilatchenge, kai kamenn o chochepen.
Jaake har i grai o wurdin tserdell, jaake tserdenn jon lengri doosh pal pende,
19 un penenn: Mu well kowa sik, hoi o baro Dewel kamell te krell, te dikas kowa!
Mu well tchatcho, hoi o Israeleskro latcho Dewel peske glan las, te prindjras kowa!
20 Djungelo djal kolenge, kai penenn ap o tchilatchepen ‘kowa hi latcho’,
un ap o latchepen ‘kowa hi tchilatcho’.
I rati kharenn le ‘diwes’,
un o diwes kharenn le ‘rati’.
Shutlo koowa hi lenge gudlo,
un gudlo koowa hi lenge shutlo.
21 Djungeles djal kolenge, kai an pengre jaka kokres gosewo hi,
un pash pende kokres krenn, har te haiwenn le halauter.
22 Djungeles djal kolenge, kai hi tchatche mursha pash o pipen,
un sorele mursha te krenn le chatchedi.
23 Djungeles djal kolenge, kai i lowenge koles an o tchatchepen tchiwenn, kai doosh ap peste anas,
un kolenge lengro tchatchepen krik lenn, kai an o tchatchepen tardo hi.
24 Doleske merenn le tele har o senlepen, koleskre draba nasselo hi,
un koleskri bluma tele perell,
un har o khass, pral koleste i jag djal un les pre chatchrell.
Jon kaman gar te djal o drom o baro Deblestar, kai hi o rai pral o bolepen un i phub.
Un i labendar lengro latcho Deblestar kaman le tchi te djinell.
I Assirja djan ap o them Juda pre
25 Doleske mukell o baro Dewel peskri choli pral peskre menshende te well.
Un job hadell peskro wast ap lende un dell len.
Un i berge trissenn.
Un i mule atchenn tchiddo ap i dromma har tchik.
Un an kowa lauter mukell leskri choli gar palla,
leskro wast atchell hadedo, te dell lo trad.
26 Un job bitchrell i sikepen i menshenge an i them, hoi dur krik hi.
Un job sholellb, te wenn le dran o palstuno i phubjatar.
Dik, kote wenn le – jaake sik har djala!
27 Pash lende hi kek khino,
un kek, kai djal banges,
kek, koleske i jaka pandlo djan un kek, kai sowella.
Un kekeske lendar djal o pereskro pandepen pre,
un lengre dorja ap lengre kircha hi soreles un djan gar paash.
28 Lengre faile hi har tchurja,
un lengre boge hi pre tserdedo.
Ko saster tel lengre grajengre pire hi sorelo har bar.
Un i rade ap lengre wurdja hi sik har i sorelo ducho, hoi phurdell pral i phub.
29 Lengri gole hi har koja, hoi i lewo dell,
awa, jaake har dell i terno lewo gole, hoi well dur dran leskri meen.
Un palle stell lo pre un taprell ko vieches, hoi lo chapaske kamell,
un hidjrell les kote, kai kek nai lell les leske krik.
30 Un an ko tsiro well pral lende i bari gole, sawi gole har o baro pani krell.
Un te dikell jek palle tele ap i phub, dikell lo kalepen un bare duka.
Un pesse wolke krenn, te well o diwes tamlo.